ابن عائشہ سے روایت ہے کہ زیاد اعجم، سیدنا عبداللہ بن جعفر رضی اللہ عنہما کے پاس پانچ مقتولین کی دیت (خون بہا) کی ادائیگی میں مدد کے لیے حاضر ہوئے، تو آپ نے وہ رقم انہیں عطا فرما دی، جس پر شاعر نے یہ اشعار کہے: ”ہم نے ان سے بھاری رقم کا سوال کیا تو انہوں نے ذرا بھی تامل نہ کیا، اور ہماری تمنا و امید سے بڑھ کر عطا فرمایا، انہوں نے احسان کیا پھر احسان کیا اور جب ہم دوبارہ پلٹے تو پھر احسان فرمایا، میں جب بھی ان کے پاس دوبارہ گیا انہوں نے مسکراتے ہوئے میرا استقبال کیا اور (عزت افزائی کے لیے) تکیہ دہرا کیا۔“
امام حاکم فرماتے ہیں: امام بخاری اور امام مسلم اس بات پر متفق ہیں کہ سیدنا عبداللہ بن جعفر بن ابی طالب رضی اللہ عنہما نے دس سال کی عمر میں رسول اللہ صلی اللہ علیہ وسلم سے سماع کیا ہے، اور میں اللہ کے حکم سے اس مقام پر ان احادیث کو ان کی اسناد کے ساتھ ذکر کر رہا ہوں جن پر شیخین متفق ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6556]

اسماعیل بن عبداللہ بن جعفر اپنے والد سے روایت کرتے ہیں کہ انہوں نے فرمایا: میں نے نبی کریم صلی اللہ علیہ وسلم کو زعفران میں رنگے ہوئے دو کپڑوں، یعنی ایک چادر اور ایک عمامہ (پگڑی) میں ملبوس دیکھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6557]