سیدنا ابوہریرہ رضی اللہ عنہ بیان کرتے ہیں: ”طالبِ علم کے کپڑوں پر سیاہی کا دھبہ ایسا ہی ہے جیسے کنواری لڑکی کے سینے پر خوشبو کا نشان ہوتا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6292]

فضل بن حسن بن عمرو بن امیہ ضمری اپنے والد سے روایت کرتے ہیں، انہوں نے کہا: ”میں نے سیدنا ابوہریرہ رضی اللہ عنہ کے حوالے سے ایک حدیث بیان کی تو انہوں نے اس کا انکار کر دیا، میں نے کہا کہ میں نے یہ آپ ہی سے سنی ہے، انہوں نے فرمایا: ”اگر تم نے یہ مجھ سے سنی ہے تو وہ میرے پاس لکھی ہوئی ہوگی،“ پھر وہ میرا ہاتھ پکڑ کر اپنے گھر لے گئے اور مجھے رسول اللہ صلی اللہ علیہ وسلم کی احادیث پر مشتمل اپنی کتابوں میں سے کچھ کتابیں دکھائیں، پس انہیں وہ حدیث مل گئی، تو انہوں نے فرمایا: ”میں نے تمہیں بتا دیا تھا کہ اگر میں نے تمہیں یہ حدیث سنائی ہے تو وہ میرے پاس لکھی ہوئی موجود ہوگی۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6293]

محمد بن سیرین سے مروی ہے کہ سیدنا ابوہریرہ رضی اللہ عنہ نے فرمایا: ”جب تم حدیث میں یہ سنو کہ ”وہ کہا کرتے تھے“ تو اس سے مراد رسول اللہ صلی اللہ علیہ وسلم ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6294]