سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تمہاری کھجوروں میں سب سے اچھی ” برنی “ کھجور ہے، یہ بیماری کو ختم کر دیتی ہے اور اس میں کوئی نقصان نہیں ہے۔ [المستدرك على الصحيحين/كِتَابُ الطِّبِّ/حدیث: 7639]

ام منذر انصاریہ رضی اللہ عنہا کی خالہ ہیں، آپ فرماتی ہیں: رسول اللہ صلی اللہ علیہ وسلم میرے پاس تشریف لائے، آپ کے ہمراہ سیدنا علی رضی اللہ عنہ بھی تھے، سیدنا علی رضی اللہ عنہ مرض کی وجہ سے بہت کمزور ہو چکے تھے۔ گھر میں انگوروں کا ایک گچھا لٹکا ہوا تھا۔ نبی اکرم صلی اللہ علیہ وسلم کھڑے ہوئے اور اس میں سے کچھ لیا، پھر سیدنا علی رضی اللہ عنہ اس میں سے لینے کے لئے کھڑے ہوئے، لیکن رسول اللہ صلی اللہ علیہ وسلم نے فرمایا: اس کو رہنے دو، کیونکہ یہ تجھے موافق نہیں آئے گا۔ تم کمزور ہو چکے ہو۔ میں اٹھی اور جو اور چقندر پکا کر رسول اللہ صلی اللہ علیہ وسلم کی خدمت میں پیش کر دئیے، رسول اللہ صلی اللہ علیہ وسلم نے فرمایا: اے علی! اس کو کھاؤ، یہ تیرے موافق ہے۔ ٭٭ اس حدیث کو زید بن حباب نے فلیح بن سلیمان کے حوالے سے بیان کیا ہے اور انہوں نے اس خاتون کا نام ” ام مبشر “ بیان کیا ہے۔ [المستدرك على الصحيحين/كِتَابُ الطِّبِّ/حدیث: 7640]

ام مبشر انصاریہ رضی اللہ عنہا نبی اکرم صلی اللہ علیہ وسلم کی خالہ ہیں، آپ فرماتی ہیں: رسول اللہ صلی اللہ علیہ وسلم میرے پاس تشریف لائے، حضور صلی اللہ علیہ وسلم کے ہمراہ سیدنا علی رضی اللہ عنہ بھی تھے، سیدنا علی رضی اللہ عنہ بیماری کی وجہ سے بہت کمزور ہو چکے تھے۔ اس کے بعد سابقہ حدیث کی طرح حدیث بیان کی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الطِّبِّ/حدیث: 7641]