سیدنا ابوبردہ انصاری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: (تعزیر کے طور پر) دس سے زیادہ کوڑے نہ مارے جائیں، کیونکہ دس سے زیادہ صرف حدود اللہ میں مارے جاتے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8306]

سیدنا عمرو بن العاص رضی اللہ عنہ فرماتے ہیں: وہ اپنی پھوپھی کی زیارت کے لئے گئے، انہوں نے ان کے لئے کھانا منگوایا، لونڈی نے کھانا لانے میں دیر کر دی، عمرو بن العاص رضی اللہ عنہ کی پھوپھی نے لونڈی کو کہا: اے زانیہ! تم جلدی نہیں کر سکتی؟ سیدنا عمرو رضی اللہ عنہ نے فرمایا: سبحان اللہ، تو نے بہت بڑی بات کہہ دی ہے، کیا تجھے پتا ہے کہ اس نے زنا کروایا ہے؟ پھوپھی جان نے کہا: نہیں۔ سیدنا عمرو بن العاص رضی اللہ عنہ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ” جس مرد یا عورت نے اپنی لونڈی کو ” زانیہ “ کہا اور اس کو معلوم نہیں ہے کہ اس نے زنا کروایا ہے، قیامت کے دن اس کی لونڈی اس کو کوڑے مارے گی، کیونکہ دنیا میں اس جرم کی حد (متعین سزا) نہیں ہے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ تاہم اس موضوع پر امام بخاری رحمۃ اللہ علیہ اور امام مسلم رحمۃ اللہ علیہ نے، سیدنا ابوہریرہ رضی اللہ عنہ کا یہ ارشاد نقل کیا ہے کہ ” جس نے اپنے مملوک پر زنا کی تہمت لگائی، قیامت کے دن اس پر حد لگائی جائے گی۔ [المستدرك على الصحيحين/كِتَابُ الْحُدُودِ/حدیث: 8307]

رسول اللہ صلی اللہ علیہ وسلم کے صحابی، سیدنا سہل بن سعد رضی اللہ عنہ سے مروی ہے کہ قبیلہ اسلم کا ایک آدمی نبی اکرم صلی اللہ علیہ وسلم کے پاس آیا اور کہنے لگا: میں نے فلاں عورت کے ساتھ زنا کیا ہے، (اس عورت سے پوچھا گیا تو) اس نے انکار کر دیا، چنانچہ اس آدمی کو حد لگا دی گئی اور عورت کو چھوڑ دیا گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس کی شاہد حدیث درج ذیل ہے۔ [المستدرك على الصحيحين/كِتَابُ الْحُدُودِ/حدیث: 8308]

سیدنا سعید بن مسیب رضی اللہ عنہ فرماتے ہیں کہ سیدنا عبداللہ بن عباس رضی اللہ عنہما نے فرمایا: بنی بکر بن لیث کا ایک آدمی نبی اکرم صلی اللہ علیہ وسلم کی بارگاہ میں آیا، اور چار مرتبہ اقرار کیا کہ اس نے ایک عورت کے ساتھ نکاح کیا ہے، اس کو سو کوڑے مارے گئے، کیونکہ یہ شخص کنوارا تھا، پھر اس سے عورت کے خلاف گواہ مانگے گئے، (وہ گواہ پیش نہ کر سکا، پھر عورت سے پوچھا گیا تو) عورت نے کہا: یا رسول اللہ صلی اللہ علیہ وسلم ، اللہ کی قسم! یہ شخص جھوٹ بول رہا ہے۔ چنانچہ اس کو کذب بیانی کی سزا کے طور پر 80 کوڑے مارے گئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْحُدُودِ/حدیث: 8309]