ام المومنین سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم نے ارشاد فرمایا: چھ آدمی ایسے ہیں جن پر میری لعنت ہے، اللہ تعالیٰ کی لعنت ہے اور ہر نبی کی لعنت ہے (اور ہر نبی کی دعا بھی قبول ہوتی ہے) * اللہ تعالیٰ کی تقدیر کو جھٹلانے والا۔ * کتاب اللہ میں (اپنی طرف سے) اضافہ کرنے والا۔ * عوام پر زبردستی مسلط ہونے والا ظالم حکمران جو کہ ان لوگوں کو ذلیل کرے جن کو اللہ تعالیٰ نے عزت دی ہے اور ان لوگوں کو عزت دے جو اللہ تعالیٰ کی بارگاہ میں ذلیل ہیں۔ * اللہ تعالیٰ کی حرام کردہ چیزوں کو حلال سمجھنے والا۔ * میری آل کا بے ادب۔ * میری سنت کا تارک (یعنی جو شخص سنت کو حقیر جانتے ہوئے اس کو چھوڑے) ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7187]

سیدنا عبداللہ بن بریدہ اپنے والد کا یہ بیان نقل کرتے ہیں کہ نبی اکرم صلی اللہ علیہ وسلم نے ارشاد فرمایا: قاضی تین طرح کے ہوتے ہیں، ان میں سے دو قسم کے قاضی دوزخی ہیں اور ایک جنتی۔ * ایسا قاضی جس نے حقیقت حال کو جانا اور اس کے مطابق انصاف پر مبنی فیصلہ کیا۔ یہ قاضی جنتی ہے۔ * ایسا قاضی جو حقیقت حال کو جانتا ہے اور جان بوجھ کر غلط فیصلہ کرتا ہے۔ یہ قاضی دوزخی ہے۔ * ایسا قاضی جو بے حقیقت حال جانے بغیر فیصلہ کرتا ہے۔ یہ قاضی بھی دوزخی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کی ایک شاہد حدیث بھی موجود ہے اور وہ امام مسلم رحمۃ اللہ علیہ کے معیار کے مطابق صحیح ہے۔ (وہ حدیث درج ذیل ہے) [المستدرك على الصحيحين/كِتَابُ الْأَحْكَامِ/حدیث: 7188]

سیدنا بریدہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: دو قاضی دوزخی ہیں اور ایک قاضی جنتی ہے۔ ایسا قاضی جو حق کے مطابق فیصلہ کرتا ہے وہ جنتی ہے۔ اور ایسا قاضی جو ناانصافی کرتا ہے، وہ دوزخی ہے اور ایسا قاضی جو جہالت میں فیصلہ کرتا ہے وہ بھی دوزخی ہے۔ صحابہ کرام رضی اللہ عنہم نے پوچھا: یہ قاضی جو جہالت میں فیصلہ کرتا ہے، اس کا کیا قصور ہے؟ تو آپ صلی اللہ علیہ وسلم نے فرمایا: اس کا گناہ یہ ہے کہ جب اس کو قضاء کا علم ہی نہیں تھا تو وہ قاضی کیوں بنا؟ [المستدرك على الصحيحين/كِتَابُ الْأَحْكَامِ/حدیث: 7189]

سیدنا ام معقل اپنے والد کا یہ بیان نقل کرتی ہیں کہ رسول اللہ صلی اللہ علیہ وسلم نے ارشاد فرمایا: جس شخص کو اس امت کے چھوٹے یا بڑے کسی بھی کام کا ذمہ دار بنایا جائے اور وہ اس میں انصاف نہ کرے، اللہ تعالیٰ اس کو اوندھے منہ دوزخ میں ڈالے گا۔ ٭٭ یہ ام معقل، سیدنا معقل بن سنان اشجعی رضی اللہ عنہ کی بیٹی ہیں۔ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7190]

یزید بن شریک کہتے ہیں: سیدنا ضحاک بن قیس نے ان کو ایک جوڑا دے کر مروان بن حکم کے پاس بھیجا، مروان نے دربان سے کہا: دیکھو، دروازے پر کون ہے؟ اس نے کہا: ابوہریرہ، مروان نے اجازت دے دی اور کہا: اے ابوہریرہ! ہمیں کوئی ایسی بات سنایئے جو آپ نے خود رسول اللہ صلی اللہ علیہ وسلم سے سنی ہو۔ سیدنا ابوہریرہ رضی اللہ عنہ نے کہا: میں نے رسول اللہ صلی اللہ علیہ وسلم کو فرماتے ہوئے سنا ہے کہ آدمی یہ تمنا کرے گا ” مجھے آسمان سے زمین پر گرا دیا جاتا لیکن مجھے لوگوں کے کسی کام کا ذمہ دار نہ بنایا جاتا “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْأَحْكَامِ/حدیث: 7191]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: ہلاکت ہے امراء کے لئے، ہلاکت ہے نجومیوں کے لئے، ہلاکت ہے امانت رکھنے والوں کے لئے۔ [المستدرك على الصحيحين/كِتَابُ الْأَحْكَامِ/حدیث: 7192]