اسماعیل بن عبیداللہ بیان کرتے ہیں کہ سیدنا انس بن مالک رضی اللہ عنہ ولید بن یزید کے پاس آئے، ولید نے ان سے کہا: تم نے رسول اللہ صلی اللہ علیہ وسلم سے قیامت کے بارے میں کیا سن رکھا ہے؟ سیدنا انس بن مالک رضی اللہ عنہ نے فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ تم اور قیامت اس طرح ہیں۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے شعبہ کے واسطے سے قتادہ سے اور ابوالتیاح کے واسطے سے سیدنا انس سے روایت کی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8720]

سیدنا عبداللہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جب تک روئے زمین پر اللہ کا نام لیا جا رہا ہے تب تک قیامت نہیں آئے گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ امام مسلم رحمۃ اللہ علیہ نے شعبہ سے، انہوں نے ابواسحاق سے، انہوں نے ابوالاحوص سے انہوں نے سیدنا عبداللہ سے روایت کیا ہے کہ رسول اللہ صلی اللہ علیہ وسلم نے ارشاد فرمایا: قیامت سب سے برے لوگوں پر قائم ہو گی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8721]

سیدنا انس رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جب تک اللہ تعالیٰ کے نام لیوا موجود ہیں تب تک قیامت قائم نہیں ہو گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8722]

سیدنا انس رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قیامت اس وقت تک قائم نہیں ہو گی جب تک زمین میں اللہ تعالیٰ کا نام لیا جائے گا۔ کوئی عورت جوتا لے کر چلے گی اور کہے گی: کبھی اس کو بھی کوئی پہنا کرتا تھا۔ ایک مرد 50 عورتوں کا ذمہ دار ہو گا، آسمان سے بارشیں نازل ہوں گی لیکن زمین فصل نہیں اگائے گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8723]

سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اس ذات کی قسم جس کے قبضہ قدرت میں میری جان ہے، اس آدمی پر قیامت قائم نہیں ہو گی جو ” لا الہ الا اللہ “ پڑھتا ہو گا، بھلائی کا حکم دیتا ہو گا اور برائی سے روکتا ہو گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8724]

سیدنا انس رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اس وقت تک قیامت قائم نہیں ہو گی جب تک زمین پر اللہ کا نام لیا جائے گا، عورت ایک جوتا لے کر گزرے گی اور وہ کہے گی یہ جوتا بھی فلاں شخص پہنتا تھا۔ 50 عورتوں کا ذمہ دار صرف ایک مرد ہو گا، آسمان بارشیں برسائے گا، لیکن سبزیاں نہیں اگیں گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8725]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: قیامت اس وقت تک قائم نہیں ہو گی جب تک اللہ کی رضا چاہنے والا ایک بھی بندہ موجود ہے، عورت دن دیہاڑے بیچ چوراہے میں زنا کروائے گی، اس کو کوئی روکنے والا نہیں ہو گا بلکہ اس کو کوئی برا جاننے والا بھی نہیں ہو گا۔ بلکہ جو بہت نیک ہو گا وہ ان کو صرف اتنا کہے گا: تمہیں سڑک سے ہٹ کر، ایک طرف ہو کر یہ کام کرنا چاہئے تھا، اور اس زمانے میں اتنی بات کہنے کی جرأت کرنے والا شخص ایسا ہی ہو گا جیسے آج تمہارے درمیان ابوبکر اور عمر رضی اللہ عنہما ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8726]