سیدنا ابوہریرہ رضی اللہ عنہ نے فرمایا: اے لوگو! تم پر تاریک رات کے اندھیروں کی مثل فتنے آئیں گے، ان میں اچھا بکری کا وہ مالک ہو گا، جو اپنی بکری کے دودھ وغیرہ پر گزارا کرتا ہو گا، یا وہ شخص جو دور درازے پیچھے اپنے گھوڑے کی لگام پڑے ہوئے ہو گا، اپنی تلوار پر گزارا کرتا ہو گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8643]

سیدنا ابوسعید خدری رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: آخری زمانے میں میری امت پر ان کے بادشاہوں کی جانب سے اتنی بڑی بڑی مصیبتیں نازل ہوں گی، کہ اس سے بڑی مصیبت کبھی کسی نے نہیں سنی ہو گی، حتی کہ زمین باوجود کشادہ ہونے کے ان پر تنگ ہو جائے گی، حتی کہ روئے زمین ظلم و ستم سے بھر جائے گی، ظلم سے بچنے کے لئے مومن کو کوئی پناہ گاہ نہیں ملے گی، ایسے حالات میں اللہ تعالیٰ میری اولاد میں سے ایک آدمی بھیجے گا، وہ زمین کو عدل و انصاف سے بھر دے گا، جیسا کہ اس سے پہلے ظلم و ستم سے بھری ہو گی، اس پر آسمان والے بھی راضی ہوں گے اور زمین والے بھی، زمین اپنے تمام خزانے اگل دے گی، آسمان بھی ان پر رحمتوں کی بارشیں برسائے گا، وہ آدمی ان میں سات، یا آٹھ یا نو سال رہے گا، اس وقت اللہ تعالیٰ اہل زمین پر جو خیر نازل فرمائے گا اس کو دیکھ کر زندہ لوگ تمنا کریں گے کہ کاش ان کے فوت شدہ لوگ آج زندہ ہوتے۔ (اور ان حالات کا نظارہ کرتے) ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8644]