سیدنا سعد بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: عنقریب ایک فتنہ ہو گا، جس میں بیٹھا ہوا شخص کھڑے سے بہتر ہو گا، کھڑا ہوا، پیدل چلنے والے سے بہتر ہو گا اور پیدل چلنے والا بھاگنے والے سے بہتر ہو گا اور بھاگنے والا سوار سے بہتر ہو گا اور سوار، تیز رفتار اونٹ چلانے والے سے بہتر ہو گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ یہ باب بہت بڑا ہو گیا ہے، اس کو ابوداؤد جو کہ فن حدیث کے بہت بڑے امام ہیں انہوں نے روایت کیا ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8566]

محمد بن ادریس الشافعی رضی اللہ عنہ نے محمد بن خالد الجندی سے، انہوں نے ابان بن صالح سے، انہوں نے حسن سے، انہوں نے انس بن مالک رضی اللہ عنہ سے روایت کیا ہے کہ رسول اللہ صلی اللہ علیہ وسلم نے ارشاد فرمایا: فتنوں کا معاملہ بہت سخت ہو جائے گا اور دین پیچھے کی طرف جائے گا، لوگوں میں بخل بڑھے گا، اور قیامت سب سے شریر ترین لوگوں پر قائم ہو گی، اور مہدی سے مراد خود سیدنا عیسیٰ علیہ السلام ہی ہیں۔ صامت بن معاذ فرماتے ہیں: میں نے صنعاء سے جند تک دو دن کی مسافت کر کے ان کے محدث کی خدمت میں حاضر ہوا، اور ان سے یہ حدیث طلب کی ان کی روایت کردہ حدیث سند یوں تھی۔ محمد بن خالد الجندی نے، ابان بن ابن ابی عیاش سے، انہوں نے حسن سے اور انہوں نے رسول اللہ صلی اللہ علیہ وسلم سے ایسی ہی حدیث روایت کی ہے۔ اس حدیث کا کچھ متن عبدالعزیز بن صہیب کے واسطے سے انس بن مالک رضی اللہ عنہ کے حوالے سے، رسول اللہ صلی اللہ علیہ وسلم سے مروی ہے۔ عبدالعزیز کی سیدنا انس بن مالک رضی اللہ عنہ سے روایت کردہ حدیث: [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8567]

8468 - سیدنا صہیب (رضی اللہ عنہ) بیان کرتے ہیں کہ: میں نبی کریم صلی اللہ علیہ وسلم کی خدمت میں حاضر ہوا تو آپ صلی اللہ علیہ وسلم کے سامنے کھجوریں اور روٹی رکھی تھی۔ آپ صلی اللہ علیہ وسلم نے فرمایا: "قریب آ جاؤ اور کھاؤ"۔ میں کھجوریں کھانے لگا تو آپ صلی اللہ علیہ وسلم نے (شفقتاً) فرمایا: "تم کھجور کھا رہے ہو حالانکہ تمہاری آنکھ آئی ہوئی ہے (آشوبِ چشم ہے)؟" میں نے عرض کیا: "یا رسول اللہ! میں دوسری طرف (کی داڑھ) سے چبا رہا ہوں"۔ اس پر نبی کریم صلی اللہ علیہ وسلم تبسم فرمانے لگے۔ اس حدیث کی سند صحیح ہے، لیکن شیخین (امام بخاری و مسلم) نے اسے اپنی کتب میں نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8568]