ابن سیرین فرماتے ہیں: فتنے پھیل چکے ہیں، اور رسول اللہ صلی اللہ علیہ وسلم کے اصحاب کی تعداد دس ہزار ہے، ان میں سے صرف چالیس آدمی ہیں جو اس وقت موجود نہیں ہیں۔ سیدنا علی رضی اللہ عنہ کے ساتھ ایک سو چالیس کے لگ بھگ بدری صحابہ کھڑے ہیں، ان میں ابوایوب، سہل بن حنیف اور عمار بن یاسر رضی اللہ عنہم ہیں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8562]

سیدنا ابوامامہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: ہر معاملہ سخت سے سخت ہی ہوتا جائے گا، اور مال بڑھتا ہی جائے گا، اور قیامت شریر ترین لوگوں پر قائم ہو گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8563]

سیدنا ابوموسیٰ اشعری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: عنقریب تاریک رات کے اندھیروں کی طرح فتنے برپا ہوں گے، ان میں بندہ صبح کو مومن ہو گا اور شام کو کافر ہو چکا ہو گا، اور شام کو مومن ہو گا تو صبح کو کافر ہو جائے گا۔ ان میں بیٹھنے والا، کھڑے ہوئے سے بہتر ہو گا، کھڑا ہوا، پیدل چلنے والے سے بہتر ہو گا، پیدل چلنے والا، اس کی جانب بھاگنے والے سے بہتر ہو گا۔ صحابہ کرام رضی اللہ عنہم نے عرض کی: یا رسول اللہ صلی اللہ علیہ وسلم ان حالات میں آپ کا ہمارے لئے کیا حکم ہے؟ آپ صلی اللہ علیہ وسلم نے فرمایا: تم اپنے گھروں میں بیٹھ جانا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اس حدیث کو اسی طرح ابوبکرہ انصاری اور سعد بن مالک رضی اللہ عنہما نے بھی رسول اللہ صلی اللہ علیہ وسلم سے روایت کیا ہے۔ ابوبکرہ انصاری رضی اللہ عنہ سے مروی حدیث درج ذیل ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8564]

سیدنا ابوبکرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: خبردار! عنقریب تم فتنے میں مبتلا ہو جاؤ گے، پھر ایک ایسا فتنہ برپا ہو گا کہ اس میں بیٹھا ہوا، کھڑے ہوئے سے بہتر ہو گا، کھڑا ہوا، پیدل چلنے والے سے بہتر ہو گا، پیدل چلنے والا اس کی طرف بھاگنے والے سے بہتر ہو گا، جب وہ فتنہ برپا ہو، تو جس کے پاس کوئی اونٹ ہو، وہ اپنے اونٹ کے پاس چلا جائے، جس کے پاس بکری ہو، وہ بکری کے پاس چلا جائے، جس کے پاس زمین ہو، وہ اپنی زمین کے ساتھ چپک جائے۔ ایک آدمی نے عرض کی: یا رسول اللہ صلی اللہ علیہ وسلم اگر کسی کے پاس اونٹ، بکری اور زمین نہ ہو تو وہ کیا کرے؟ آپ صلی اللہ علیہ وسلم نے فرمایا: وہ ایک پتھر پکڑ کر اپنی تلوار کی دھار تیز کرے اور ہمت ہو تو اس فتنے سے نجات پا لے۔ پھر فرمایا: اے اللہ! میں نے تیرا پیغام پہنچا دیا۔ یہ الفاظ تین مرتبہ فرمائے۔ ایک آدمی نے کہا: یا رسول اللہ صلی اللہ علیہ وسلم ، اگر مجھے کسی ایک صف میں شامل ہونے کے لئے مجبور کیا جائے، اور وہاں پر کوئی آدمی مجھے تیر یا تلوار مار کر قتل کر دے تب کیا ہو گا؟ آپ صلی اللہ علیہ وسلم نے فرمایا: تیرا اور اس کا گناہ اسی کے ذمہ ہے اور وہ شخص دوزخی ہو گا۔ یہ بات بھی آپ صلی اللہ علیہ وسلم نے تین مرتبہ دہرائی۔ سیدنا سعد بن مالک رضی اللہ عنہ سے مروی حدیث [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8565]