سیدنا عبداللہ بن عمرو رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: مسلمان کافر کا اور کافر مسلمان کا وارث نہیں بن سکتا۔ [المستدرك على الصحيحين/كِتَابُ الْفَرَائِضِ/حدیث: 8207]

جعفر بن محمد اپنے والد کا یہ بیان نقل کرتے ہیں کہ ام کلثوم بنت علی رضی اللہ عنہا اور ان کے بیٹے زید بن عمر بن خطاب کا ایک ہی دن انتقال ہوا تھا اور یہ بھی معلوم نہیں تھا کہ ان میں سے پہلے کس کا انتقال ہوا، تو ان میں سے کسی کو بھی دوسرے کا وارث نہیں قرار دیا گیا۔ اور جنگ صفین میں مارے جانے والوں کو بھی ایک دوسرے کا وارث نہیں بنایا گیا تھا اور اہل حرہ کو بھی ایک دوسرے کا وارث نہیں بنایا گیا تھا۔ ٭٭ اس حدیث کی اسناد صحیح ہے، اور اس سے کئی فوائد ملے، ان میں سے ایک یہ بھی کہ ام کلثوم کے پیٹ سے سیدنا عمر کا ایک بیٹا پیدا ہوا تھا، اور دوسرے فائدہ کے لیے اس کی شاہد حدیث بھی موجود ہے۔ [المستدرك على الصحيحين/كِتَابُ الْفَرَائِضِ/حدیث: 8208]

سیدنا عبداللہ بن عباس رضی اللہ عنہما کے بارے میں مروی ہے کہ جن فوت شدگان کے بارے میں یہ علم نہ ہو کہ ان میں سے کون پہلے اور کون بعد میں فوت ہوا ہے، آپ رضی اللہ عنہ ان میں سے کسی کو دوسرے کا وارث قرار نہیں دیا کرتے تھے۔ [المستدرك على الصحيحين/كِتَابُ الْفَرَائِضِ/حدیث: 8209]

سیدنا عبداللہ بن عباس رضی اللہ عنہما فرماتے ہیں: یہ آیت وَالَّذِينَ عَقَدَتْ أَيْمَانُكُمْ فَآتُوهُمْ نَصِيبَهُمْ (النساء: 33) ” اور وہ جن سے تمہارا حلف بندھ چکا، انہیں ان کا حصہ دو “ اس آیت کے نزول کے بعد ایک آدمی دوسرے کا رشتہ دار نہیں ہوتا تھا لیکن یہ ایک دوسرے کے وارث بننے کے لیے آپس میں قسم اٹھا لیتے تھے، اس عمل کو اللہ تعالیٰ نے وَأُولُو الْأَرْحَامِ بَعْضُهُمْ أَوْلَى بِبَعْضٍ فِي كِتَابِ اللَّه (الأحزاب: 6) ” اور رشتہ والے اللہ کی کتاب میں ایک دوسرے سے زیادہ قریب ہیں “ اس آیت کے ساتھ منسوخ کیا۔ [المستدرك على الصحيحين/كِتَابُ الْفَرَائِضِ/حدیث: 8210]