سیدنا عبداللہ بن عباس رضی اللہ عنہما فرماتے ہیں: فرائض میں سب سے پہلے عول سیدنا عمر رضی اللہ عنہ نے کیا تھا، اللہ کی قسم! اگر قرآن کے مقدم کردہ کو مقدم رکھتے اور قرآن کے موخر کردہ کو موخر رکھتے تو کسی فرض حصہ میں عول کی ضرورت نہ پڑتی، آپ سے پوچھا گیا: کونسے فرائض کو اللہ نے مقدم رکھا ہے اور کونسے فرائض کو موخر رکھا ہے؟ سیدنا عبداللہ بن عباس رضی اللہ عنہما فرمایا: اللہ تعالیٰ اگر کسی فرض حصے کو اتارتا ہے تو کسی فریضہ ہی کی جانب اتارتا ہے، یہ ہے جن کو اللہ تعالیٰ نے مقدم کیا ہے، اور ہر وہ فرض حصہ جب اپنے فرض سے زائل ہوتا ہے تو ایسی صورت میں اس کو صرف باقی ماندہ ہی ملے گا، یہ وہ فرائض ہیں جن کو اللہ تعالیٰ نے موخر کیا ہے جیسا کہ شوہر، بیوی اور ماں۔ اور جن کو موخر کیا ہے، وہ جیسے بہنیں اور بیٹیاں، جب اللہ تعالیٰ کے مقدم کردہ اور موخر کردہ سب جمع ہوں تو ان میں مقدمین سے ابتداء کی جائے، اگر ان سے کچھ بچ جائے تو وہ موخرین کے لیے ہو گا۔ اور اگر کچھ بھی نہ بچے تو یہ محروم رہیں گے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8184]

سیدنا واثلہ بن اسقع رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: ایک عورت وراثت کے تین حصے جمع کر لیتی ہے، اپنے آزاد کردہ کا، اپنے لقیط کا اور ایسے بچے کا (جس کے بارے میں بچے کی ماں کے شوہر نے اپنا نسب ہونے کا انکار کیا ہو، اس پر لعان کیا گیا ہو، اس عورت کا شوہر اس بچے کی وراثت سے محروم ہو جاتا ہے جبکہ اس کی ماں اس کی وارث بنتی ہے) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفَرَائِضِ/حدیث: 8185]

سیدنا عبداللہ بن مسعود رضی اللہ عنہ نے ملاعنہ کے بچے کی وراثت کے بارے میں فرمایا: اس کی تمام میراث اس کی ماں کے لیے ہے۔ ٭٭ اس حدیث کے تمام راوی ثقہ ہیں۔ یہ مرسل ہے۔ اور اس کی ایک شاہد حدیث بھی موجود ہے۔ [المستدرك على الصحيحين/كِتَابُ الْفَرَائِضِ/حدیث: 8186]

ایک شامی آدمی سے روایت ہے کہ رسول اللہ صلی اللہ علیہ وسلم نے ملاعنہ کے بچے کے بارے میں فرمایا: اس کا عصبہ اس کی ” ماں “ ہے۔ [المستدرك على الصحيحين/كِتَابُ الْفَرَائِضِ/حدیث: 8187]