سیدنا اسامہ بن زید رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”میرے اہل میں سے مجھے سب سے زیادہ محبوب وہ شخص ہے جس پر اللہ نے انعام کیا اور میں نے بھی انعام کیا، یعنی اسامہ۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6674]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے ارشاد فرمایا: ”اسامہ مجھے لوگوں میں سب سے زیادہ محبوب ہیں۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6675]

محمد بن سیرین سے روایت ہے کہ سیدنا عثمان بن عفان رضی اللہ عنہ کے دورِ خلافت میں ایک کھجور کے درخت کی قیمت ایک ہزار درہم تک پہنچ گئی تھی، اس دوران سیدنا اسامہ بن زید رضی اللہ عنہما نے ایک درخت کا قصد کیا، اسے چیرا اور اس کا گودا (جمار) نکال کر اپنی والدہ کو کھلایا، ان سے پوچھا گیا کہ آپ نے ایسا کیوں کیا جبکہ آپ دیکھ رہے ہیں کہ ایک درخت کی قیمت ایک ہزار درہم تک پہنچ چکی ہے؟ انہوں نے جواب دیا: ”میری والدہ نے مجھ سے اس کا تقاضا کیا تھا، اور وہ مجھ سے ایسی کسی بھی چیز کا سوال نہیں کرتیں جس پر میں قدرت رکھتا ہوں مگر میں وہ انہیں عطا کر دیتا ہوں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6676]

ابو بکر بن شعیب بن حبحاب سے روایت ہے، انہوں نے کہا کہ میں نے اپنے اساتذہ کو یہ کہتے ہوئے سنا کہ سیدنا اسامہ بن زید رضی اللہ عنہما کی انگوٹھی کے نگینے پر یہ نقش تھا: «حِبُّ رسول الله صلی اللہ علیہ وسلم » ۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6677]

امام زہری سے روایت ہے کہ سیدنا اسامہ بن زید رضی اللہ عنہما کو وفات تک ”امیر“ کہہ کر مخاطب کیا جاتا رہا، لوگ کہتے تھے کہ انہیں رسول اللہ صلی اللہ علیہ وسلم نے (لشکر کا امیر بنا کر) روانہ فرمایا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6678]

سیدنا ابن عباس رضی اللہ عنہما سیدنا اسامہ بن زید رضی اللہ عنہ سے روایت کرتے ہیں، انہوں نے کہا: میں عرفات کے موقع پر نبی کریم صلی اللہ علیہ وسلم کے پیچھے سواری پر ردیف (پیچھے بیٹھنے والا) بن کر سوار تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6679]