سیدنا عبداللہ بن زبیر رضی اللہ عنہما فرماتے ہیں کہ رسول اللہ صلی اللہ علیہ وسلم نے حکم اور اس کے بچے پر لعنت فرمائی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ امام حاکم کہتے ہیں: طالب علم کو جان لینا چاہئے کہ اس باب میں جتنی احادیث مروی ہیں، میں نے ان میں سے ایک تہائی بھی بیان نہیں کیں، اور اس امت کے فتنوں میں سب سے پہلا فتنہ انہیں لوگوں کا ہو گا، اس لئے اللہ تعالیٰ کے ساتھ میرا جو تعلق ہے وہ اس بات کی اجازت نہیں دیتا کہ میں اپنی کتاب کو ان کے ذکر سے خالی رکھوں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8695]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: قیامت سے پہلے رومی لوگ اعماق پر چڑھائی کریں گے، ان کی جانب مدینہ سے ایک جماعت نکلے گی، یہ جماعت اس وقت کے تمام انسانوں سے بہتر ہو گی، جب یہ لوگ جنگ کے لئے صف بندی کر چکیں گے تو رومی کہیں گے: تم ہمارے اور ہمارے قیدیوں کے درمیان راستہ چھوڑ دو، ہم ان سے لڑیں گے، مسلمان کہیں گے: نہیں، اللہ کی قسم! ہم تمہیں ان تک راستہ نہیں دیں گے، ان کے درمیان جنگ ہو گی، ان میں سے ایک تہائی لشکر بھاگ جائے گا، اللہ تعالیٰ ان کی توبہ کبھی قبول نہیں کرے گا، ایک تہائی لشکر شہید ہو جائے گا، یہ لوگ اللہ تعالیٰ کی بارگاہ میں تمام شہداء سے افضل ہوں گے، اور تیسرا تہائی حصہ کبھی فتنہ میں مبتلا نہیں ہو گا، پھر یہ لوگ قسطنطنیہ میں پہنچیں گے، اس کو بھی فتح کر لیں گے، یہ لوگ وہاں کی غنیمتیں تقسیم کر رہے ہوں گے اور اپنی تلواروں پر زیتون مل چکے ہوں گے، کہ شیطان چیخ کر کہے گا: دجال نے تمہارے گھر والوں پر حملہ کر دیا ہے، (یہ بات جھوٹ ہو گی) جب یہ لوگ شام میں آئیں گے، تب وہ ظاہر ہو گا، ابھی اس کے ساتھ جہاد کے لئے صف بندی ہو رہی ہو گی کہ نماز فجر کی اقامت ہو جائے گی، اس وقت سیدنا عیسیٰ علیہ السلام نازل ہوں گے، اور لوگوں کی امامت کرائیں گے، جب اللہ کا دشمن دجال سیدنا عیسیٰ علیہ السلام کو دیکھے گا تو نمک کی طرح پگھلنا شروع ہو جائے گا، اگر وہ اس کو اسی طرح چھوڑ دیں گے تب بھی وہ پگھل پگھل کر ختم ہو جائے گا، لیکن اللہ تعالیٰ سیدنا عیسیٰ علیہ السلام کے ہاتھوں اس کو قتل کروائے گا، اور اس کا خون ان کے نیزے پر دکھائی دے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8696]