سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تمہارے رب عزوجل نے فرمایا: اگر میرے بندے میری اطاعت کرتے تو میں انہیں رات کے وقت بارش عطا کرتا اور دن کے وقت ان پر سورج طلوع فرماتا اور انہیں بجلی کے کڑکنے کی آواز نہ سنواتا۔“ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7849]

رسول اللہ صلی اللہ علیہ وسلم نے فرمایا: ”اللہ کے ساتھ اچھا گمان رکھنا بہترین عبادت میں سے ہے۔“ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7849M]

رسول اللہ صلی اللہ علیہ وسلم نے فرمایا: ”اپنے ایمان کی تجدید کرتے رہا کرو“ عرض کیا گیا: اے اللہ کے رسول صلی اللہ علیہ وسلم ! ہم اپنے ایمان کی تجدید کیسے کریں؟ آپ صلی اللہ علیہ وسلم نے فرمایا: ” «لَا إِلٰهَ إِلَّا اللهُ» کثرت سے کہا کرو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7850]

سیدنا عقبہ بن عامر رضی اللہ عنہ سے روایت ہے کہ ایک شخص رسول اللہ صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول صلی اللہ علیہ وسلم ! ہم میں سے کوئی گناہ کر بیٹھتا ہے، آپ صلی اللہ علیہ وسلم نے فرمایا: ”وہ اس کے نامہ اعمال میں لکھ دیا جاتا ہے“ اس نے عرض کیا: پھر وہ اس سے مغفرت مانگتا اور توبہ کرتا ہے، آپ صلی اللہ علیہ وسلم نے فرمایا: ”اسے معاف کر دیا جاتا ہے اور اس کی توبہ قبول کر لی جاتی ہے“ اس نے عرض کیا: وہ دوبارہ گناہ کر بیٹھتا ہے، آپ صلی اللہ علیہ وسلم نے فرمایا: ”وہ (دوبارہ) لکھ دیا جاتا ہے، اور اللہ تعالیٰ (معاف کرنے سے) نہیں اکتاتا یہاں تک کہ تم خود (توبہ کرنے سے) اکتا جاؤ۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّوْبَةِ وَالْإِنَابَةِ/حدیث: 7851]