یزید بن نعیم اپنے والد کا یہ بیان نقل کرتے ہیں کہ سیدنا ماعز رضی اللہ عنہ رسول اللہ صلی اللہ علیہ وسلم کی خدمت میں آئے، اور عرض کی: یا رسول اللہ صلی اللہ علیہ وسلم مجھ سے زنا سرزد ہو گیا ہے، آپ میرے بارے میں کتاب اللہ کے مطابق فیصلہ فرمائیں۔ حضور صلی اللہ علیہ وسلم نے ان سے اعراض فرما لیا، وہ چار مرتبہ آئے اور یہی عرض کی: تب حضور صلی اللہ علیہ وسلم نے فرمایا: اس کو لے جاؤ اور رجم کر دو۔ پتھروں کے زخموں کی تاب نہ لا کر آپ بھاگ کھڑے ہوئے، سیدنا عبداللہ بن انیس ان کے پیچھے بھاگے، اور ان کو گدھے کی ایک ہڈی ماری جس کی وجہ سے وہ گر گئے، لوگوں نے ان کو مارنا شروع کیا حتیٰ کہ آپ ہلاک ہو گئے، نبی اکرم صلی اللہ علیہ وسلم کی بارگاہ میں ان کے بھاگنے کا ذکر ہوا، آپ صلی اللہ علیہ وسلم نے فرمایا: تم نے اس کو چھوڑ کیوں نہیں دیا، شاید کہ وہ توبہ کر لیتا اور اللہ تعالیٰ اس کی توبہ قبول کر لیتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8281]

سیدنا عبداللہ بن بریدہ اپنے والد کا بیان نقل کرتے ہیں کہ قبیلہ غامد کی ایک خاتون نبی اکرم صلی اللہ علیہ وسلم کی بارگاہ میں آئی، اور کہنے لگی کہ میں گناہ کی مرتکب ہوئی ہوں، حضور صلی اللہ علیہ وسلم نے اس کو واپس بھیج دیا، وہ چلی گئی، اور (کچھ دنوں بعد) دوبارہ آئی اور کہنے لگی: آپ کو میرے ساتھ وہی سلوک کرنا چاہیے جو آپ نے ماعز بن مالک رضی اللہ عنہ کے ساتھ کیا تھا، اللہ کی قسم! میں حاملہ ہوں، حضور صلی اللہ علیہ وسلم نے فرمایا: تو واپس چلی جا اور بچہ پیدا ہونے کے بعد آنا، (وہ چلی گئی اور بچہ پیدا ہونے کے بعد) دوبارہ آئی، اور ایک کپڑے میں بچے کو بھی لپیٹ کر ساتھ لائی اور کہنے لگی: میرا بچہ پیدا ہو گیا ہے اب آپ مجھے پاک فرما دیجئے، آپ صلی اللہ علیہ وسلم نے فرمایا: ابھی واپس چلی جاؤ، اس کو دودھ پلاؤ، وہ چلی گئی، اور پھر آئی تو اس بچے کے ہاتھ میں روٹی کا ٹکڑا تھا، اس نے کہا: یا رسول اللہ صلی اللہ علیہ وسلم میں نے اس کو دودھ پلا دیا ہے، تب حضور صلی اللہ علیہ وسلم نے اس کے رجم کا حکم دیا۔ ٭٭ اس حدیث کو ابراہیم بن میمون الصائغ نے ابوالزبیر کے واسطے سے سیدنا جابر رضی اللہ عنہ سے روایت کیا ہے۔ (جیسا کہ درج ذیل ہے) [المستدرك على الصحيحين/كِتَابُ الْحُدُودِ/حدیث: 8282]

