سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت سے پہلے تاریک رات کے اندھیرے کی مانند فتنے ہوں گے، ان میں بندہ صبح کو مومن ہو گا اور شام کو کافر ہو چکا ہو گا، اور شام کو مومن ہو گا اور صبح کو کافر ہو جائے گا۔ لوگ دنیا کی تھوڑی سی دولت کے بدلے اپنا دین بیچ دیں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8559]

سیدنا عمر بن خطاب رضی اللہ عنہ نے فرمایا: اے لوگو! ہم تمہیں پہچانتے تھے جس وقت رسول اللہ صلی اللہ علیہ وسلم ہم میں موجود تھے، جب وحی کا نزول ہوتا تھا، جب اچھے لوگ ہم میں موجود تھے، سن لو، خبردار! اللہ کے نبی جا چکے ہیں، وحی کا سلسلہ بند ہو چکا ہے، اب ہم تمہیں اسی بنیاد پر پہچانیں گے جو میں تمہیں کہوں گا۔ جس سے خیر ظاہر ہو گا، ہم اس کے بارے میں خیر کا گمان کریں گے، اور جس سے شر سرزد ہو گا، اس کو ہم شریر ہی سمجھیں گے، اور اس سے نفرت کریں گے۔ تمہارے اور تمہارے رب کے درمیان جو راز ہیں، وہ اللہ کے سپرد کریں گے۔ خبردار! مجھ پر ایسا زمانہ آ چکا ہے کہ جو قرآن کریم پڑھتا ہے، میں سمجھتا ہوں کہ اس کی نیت اللہ تعالیٰ کو راضی کرنے کی ہے اور ثواب کی ہے۔ جب کہ مجھے یہ سمجھانے کی کوشش کی جاتی ہے کہ کچھ لوگ قرآن کریم پڑھتے ہیں اور اس سے دنیا چاہتے ہیں، اپنی قراءت اور اپنے علم سے اللہ تعالیٰ کی رضا اور اس کی بارگاہ سے ثواب کی امید کرو۔ اللہ کی قسم! میں اپنے ملازمین کو اس لئے نہیں بھیجتا کہ وہ تمہیں مار پیٹ کر تمہارا مال لیں، بلکہ میں ان کو اس لئے بھیجتا ہوں تاکہ وہ تمہیں تمہارا دین اور سنتیں سکھائیں اور تمہارے درمیان انصاف کریں، اور تمہاری غنیمتیں تمہارے درمیان تقسیم کریں، خبردار! جس کے ساتھ کسی قسم کی بھی زیادتی ہو، وہ اپنے ساتھ ہونے والی زیادتی کی اطلاع مجھ تک پہنچائے، اس ذات کی قسم! جس کے قبضہ میں عمر کی جان ہے، میں اس کو قصاص دلواؤں گا۔ میں نے رسول اللہ صلی اللہ علیہ وسلم کو دیکھا ہے، آپ نے قصاص کے لئے خود کو پیش فرما دیا تھا، خبردار! ان کو مار کر انہیں ذلیل مت کرنا، اور ان کا حق ان سے روک کر ان کو بدظن مت کرنا، اور ان پر جبر کر کے ان کو آزمائش میں مت ڈالنا، اور ان کا مرتبہ کم کر کے ان کو ضائع بھی مت کرنا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8560]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: عرب کے لئے اس شر سے ہلاکت ہے جو بالكل قریب آن پہنچا ہے۔ اگر اس میں مر سکو تو مر جانا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8561]