سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”اللہ کی لعنت ہو اس پر جس نے غیر اللہ کے نام پر ذبح کیا، اللہ کی لعنت ہو اس پر جس نے زمین کی حدود (نشانات) کو تبدیل کیا، اللہ کی لعنت ہو اس پر جس نے کسی اندھے کو راستے سے بھٹکا دیا، اللہ کی لعنت ہو اس پر جس نے اپنے والد کو گالی دی، اللہ کی لعنت ہو اس پر جس نے اپنے مربی و محسن (آزاد کرنے والے) کے بجائے دوسروں سے وفاداری کا رشتہ جوڑا، اور اللہ کی لعنت ہو اس پر جس نے قومِ لوط والا عمل کیا۔“ [المستدرك على الصحيحين/كِتَابُ الْحُدُودِ/حدیث: 8250]

سیدنا عبداللہ بن عباس رضی اللہ عنہما سے ہی مروی ہے کہ نبی کریم صلی اللہ علیہ وسلم نے (پچھلی روایت والے کلمات کے ساتھ) یہ اضافہ بھی فرمایا: ”اللہ کی لعنت ہو اس پر جس نے کسی جانور کے ساتھ بدفعلی کی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ الْحُدُودِ/حدیث: 8251]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ نے اپنی مخلوق میں سے سات قسم کے لوگوں پر لعنت فرمائی ہے“، رسول اللہ صلی اللہ علیہ وسلم نے ان میں سے ہر ایک پر تین تین مرتبہ (لعنت) دہرائی، پھر فرمایا: ”ملعون ہے، ملعون ہے، ملعون ہے وہ شخص جس نے قومِ لوط والا عمل کیا، ملعون ہے وہ شخص جس نے (نکاح میں) عورت اور اس کی بیٹی کو جمع کیا، ملعون ہے وہ شخص جس نے اپنے والدین میں سے کسی کو گالی دی، ملعون ہے وہ شخص جس نے کسی جانور کے ساتھ بدکاری کی، ملعون ہے وہ شخص جس نے زمین کی حدود بدل ڈالیں، ملعون ہے وہ شخص جس نے غیر اللہ کے لیے ذبح کیا، اور ملعون ہے وہ شخص جس نے اپنے آقاؤں (محسنوں) کے بجائے کسی اور کو اپنا سرپرست بنایا۔“ [المستدرك على الصحيحين/كِتَابُ الْحُدُودِ/حدیث: 8252]