سیدنا حسن فرماتے ہیں: کوفہ کے امراء میں سے ایک امیر نے ایک جادوگر کو بلایا، وہ لوگوں کے سامنے (جادو کے کھیل) کھیلا کرتا تھا، اس بات کی خبر سیدنا جندب تک پہنچ گئی، آپ اپنی تلوار لے کر آئے، اور اس جادوگر کو مار دیا، لوگوں میں بھگدڑ مچ گئی، آپ نے فرمایا: اے لوگو! تم مت گھبراؤ، میں تو اس جادوگر کو مارنا چاہتا ہوں۔ اس امیر نے ان کو گرفتار کروا لیا، اس بات کی اطلاع سلمان تک پہنچی، آپ نے فرمایا: تم دونوں نے ہی غلطی کی ہے۔ اس امیر کے پیچھے لوگ نمازیں پڑھتے ہیں، اس کی پیروی کرتے ہیں، اس کو نہیں چاہیے تھا کہ یہ کسی جادوگر کو بلاتا اور وہ لوگوں کے سامنے کرتب کرتا۔ اور اس کو بھی ایسا نہیں کرنا چاہیے تھا کہ اس نے اپنے امیر پر تلوار اٹھائی۔ [المستدرك على الصحيحين/كِتَابُ الْحُدُودِ/حدیث: 8274]

سیدنا عبداللہ بن عباس رضی اللہ عنہما فرماتے ہیں کہ نبی اکرم صلی اللہ علیہ وسلم نے سیدنا ماعز بن مالک رضی اللہ عنہ سے فرمایا: تو ہلاک ہو جائے، ہو سکتا ہے تو نے صرف بوسہ لیا ہو، یا صرف چھوا ہو، یا صرف چٹکی کاٹی ہو، یا صرف دیکھا ہو۔ انہوں نے کہا: نہیں۔ حضور صلی اللہ علیہ وسلم نے فرمایا: کیا تم نے (زنا) کیا ہے؟ انہوں نے کہا: جی ہاں۔ اس کے بعد حضور صلی اللہ علیہ وسلم نے ان کے رجم کا حکم دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اسی حدیث کو حکم بن ابان نے عکرمہ سے روایت کیا ہے اور اس روایت میں الفاظ کچھ زائد ہیں۔ [المستدرك على الصحيحين/كِتَابُ الْحُدُودِ/حدیث: 8275]