سعد بن سنان بیان کرتے ہیں کہ سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم میرے لیے 6 چیزوں کو قبول کر لو، میں تمہارے لیے جنت کو قبول کرتا ہوں۔ صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم وہ چھ چیزیں کیا ہیں؟ آپ صلی اللہ علیہ وسلم نے فرمایا: ٭ جب کوئی بات کرے تو جھوٹ نہ بولے۔ ٭ جب وعدہ کرے تو وعدہ خلافی نہ کرے۔ ٭ جب اس کے پاس امانت رکھی جائے تو اس میں خیانت نہ کرے۔ ٭ اپنی نگاہوں کو جھکا کر رکھو۔ ٭ اپنے ہاتھوں کو (ظلم سے) روک کر رکھو۔ ٭ اپنی شرمگاہوں کی حفاظت کرو۔ [المستدرك على الصحيحين/كِتَابُ الْحُدُودِ/حدیث: 8266]

سیدنا زر فرماتے ہیں: سیدنا ابی بن کعب رضی اللہ عنہ سورہ احزاب پڑھ رہے تھے، میں نے کہا: اس کی 73 آیات ہیں، انہوں نے فرمایا: صرف؟ میں نے کہا: صرف۔ آپ نے فرمایا: میں نے دیکھا ہے، یہ سورت تو سورہ بقرہ کے برابر ہے، اور ہم اس کی آیات جو پڑھا کرتے تھے ان میں یہ بھی تھی: الشَّيْخُ وَالشَّيْخَةُ إِذَا زَنَيَا فَارْجُمُوهُمَا الْبَتَّةَ نَكَالًا مِنَ اللَّهِ وَاللَّهُ عَزِيزٌ حَكِيمٌ ” شادی شدہ مرد اور شادی شدہ عورت جب زنا کریں تو ان دونوں کا لازمی طور پر رجم کر دو، یہ اللہ تعالیٰ کی طرف سے سزا ہے۔ اور اللہ تعالیٰ غالب حکمت والا ہے “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8267]

سیدنا عکرمہ رضی اللہ عنہ سے مروی ہے کہ سیدنا عبداللہ بن عباس رضی اللہ عنہما نے فرمایا: جس نے رجم کا انکار کیا، اس نے لاشعوری طور پر قرآن کریم کا انکار کیا، اللہ تعالیٰ نے فرمایا ہے: يَاأَهْلَ الْكِتَابِ قَدْ جَاءَكُمْ رَسُولُنَا يُبَيِّنُ لَكُمْ كَثِيرًا مِمَّا كُنْتُمْ تُخْفُونَ مِنَ الْكِتَابِ (المائدة: 15) ” اے کتاب والو، بے شک تمہارے پاس ہمارے یہ رسول تشریف لائے کہ تم پر ظاہر فرماتے ہیں بہت سی وہ چیزیں جو تم نے کتاب میں چھپا ڈالی تھیں “ اور رجم بھی ان چیزوں میں سے ہے جن کو وہ لوگ چھپاتے تھے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8268]

ابوامامہ بن سہل بن حنیف اپنی خالہ کا بیان نقل کرتے ہیں (وہ فرماتی ہیں) رسول اللہ صلی اللہ علیہ وسلم نے ہمیں آیت رجم پڑھائی، وہ یہ تھی: الشَّيْخُ وَالشَّيْخَةُ إِذَا زَنَيَا فَارْجُمُوهُمَا الْبَتَّةَ بِمَا قَضَيَا مِنَ اللَّذَّةِ [المستدرك على الصحيحين/كِتَابُ الْحُدُودِ/حدیث: 8269]

کثیر بن صلت فرماتے ہیں: سیدنا ابن العاص رضی اللہ عنہ اور سیدنا زید بن ثابت رضی اللہ عنہ مصاحف لکھا کرتے تھے، یہ دونوں اس آیت تک پہنچے تو سیدنا زید رضی اللہ عنہ نے کہا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ الشَّيْخُ وَالشَّيْخَةُ إِذَا زَنَيَا فَارْجُمُوهُمَا الْبَتَّةَ ” شادی شدہ مرد اور شادی شدہ عورت جب زنا کریں تو ان کو لازمی رجم کر دو “ سیدنا عمرو رضی اللہ عنہ نے کہا: جب یہ آیت نازل ہوئی تو میں نبی اکرم صلی اللہ علیہ وسلم کی بارگاہ میں حاضر ہوا، میں نے پوچھا: یا رسول اللہ صلی اللہ علیہ وسلم کیا میں اس آیت کو لکھ لوں؟ مجھے یوں لگا کہ حضور صلی اللہ علیہ وسلم کو میرا یہ سوال کرنا اچھا نہیں لگا، سیدنا عمرو رضی اللہ عنہ نے کہا: تم یہ دیکھتے نہیں کہ جب بوڑھا آدمی محصن (شادی شدہ) ہو اور وہ زنا کرے تو اس کو کوڑے بھی مارے جاتے ہیں اور اسے رجم بھی کیا جائے گا، اور اگر وہ شادی شدہ نہ ہو تو اس کو صرف کوڑے مارے جائیں گے، اور نوجوان جب زنا کرے اور وہ محصن (شادی شدہ) بھی ہو تو اس کو رجم کیا جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8270]