سیدنا حذیفہ بن یمان رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: دجال کے حالات کو سب سے زیادہ میں جانتا ہوں، اس کے ساتھ دو نہریں ہوں گی، ان میں سے ایک کے اندر دیکھنے والوں کو آگ دکھائی دے گی، اور دوسری میں سفید پانی دکھائی دے گا، جو شخص اس کو پائے تو اس کو چاہئے کہ وہ اس آگ والی نہر میں غوطہ لگائے اور اسی سے پیئے کیونکہ حقیقت میں وہ ٹھنڈا پانی ہو گا، اور دوسری نہر سے بچ کر رہنا، کیونکہ وہ فتنہ ہے۔ اور جان لو کہ اس کی دونوں آنکھوں کے درمیان ” کافر “ لکھا ہوا ہو گا، ہر پڑھا لکھا اور ان پڑھ اس کو پڑھ لے گا، آنکھ کی بیماری کی وجہ سے اس کی ایک آنکھ ضائع ہو چکی ہو گی، اس کے احوال میں آخری واقعہ یہ ہو گا کہ وہ سرزمین اردن پر آئے گا، اپنے گھر پر صبح کرے گا، اردن میں ہر شخص اللہ تعالیٰ پر اور آخرت پر ایمان رکھنے والا ہو گا، وہ مسلمانوں کی ایک تہائی جماعت کو قتل کر دے گا، ایک تہائی بھاگ جائیں گے، اور ایک تہائی باقی بچیں گے۔ جب رات ہو گی تو مومنین ایک دوسرے سے کہیں گے، ہمیں اپنے رب کی رضا کے لئے اپنے مسلمان بھائیوں کی امداد کرنی چاہئے، جس کے پاس کوئی کھانے پینے کی کوئی چیز ہو، وہ اپنے مسلمان بھائی تک پہنچائے، اور جیسے ہی صبح صادق کا وقت شروع ہو، نماز فجر ادا کر کے اپنے دشمن پر حملہ آور ہو جائیں، جب یہ نماز کے لئے کھڑے ہوں گے تو سیدنا عیسیٰ علیہ السلام نازل ہوں گے، آپ لوگوں کو نماز پڑھائیں گے، جب نماز سے فارغ ہو جائیں گے، ہاتھ سے اشارہ کر کے کہیں گے: میرے اور اللہ کے دشمن کے درمیان راستہ چھوڑ دو، ابوحازم کہتے ہیں: سیدنا ابوہریرہ رضی اللہ عنہ فرماتے ہیں: (سیدنا عیسیٰ علیہ السلام کو دیکھ کر) وہ یوں پگھلنا شروع ہو جائے گا جیسے دھوپ میں چربی پگھلتی ہے، اور سیدنا عبداللہ بن عمرو نے اس موقع پر فرمایا: وہ ایسے پگھلنا شروع ہو جائے گا جیسے پانی میں نمک پگھلتا ہے، اللہ تعالیٰ ان پر مسلمانوں کو مسلط کر دے گا، وہ ان لوگوں کو قتل کریں گے، جتنی کہ درخت اور پھر آواز دے دے کر کہیں گے: اے عبداللہ، اے عبدالرحمن، اے مسلمان، یہ دیکھو، یہاں پر یہودی چھپا ہوا ہے، اس کو قتل کرو، اس طرح اللہ تعالیٰ یہودیوں کا صفایا کر دے گا اور مسلمانوں کو غلبہ دے گا، مسلمان صلیب توڑ دیں گے اور خنزیر کو قتل کریں گے، اور جزیہ ختم ہو جائے گا۔ لوگ اسی طرح زندگی بسر کر رہے ہوں گے کہ اللہ تعالیٰ یاجوج و ماجوج کو نکالے گا، ان کا پہلا لشکر سمندر کا پانی پی جائے گا، جب آخری فرد وہاں پہنچے گا تو پانی ختم ہو چکا ہو گا، وہ اس میں ایک قطرہ تک نہیں چھوڑیں گے، وہ کہیں گے: یہاں پر کبھی پانی کا اثر ہوتا تھا۔ پھر اللہ کا نبی اور اس کے صحابی اس کا تعاقب کریں گے، فلسطین کے ایک شہر میں داخل ہوں گے، اس کا نام ” لد “ ہے۔ یہ کہیں گے: ہم زمین والوں پر غالب آ گئے ہیں، اب چلو ہم آسمان والوں سے بھی لڑتے ہیں، یہ لوگ اس وقت اللہ کے نبی (سیدنا عیسیٰ علیہ السلام) اللہ تعالیٰ سے دعا مانگیں گے، (نبی کی دعا کی برکت سے) اللہ تعالیٰ ان کے حلق میں کیڑے پیدا کر دے گا، جس کی وجہ سے ان کا کوئی ایک فرد بھی زندہ نہیں بچے گا، پھر ان کی بدبو مسلمانوں کو تکلیف دے رہی ہو گی، سیدنا عیسیٰ علیہ السلام دعا مانگیں گے، اللہ تعالیٰ تیز ہوا بھیجے گا، وہ ان سب کو اٹھا کر سمندر میں پھینک دے گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8717]

سیدنا نواس بن سمعان کلابی فرماتے ہیں: ایک دن رسول اللہ صلی اللہ علیہ وسلم نے دجال کا ذکر کیا، اس دوران آپ صلی اللہ علیہ وسلم کچھ زمین کی جانب جھکے اور پھر اوپر اٹھے، یوں لگتا تھا جیسے آپ کھجوروں کے کسی باغ میں ہوں، جب ہم شام کے وقت رسول اللہ صلی اللہ علیہ وسلم کی بارگاہ میں حاضر ہوئے تو آپ صلی اللہ علیہ وسلم نے ہماری جانب دیکھا اور پوچھا: تم کہاں تھے؟ ہم نے کہا: یا رسول اللہ صلی اللہ علیہ وسلم آپ نے صبح دجال کا ذکر کیا تھا، پھر آپ جھک گئے اور پھر آپ اوپر کی طرف اٹھے، ہم سمجھے کہ آپ کھجوروں کے کسی باغ میں ہیں۔ آپ صلی اللہ علیہ وسلم نے فرمایا: اگر میری موجودگی میں دجال ظاہر ہو گیا تو تمہاری طرف سے اس کا مقابلہ میں کروں گا اور اگر اس کے ظاہر ہونے کے وقت میں موجود نہ ہوا، تو تم خود اس کا مقابلہ کرنا، اور میری غیر موجودگی میں اللہ تعالیٰ ہی ہر مسلمان کا نگہبان ہو گا، وہ (دجال) گھنگریالے بالوں والا نوجوان ہو گا، عزی بن قطن کے ساتھ مشابہت رکھتا ہو گا۔ جو اس کو دیکھے وہ سورت کہف کی ابتدائی آیات پڑھے، پھر فرمایا: میرا خیال ہے کہ وہ شام اور عراق کے درمیان کسی علاقے میں ظاہر ہو گا۔ اپنے دائیں بائیں فساد پھیلائے گا۔ اے اللہ کے بندو، ثابت قدم رہو۔ ہم نے کہا: یا رسول اللہ صلی اللہ علیہ وسلم وہ کتنا عرصہ زمین میں رہے گا؟ آپ صلی اللہ علیہ وسلم نے فرمایا: چالیس دن۔ ایک دن ایک سال کے برابر ہو گا، اور ایک دن ایک مہینے کے برابر ہو گا، ایک دن ایک ہفتے کے برابر ہو گا، اور ہفتے کے دن تمہارے دنوں کے برابر ہوں گے۔ ہم نے کہا: یا رسول اللہ صلی اللہ علیہ وسلم جو ایک دن پورے ایک سال کے برابر ہو گا، اس (سال کے برابر) دن میں صرف ایک دن کی نمازیں کافی ہوں گی؟ آپ صلی اللہ علیہ وسلم نے فرمایا: نہیں، عام دن کے برابر وقت کا تعین کر کے مناسب وقتوں پر نمازیں ادا کی جائیں، (اور ایک دن میں پورے سال کے برابر نمازیں پڑھی جائیں) ہم نے عرض کی: یا رسول اللہ صلی اللہ علیہ وسلم زمین میں کون سی نشانیاں جلدی رونما ہوں گی؟ آپ صلی اللہ علیہ وسلم نے فرمایا: پھر بارش آئے گی، اس کے بعد تیز ہوا چلے گی، وہ شخص ایک قوم کے پاس آئے گا، ان کو اپنے اوپر ایمان لانے کی دعوت دے گا، وہ اس پر ایمان لے آئیں گے، وہ آسمان کو بارش برسانے کا حکم دے گا تو آسمان بارش برسائے گا، وہ زمین کو حکم دے گا، زمین سبرہ اگائے گی، ان کے مویشی چر کر واپس آئیں گے تو ان کی کوہانیں لمبی ہو چکی ہوں گی، ان کے تھن دودھ سے بھر چکے ہوں گے اور ان کے پیٹ موٹے ہو چکے ہوں گے، پھر وہ ایک قوم کے پاس آئے گا، ان کو اپنے اوپر ایمان لانے کی دعوت دے گا، لیکن وہ لوگ اس پر ایمان نہیں لائیں گے، وہ ان کو چھوڑ کر واپس چلا جائے گا، ان لوگوں کے مال ان کے پیچھے چلیں گے، جب وہ لوگ صبح کریں گے تو ان کے ہاتھ میں کچھ بھی نہیں ہو گا (کیونکہ ان کے مال تو دجال کے ساتھ جا چکے ہوں گے)، پھر وہ بنجر زمین سے گزرے گا، اس سے کہے گا: اپنے خزانے نکال دے، وہ وہاں سے آگے روانہ ہو گا تو زمین کے خزانے اس کے پیچھے چلیں گے جیسا کہ شہد کی مکھیاں اکٹھی ہو کر آتی ہیں۔ پھر وہ ایک مسلمان نوجوان کو بلائے گا، تلوار سے اس کے دو ٹکڑے کر دے گا، جیسے تیر اپنے شکار کے دو ٹکڑے کر دے۔ پھر وہ اس کو بلائے گا تو وہ (مقتول) نوجوان ہنستا مسکراتا ہوا اٹھ کر آ جائے گا، وہ اپنے جادو اسی طرح جگا رہا ہو گا کہ اللہ تعالیٰ سیدنا عیسیٰ بن مریم علیہ السلام کو بھیجے گا، آپ جامع مسجد دمشق کے سفید مشرقی منارے پر نازل ہوں گے جو کہ زرد رنگ کے دو کپڑے پہنے ہوئے، دو فرشتوں کے کندھوں پر اپنے ہاتھ رکھے ہوئے نازل ہوں گے، جب آپ سر جھکائیں گے تو سر سے قطرے ٹپکیں گے، جب سر اوپر اٹھائیں گے تو وہ قطرے موتیوں کی طرح چمکیں گے، جو بھی کافر ان کی خوشبو سونگھے گا، مر جائے گا، یہ خوشبو حد نگاہ تک پھیل جائے گی، آپ دجال کا پیچھا کریں گئے اور ” لد “ کے دروازے پر اس کو پکڑ لیں گے، اللہ تعالیٰ اس کو قتل فرما دے گا۔ پھر سیدنا عیسیٰ علیہ السلام اس قوم کے پاس تشریف لائیں گے جس کو اللہ تعالیٰ نے دجال سے بچا دیا ہو گا، آپ ان کے چہروں پر ہاتھ پھیریں گے، جنت میں ان کے درجات ان کو بتائیں گے، وہ ابھی اسی کیفیت میں ہوں گے کہ اللہ تعالیٰ سیدنا عیسیٰ علیہ السلام کی جانب وحی فرمائیں گے کہ اے عیسیٰ! میں نے اپنے بندوں کو نکالا ہے، ان میں سے کسی سے بھی ان کے قتال کی وجہ سے بدلہ نہیں لینا۔ میرے بندوں کو کوہ طور پر جمع کر لیں، پھر اللہ تعالیٰ یاجوج اور ماجوج کو بھیجے گا، یہ ہر گھاٹی سے اتریں گے، ان کا پہلا دستہ بحیرہ طبریہ سے گزرے گا تو اس کا سارا پانی پی جائیں گے، اور جب آخری دستہ گزرے گا تو وہ کہے گا: یہاں پر کسی زمانے میں پانی ہوتا تھا۔ وہ سیدنا عیسیٰ علیہ السلام کا اور ان کے ساتھیوں کا محاصرہ کر لیں گے، حتی کہ اس وقت بیل کا سر آج کے سو دیناروں سے بھی افضل ہو گا۔ سیدنا عیسیٰ علیہ السلام اور ان کے ساتھی اللہ تبارک و تعالیٰ کی بارگاہ میں دعائیں مانگیں گے، اللہ تعالیٰ یاجوج اور ماجوج کی گردنوں میں ایک کیڑا پیدا فرما دے گا، اگلے دن یہ سب لوگ مر چکے ہوں گے، تب اللہ تعالیٰ کے نبی سیدنا عیسیٰ علیہ السلام اور ان کے ساتھی نیچے اتریں گے، ایک بالشت بھر جگہ بھی ان کے لاشوں، ان کے خون اور بدبو سے خالی نہیں ہو گی۔ سیدنا عیسیٰ علیہ السلام اور ان کے ساتھی پھر اللہ تعالیٰ سے دعا مانگیں گے تو اللہ بختی اونٹوں کی گردنوں جیسے پرندے بھیجے گا، وہ ان کو اٹھا کر جہاں چاہیں گے پھینک دیں گے۔ پھر اللہ تعالیٰ برسات نازل فرمائے گا، وہ ہر کچے اور پکے مکان کو دھو دے گی، اور ساری زمین دھل کر آئینے کی طرح ہو جائے گی، پھر زمین کو حکم ہو گا کہ اپنے پھلوں کو اگا، اور اپنی برکتیں دوبارہ دے، اس وقت ایک انار کو پوری پوری جماعت کھائے گی، اور اس کے چھلکے کے سائے میں بیٹھیں گے، اور پیداوار میں اتنی برکت ہو گی کہ ایک اونٹنی کا دودھ لوگوں کی ایک جماعت کو کافی ہو گا۔ اور گائے کا ایک وقت کا دودھ پورے قبیلے کے لئے کافی ہو گا۔ اور بکری کا ایک وقت کا دودھ پورے خاندان کے لئے کافی ہو گا۔ حالات اسی طرح چل رہے ہوں گے کہ اللہ تعالیٰ ایک خوشبودار ہوا بھیجے گا، جو کہ ان کی بغلوں کے نیچے سے گزرے گی اور ہر مسلمان کی روح قبض کر لے گی اور ایسے لوگ باقی بچیں گے جو جانوروں کی طرح سرعام زنا کریں گے۔ ان لوگوں پر قیامت قائم ہو گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین صلی اللہ علیہ وسلم نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8718]

سیدنا ابوہریرہ رضی اللہ عنہ فرماتے ہیں: میرے بھائی کے گھر ام سلمہ کے ہاں بچہ پیدا ہوا، انہوں نے اس کا نام ” ولید “ رکھا، رسول اللہ صلی اللہ علیہ وسلم کی بارگاہ میں اس کا تذکرہ ہوا تو آپ صلی اللہ علیہ وسلم نے فرمایا: تم اپنے فرعونوں کے نام پر نام رکھا ہے۔ میری امت میں ایک ولید نامی شخص ہو گا، وہ میری امت پر اتنی سختی کرے گا، اتنی سختی تو فرعون نے بھی اپنی قوم پر نہیں کی ہو گی۔ زہری کہتے ہیں: اگر ولید بن یزید کو خلیفہ بنایا گیا تو اس سے مراد وہی ولید ہو گا اور اگر وہ خلیفہ نہ بنا تو اس سے مراد عبدالملک کا بیٹا ” ولید “ ہے۔ ٭٭ یہ حدیث امام بخاری رحمۃ اللہ علیہ اور مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ امام حاکم کہتے ہیں: بے شک و شبہ وہ ” ولید بن یزید “ ہی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8719]