ابراہیم الصائغ سے مروی ہے کہ ابوالزبیر نے سیدنا جابر کا یہ بیان نقل کیا ہے کہ ایک عورت نبی اکرم صلی اللہ علیہ وسلم کی بارگاہ میں آئی اور کہنے لگی: میں نے زنا کروایا ہے، آپ مرے اوپر حد قائم فرما دیجئے، حضور صلی اللہ علیہ وسلم نے فرمایا: تو واپس چلی جا اور جو کچھ تیرے پیٹ میں ہے اس کو پیدا کر، جب اس کا بچہ پیدا ہو گیا تو وہ دوبارہ آئی اور کہنے لگی: میں نے زنا کروایا ہے، آپ مجھ پر حد نافذ فرما دیجئے، حضور صلی اللہ علیہ وسلم نے فرمایا: تو واپس جا اور اس کو دودھ پلا، وہ واپس چلی گئی، جب بچے کے دودھ پینے کا زمانہ گزر گیا تو وہ پھر آئی اور کہنے لگی: یا رسول اللہ صلی اللہ علیہ وسلم میں نے زنا کروایا ہے، آپ میرے اوپر حد نافذ فرما دیجئے، آپ صلی اللہ علیہ وسلم نے فرمایا: کوئی ایسا آدمی پیش کرو جو اس بچے کی ذمہ داری اٹھائے، ایک آدمی نے کہا: اس کے بچے کی ذمہ داری میں اٹھاتا ہوں۔ تب حضور صلی اللہ علیہ وسلم نے اس کو رجم کروا دیا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8283]

یعقوب بن یزید بن طلحہ تیمی اپنے والد کا یہ بیان نقل کرتے ہیں کہ ایک عورت رسول اللہ صلی اللہ علیہ وسلم کی بارگاہ میں حاضر ہوئی اور کہنے لگی: میں نے زنا کروایا ہے، اور میں اس زنا کی وجہ سے حاملہ بھی ہوں۔ رسول اللہ صلی اللہ علیہ وسلم نے اس سے فرمایا: تو بچہ پیدا ہونے تک واپس چلی جا، وہ واپس چلی گئی، جب بچہ پیدا ہو گیا تو وہ دوبارہ آئی، حضور صلی اللہ علیہ وسلم نے اس کو یہ کہہ کر پھر واپس بھیج دیا کہ تم جا کر اس کو دودھ پلاؤ، جب وہ دودھ پلا چکی تو پھر آ گئی، حضور صلی اللہ علیہ وسلم نے اب کی بار اس کو یہ کہہ کر واپس بھیج دیا کہ اس کو کسی کے سپرد کر کے آؤ، وہ گئی اور بچہ کسی کے سپرد کر کے پھر آ گئی۔ اب حضور صلی اللہ علیہ وسلم نے اس پر حد قائم فرما دی۔ اگر یزید بن طلحہ تیمی نے نبی اکرم صلی اللہ علیہ وسلم کی صحبت پائی ہے تو یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ مالک بن انس مدنیین کی حدیث میں حکم ہوتے ہیں۔ [المستدرك على الصحيحين/كِتَابُ الْحُدُودِ/حدیث: 8284]

سیدنا عبداللہ فرماتے ہیں: میں نے سیدنا علی بن ابی طالب رضی اللہ عنہ سے زیادہ نشانہ باز کسی کو نہیں دیکھا، آپ کے پاس ہمدان کی ایک شراحہ نامی عورت کو پیش کیا گیا، آپ رضی اللہ عنہ نے اس کو سو کوڑے مارے، پھر اس کو رجم کرنے کا حکم دے دیا، سیدنا علی رضی اللہ عنہ نے ایک اینٹ اس کو ماری، وہ اس کے کانوں کی جڑ میں جا کر لگی، جس کی وجہ سے وہ نیچے گر گئی، پھر لوگوں نے اس پر پتھروں کی برسات کر دی۔ حتیٰ کہ وہ مر گئی، پھر آپ نے فرمایا: میں نے اس کو کتاب اللہ کے حکم کے مطابق کوڑے مارے ہیں اور حدیث پاک کے مطابق اس کو رجم کیا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور شعبی بتاتے ہیں کہ شراحہ کے رجم میں، میں بھی شریک تھا، اور فرماتے ہیں: امیرالمومنین کی اس حدیث کے علاوہ (رجم کے بارے) کوئی حدیث یاد نہیں ہے۔ [المستدرك على الصحيحين/كِتَابُ الْحُدُودِ/حدیث: 8285]