سیدنا برہ بن ابی تجراۃ فرماتی ہیں جب اللہ تعالیٰ نے اپنے محبوب صلی اللہ علیہ وسلم کو عزت و تکریم کا تاج پہنایا، اور آپ صلی اللہ علیہ وسلم کی نبوت کے ابتدائی ایام تھے، آپ جب قضائے حاجت کے لئے نکلتے تو بہت دور تک چلے جاتے، اتنے دور جاتے کہ جہاں کسی انسان کی نظر نہ پڑتی ہو، آپ پہاڑوں کی گھاٹیوں میں وادیوں کی گہرایوں میں قضائے حاجت فرماتے تھے، آپ کسی بھی درخت یا پتھر کے قریب سے گزرتے تو ان پتھروں اور درختوں سے آواز آتی: السلام علیک یا رسول اللہ۔ آپ اپنے دائیں بائیں اور پیچھے مڑ کر دیکھتے تو کوئی انسان نظر نہ آتا (مطلب یہ کہ وہی درخت اور پتھر آپ صلی اللہ علیہ وسلم کی ذات اقدس پر سلام پڑھتے تھے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7119]

سیدنا حبیبہ بنت تجراۃ فرماتی ہیں: زمانہ جاہلیت میں ہمارا ایک چبوترا ہوتا تھا میں نے اس کے روشن دان سے جھانک کر صفا اور فروہ کے درمیان دیکھا تو مجھے رسول اللہ صلی اللہ علیہ وسلم دکھائی دیئے، آپ صلی اللہ علیہ وسلم اس وقت سعی کر رہے تھے اور اپنے صحابہ کرام سے فرما رہے تھے، سعی کرو کیونکہ اللہ تعالیٰ نے تم پر سعی فرض کی ہے۔ آپ فرماتی ہیں: میں نے حضور صلی اللہ علیہ وسلم کو دیکھا کہ سعی کی شدت کی وجہ سے آپ نے اپنا ازار اپنے پیٹ کے گرد باندھ لیا تھا حتیٰ کہ میں نے آپ صلی اللہ علیہ وسلم کی بغلوں کی اور رانوں کی سفیدی دیکھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7120]