سیدنا سعید بن مسیب، مروان کا یہ بیان نقل کرتے ہیں (مروان کہتا ہے کہ) میں سیدنا معاویہ کے ہمراہ ام المومنین سیدہ عائشہ رضی اللہ عنہا کی خدمت میں حاضر ہوا، ام المومنین نے کہا: تو نے حجر بن عدی اور ان کے ساتھیوں کو قتل کیا ہے اور ان کے ساتھ تم نے بہت زیادتی کی ہے، اس کے بعد راوی نے پورا قصہ بیان کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6097]

معاویہ بن قرہ فرماتے ہیں کہ زیاد نے سیدنا عمران بن حصین رضی اللہ عنہ کو ” ابونجید “ کہہ کر پکارا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6098]

محمد بن عمر نے ان کا نسب یوں بیان کیا ہے ” عمران بن حصین بن عبید بن خلف بن عبدنہم بن حزمہ بن جہمہ بن غاضرہ “ ان کی کنیت ” ابونجید “ تھی۔ آپ کے والد اور آپ کی بہن بہت پہلے پہل اسلام لائے تھے، اور رسول اللہ صلی اللہ علیہ وسلم کے ہمراہ تمام غزوات میں شرکت بھی کی۔ آپ مسلسل اپنی قوم کے علاقے میں ہی رہے، پھر بصرہ میں منتقل ہو گئے اور اپنے اہل و عیال سمیت وفات تک وہیں رہے۔ سیدنا عمران بن حصین رضی اللہ عنہ بصرہ پر زیاد کی حکومت آنے سے ایک سال پہلے 50 ہجری میں فوت ہوئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6099]

مصعب بن عبداللہ زبیری فرماتے ہیں کہ ابونجید عمران بن حصین بن خلف بن عبدنہم خزاعی کا انتقال 52 ہجری کو بصرہ میں ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6100]

ہلال بن یساف فرماتے ہیں کہ میں بصرہ گیا اور وہاں کی مسجد میں داخل ہوا تو ایک بزرگ ستون کے ساتھ ٹیک لگائے حدیث شریف بیان کر رہے تھے کہ رسول اللہ صلی اللہ علیہ وسلم نے ارشاد فرمایا: سب سے بہترین زمانہ میرا ہے، اس کے بعد وہ جو میرے زمانے سے متصل ہے، اس کے بعد وہ جو اس زمانے سے متصل ہے، پھر اس کے بعد ایسے لوگ آئیں گے جو بن مانگے گواہی دیں گے۔ میں نے پوچھا کہ یہ بزرگ کون ہیں؟ تو لوگوں نے بتایا کہ یہ سیدنا عمران بن حصین رضی اللہ عنہ ہیں۔ ٭٭ یہ حدیث عالی ہے، امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6101]