سیدنا خلاد بن سائب فرماتے ہیں: میں سیدنا اسامہ بن زید رضی اللہ عنہ کے پاس گیا، انہوں نے میرے منہ پر میری تعریف کی، اور فرمایا: میں تمہاری تعریف تمہارے منہ پر اس لئے کر رہا ہوں کہ میں نے رسول اللہ صلی اللہ علیہ وسلم کو فرماتے ہوئے سنا ہے کہ جب مومن کے سامنے اس کی تعریف کی جائے تو اس کے دل کے اندر ایمان میں اضافہ ہوتا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6680]

ابراہیم بن اسحاق حربی کہتے ہیں: رسول اللہ صلی اللہ علیہ وسلم کے آزاد کردہ غلام سیدنا ابورافع، سیدنا عباس بن عبدالمطلب کے غلام تھے، جب سیدنا عباس رضی اللہ عنہ اسلام لائے تو انہوں نے یہ غلام رسول اللہ صلی اللہ علیہ وسلم کو تحفہ میں دے دیا، ان کا اصل نام ” اسلم “ ہے۔ بعض مؤرخین کا کہنا ہے کہ ان کا نام ” ابراہیم “ ہے۔ آپ جنگ بدر سے پہلے اسلام لائے تھے، لیکن سیدنا عباس رضی اللہ عنہ کے ہمراہ مکہ شریف میں ہی مقیم تھے، سیدنا عثمان کی شہادت کے بعد سن 35 ہجری میں ان کا انتقال ہوا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6681]

سیدنا ابورافع رضی اللہ عنہ فرماتے ہیں: نبی اکرم صلی اللہ علیہ وسلم نے سیدنا علی رضی اللہ عنہ کو یمن کی جانب روانہ فرمایا اور علم بھی ان کو عطا فرمایا۔ جب آپ روانہ ہوئے تو (مجھے) فرمایا: اے ابورافع! اس کے ساتھ شامل ہو جا اور اس کو چھوڑ کر الگ نہ ہونا، اسی کے ساتھ رہنا، ادھر ادھر متوجہ نہیں ہونا، یہاں تک کہ میں ان کے پاس آ جاؤں، پھر حضور صلی اللہ علیہ وسلم سیدنا علی رضی اللہ عنہ کے پاس تشریف لائے اور ان کو بھی کچھ نصیحتیں فرمائیں، پھر فرمایا: اے علی! تمہارے ذریعے اللہ تعالیٰ کسی شخص کو ہدایت عطا فرما دے، یہ تیرے لئے دنیا و مافیہا سے بہتر ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6682]