سیدنا ثوبان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت پر اس وقت تک قیامت قائم نہیں ہو گی حتی کہ اس کے کئی قبیلے مشرکین سے جا ملیں گے، اور کئی قبیلے بتوں کی عبادت بھی کریں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8589]

سیدنا حذیفہ رضی اللہ عنہ نے فرمایا: ان فتنوں سے بچو، جن کو کوئی بھی پہچان نہیں سکے گا، اللہ کی قسم، جو بھی ان کو پہچانے گا، یہ اس کو یوں گرا دے گا جیسے سیلاب، کھٹرے ہوئے پانی پر آئی ہوئی سبزی کو بہا کر لے جاتا ہے، بے شک وہ آتے ہوئے واضح نہیں ہو گا اور واپس جاتے ہوئے بالکل واضح ہو گا، حتی کہ جو شخص اس کو نہیں جانتا، وہ بھی کہے گا کہ ” وہ آتے ہوئے غیر واضح ہے اور جاتے ہوئے بالکل واضح ہے جب تم اس کو دیکھو، تو اپنے گھروں میں جمع ہو جاؤ، اور اپنی تلواروں کو توڑ دو، اور اپنے کمان کے چلے کو کاٹ ڈالو، اور اپنے چہروں کو ڈھانپ لو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8590]

سیدنا سعید بن مسیب رحمۃ اللہ علیہ نے فرمایا: پہلا فتنہ آئے گا اور بدری صحابہ میں سے ایک بھی باقی نہیں بچے گا، پھر دوسرا فتنہ آئے گا، اور حدیبیہ کے شرکاء میں سے کوئی بھی زندہ نہیں ہو گا، اور میرا گمان ہے کہ اگر تیسرا فتنہ برپا ہوا تو لوگوں میں کسی قسم کی طاقت اور قوت نہیں رہنے دے گا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8591]