ابوانس مالک بن ابی عامر فرماتے ہیں: میں طلحہ بن عبداللہ کے پاس موجود تھا، ان کے پاس ایک آدمی آیا، اس نے کہا: اے ابومحمد! خدا کی قسم! میں نہیں جانتا کہ یہ یمانی شخص (یعنی سیدنا ابوہریرہ) رسول اللہ صلی اللہ علیہ وسلم کو زیادہ جانتا ہے یا تم لوگ زیادہ جانتے ہو؟ یہ رسول اللہ صلی اللہ علیہ وسلم کے حوالے سے ایسی ایسی باتیں کرتا ہے جو آپ صلی اللہ علیہ وسلم نے کی ہی نہیں۔ سیدنا طلحہ رضی اللہ عنہ نے کہا: خدا کی قسم ہمیں اس بارے میں کوئی شک نہیں ہے کہ اس نے رسول اللہ صلی اللہ علیہ وسلم کی وہ باتیں سنی ہیں جو ہم نے نہیں سنی اور یہ وہ کچھ جانتے ہیں جو ہم نہیں جانتے، ہم لوگ مالدار تھے، ہمارے اپنے گھر بار اور اہل و عیال ہوتے تھے ہم دن میں دو چار مرتبہ رسول اللہ صلی اللہ علیہ وسلم کی خدمت میں حاضری دے کر واپس چلے جاتے تھے، جبکہ ابوہریرہ رضی اللہ عنہ مسکین تھے، ان کے پاس کوئی مال و دولت نہیں تھا، نہ ان کے اہل و عیال تھے ان کا ہاتھ رسول اللہ صلی اللہ علیہ وسلم کے ہاتھ میں ہوتا تھا، حضور صلی اللہ علیہ وسلم جہاں جاتے، یہ آپ صلی اللہ علیہ وسلم کے ہمراہ ہوتے، اور اس بارے میں کوئی شک نہیں ہے کہ سیدنا ابوہریرہ رضی اللہ عنہ وہ کچھ جانتے ہیں جو ہم نہیں جانتے اور انہوں نے وہ کچھ سنا ہے جو ہم نے نہیں سنا۔ اور ہم میں سے کوئی شخص بھی ان پر یہ الزام نہیں لگا سکتا کہ انہوں نے رسول اللہ صلی اللہ علیہ وسلم کے حوالے سے کوئی بات ایسی کہی ہو جو درحقیقت نبی اکرم صلی اللہ علیہ وسلم نے نہیں کی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6296]

عاصم بن محمد اپنے والد کا یہ بیان نقل کرتے ہیں (وہ فرماتے ہیں کہ) میں نے سیدنا ابوہریرہ رضی اللہ عنہ کو دیکھا کہ وہ جمعہ کے دن نکلتے اور منبر کے دو ستونوں کو پکڑے ہوئے لوگوں کو رسول اللہ صلی اللہ علیہ وسلم کی حدیثیں سناتے رہے حتیٰ کہ جب امام کے نکلنے کے لئے دروازہ کھلنے کی آواز سنتے تو بیٹھ جاتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ (امام حاکم کہتے ہیں) میرا تو یہ خیال تھا آغاز سیدنا ابوہریرہ رضی اللہ عنہ کے فضائل سے ہونا چاہیے کیونکہ آپ کو رسول اللہ صلی اللہ علیہ وسلم کی بہت ساری حدیثیں یاد تھیں۔ اور صحابہ کرام رضوان اللہ علیہم اجمعین اور تابعین نے ان کے بارے میں اس بات کی گواہی بھی دی ہے، کیونکہ اول اسلام سے لے کر آج تک جس نے حدیث شریف کا علم حاصل کیا ہے، وہ سیدنا ابوہریرہ کی جماعت میں سے ہے اور انہی کے مذہب پر ہے۔ کیونکہ سیدنا ابوہریرہ رضی اللہ عنہ ہی سب سے پہلے حافظ الحدیث ہیں اور یہی اس نام کے سب سے زیادہ حقدار ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6297]

ابوبکر محمد بن اسحاق نے سیدنا ابوہریرہ رضی اللہ عنہ کا تذکرہ کیا اور فرمایا: اکثر صحابہ کرام نے ان سے حدیث پاک کی روایت لی ہے، ان کی جو روایات مشہور ہوئی ہیں۔ اور دیگر صحابہ کرام نے جو روایات بیان کی ہیں۔ جو صحیح احادیث کی بنیاد ہیں۔ ابوبکر کہتے ہیں: سیدنا ابوایوب انصاری رضی اللہ عنہ نے ان سے حدیث کی روایت لی ہے حالانکہ وہ خود عظیم المرتبت صحابی ہیں، رسول اللہ صلی اللہ علیہ وسلم مدینہ منورہ میں ان کے گھر ٹھہرے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6298]