سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر تیری عمر لمبی ہوئی تو عنقریب تو ایسی قوم دیکھے گا جو اللہ تعالیٰ کی ناراضگی میں صبح کرے گی اور اللہ کی لعنت میں شام کرے گی، ان کے ہاتھوں میں گائے کی دموں کی مثل (کوڑے) ہوں گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں كیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8548]

ابوزہیر ثقفی رضی اللہ عنہ فرماتے ہیں کہ رسول اللہ صلی اللہ علیہ وسلم نے اپنے ایک خطبے میں ارشاد فرمایا: اے لوگو! قریب ہے کہ تم جنتی اور دوزخی لوگوں کو پہچان لو گے، یا (شاید یہ فرمایا کہ) تم اچھے اور برے میں تمیز کر لو گے۔ ایک آدمی نے پوچھا: یا رسول اللہ صلی اللہ علیہ وسلم وہ کیسے؟ آپ صلی اللہ علیہ وسلم نے فرمایا: تعریف اور مذمت سے، تم خود ایک دوسرے پر گواہ ہو۔ (یعنی جس کے بارے میں لوگ اچھا کہیں وہ اچھا ہو گا اور جس کو لوگ برا کہیں وہ برا ہو گا) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8549]

سیدنا عبداللہ بن عمرو رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: اس امت کے آخری زمانے میں کچھ لوگ ایسے ہوں گے جو بڑی بڑی زین (والے گھوڑوں) پر سوار ہو کر، مسجدوں کے دروازوں پر آئیں گے، ان کی عورتیں کپڑے پہننے کے باوجود ننگی ہوں گی۔ ان کے سر بختی اونٹوں کی کوہانوں کی مثل اٹھے ہوئے ہوں گے، ان پر لعنت کرو، کیونکہ وہ ملعونہ عورتیں ہوں گی، اگر تمہارے بعد کوئی امت ہوئی تو وہ ان کی ایسے ہی خدمت کریں گے جیسے تم سے پہلی امتوں کی عورتیں تمہاری خدمت کرتی ہیں۔ میں نے پوچھا: یا رسول اللہ صلی اللہ علیہ وسلم ”میاثر “ کیا چیز ہے؟ آپ صلی اللہ علیہ وسلم نے فرمایا: بڑی بڑی زینیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8550]

سیدنا ابوامامہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: آخری زمانے میں اس امت میں کچھ لوگ ہوں گے، ان کے پاس گائے کی دم کی مثل کوڑے ہوں گے، وہ اللہ کی ناراضگی میں صبح کریں گے اور اس کے غضب میں شام کریں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8551]