سیدنا ابوموسیٰ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت، امت مرحومہ ہے، اس پر آخرت میں عذاب نہیں ہو گا، اللہ تعالیٰ نے ان کا عذاب دنیا ہی میں رکھ دیا ہے، فتنے، زلزلے اور قتل و غارت گری، یہ سب ان کا عذاب ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8577]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت کے قریب گرج چمک بہت بڑھ جائے گی، لوگ صبح کریں گے اور پوچھیں گے: گزشتہ رات کس پر بجلی گری؟ لوگ بتائیں گے کہ فلاں فلاں لوگوں پر گری ہے۔ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8578]

سیدنا حذیفہ رضی اللہ عنہ سے پوچھا گیا: اے ابوعبداللہ! جب نمازیں پڑھنے والے آپس میں لڑ پڑیں تو اس وقت آپ کا ہمارے لئے کیا مشورہ ہے؟ آپ نے فرمایا: تم اپنے گھر کے آخری کمرے میں گھس جانا، اگر وہ (دہشت گرد) وہاں بھی داخل ہو جائے تو تم کہنا: میرے اور اپنے گناہ کے تم ذمہ دار ہو جاؤ، اور تم آدم علیہ السلام کے (مقتول) بیٹے کی طرح ہو جاؤ۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8579]

عبدالرحمن بن صحار العبدی اپنے والد کا یہ بیان نقل کرتے ہیں کہ رسول اللہ صلی اللہ علیہ وسلم نے ارشاد فرمایا: قیامت قائم ہونے سے پہلے عرب کے کئی قبیلے زمین میں دھنسا دیئے جائیں گے۔ لوگ یوں باتیں کریں گے ” بنی فلاں میں سے کون زندہ بچا ہے؟“ صحار العبدی فرماتے ہیں: جب آپ صلی اللہ علیہ وسلم نے قبائل کا ذکر کیا تو میں سمجھ گیا کہ وہ عرب ہی کے قبیلے ہوں گے۔ کیونکہ عجمی لوگ تو اپنے علاقوں کی طرف منسوب ہوتے ہیں، (یہ لوگ اپنی نسبت قبیلوں کی طرف نہیں کرتے) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8580]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت میں خسف (زمین میں دھنسنا) بھی ہو گا، مسخ (چہرے بگڑنا) بھی ہو گا اور قذف (پتھر برسنا) بھی ہو گا۔ ٭٭ اگر ابوالزبیر نے عبداللہ بن عمر رضی اللہ عنہما سے سماع کیا ہے تو یہ حدیث امام مسلم رحمۃ اللہ علیہ کے معیار کے مطابق صحیح ہے، لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8581]