سیدنا عبدالرحمن بن ابی بکر صدیق رضی اللہ عنہما کے فضائل کا ذکر۔ ابو عبیدہ معمر بن مثنیٰ سے روایت ہے، انہوں نے کہا: دورِ جاہلیت میں سیدنا عبدالرحمن بن ابی بکر رضی اللہ عنہ کا نام ”عبد العزیٰ“ تھا، تو رسول اللہ صلی اللہ علیہ وسلم نے ان کا نام بدل کر ”عبدالرحمن“ رکھ دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6112]

مصعب بن عبداللہ زبیری سے روایت ہے، انہوں نے کہا: سیدنا عبدالرحمن بن ابی بکر رضی اللہ عنہ کی کنیت ابو عبداللہ تھی اور ایک قول کے مطابق ابو محمد تھی، ان کی اور سیدہ عائشہ رضی اللہ عنہا کی والدہ سیدہ ام رومان بنت عامر بن عویمر تھیں۔ سیدہ ام رومان رضی اللہ عنہا مشرف بہ اسلام ہوئیں اور ان کا اسلام بہت عمدہ ثابت ہوا، ان کے بارے میں رسول اللہ صلی اللہ علیہ وسلم نے ارشاد فرمایا: ”جو شخص یہ پسند کرے کہ حورِ عین (جنت کی حوروں) میں سے کسی خاتون کو دیکھے،، وہ امِّ رومان کو دیکھ لے۔“ سیدہ ام رومان رضی اللہ عنہا کی وفات ذوالحجہ 6 ہجری میں ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6113]

احمد بن یعقوب ثقفی سے روایت ہے، انہوں نے کہا کہ میں نے ابوبکر بن ابی شیبہ کو یہ کہتے ہوئے سنا: سیدنا عبدالرحمن بن ابی بکر رضی اللہ عنہ کا نام (زمانہ جاہلیت میں) عبد العزى تھا، تو رسول اللہ صلی اللہ علیہ وسلم نے ان کا نام بدل کر عبد الرحمن رکھ دیا، ان کی کنیت ابو محمد تھی، وہ فتح دمشق میں حاضر ہوئے تھے، پس سیدنا عمر رضی اللہ عنہ نے دمشق کے بادشاہ جودی کی صاحبزادی لیلیٰ کو انہیں بطورِ انعام عطا کیا تھا کیونکہ وہ آپ اس سے پیار کرتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6114]

عروہ بن زبیر سے روایت ہے کہ مجھے سیدنا عبدالرحمن بن ابی بکر صدیق رضی اللہ عنہ نے خبر دی کہ وہ مکہ کے چند سواروں کے ساتھ غلہ حاصل کرنے کی غرض سے شام کی طرف نکلے، پس وہ لیلیٰ نامی ایک عورت کے پاس پہنچے اور اس کی ہیئت و خوبصورتی کو دیکھا، پھر جب سیدنا عبدالرحمن بن ابی بکر رضی اللہ عنہ واپس آئے تو وہ اس کے بارے میں یہ اشعار پڑھ رہے تھے: ”میں نے لیلیٰ کو یاد کیا جبکہ مقامِ سماوہ ابھی سامنے تھا، پس جودی کی بیٹی لیلیٰ کا مجھ سے کیا تعلق اور میرا اس سے کیا واسطہ؟ اور میرا دل ایسی حارثیہ عورت کی طلب کیسے کرنے لگا جو مقامِ بصریٰ یا مآتیہ میں مقیم ہے؟“ پھر جب سیدنا خالد بن ولید رضی اللہ عنہ کا دور آیا اور انہوں نے شام فتح کیا، تو مسلمانوں کو حاصل ہونے والے جنگی قیدیوں میں وہ خاتون بھی مل گئی، سیدنا عبدالرحمن بن ابی بکر رضی اللہ عنہ نے اس کے بارے میں سیدنا خالد رضی اللہ عنہ سے بات کی، تو انہوں نے سیدنا ابوبکر رضی اللہ عنہ کو اس سلسلے میں خط لکھا، جس پر سیدنا ابوبکر رضی اللہ عنہ نے جوابی خط لکھا کہ وہ خاتون انہیں (عبدالرحمن کو) دے دی جائے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6115]