سیدنا ابوہریرہ رضی اللہ عنہ فرماتے ہیں: اللہ کی کتاب پر ایک رات ایسی گزرے گی کہ اس کے بعد یہ آسمان کی جانب اٹھائی جائے گی، پھر روئے زمین پر قرآن کریم، تورات، انجیل اور زبور کی ایک آیت تک نہ رہے گی، اور لوگوں کے دلوں سے بھی نکال لی جائے گی، لوگ ایسے ہو جائیں گے کہ ان کو ان چیزوں کا کچھ بھی علم نہیں رہے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8755]

سیدنا ابوالشعثاء بیان کرتے ہیں: ہم ابومسعود انصاری کے ہمراہ باہر نکلے، ہم نے ان سے کہا: آپ ہم سے عہد لیں، آپ نے فرمایا: تم پر لازم ہے کہ اللہ تعالیٰ سے ڈرو، اور محمد صلی اللہ علیہ وسلم کی جماعت کی پیروی کرو، کیونکہ اللہ تعالیٰ محمد صلی اللہ علیہ وسلم کی جماعت کو گمراہی پر جمع نہیں فرمائے گا، اور اللہ کا دین ایک ہی ہے، اللہ کے دین میں رنگسازی سے بچو، اور اللہ تعالیٰ سے ڈرتے رہو، اور صبر اختیار کرو، یہاں تک کہ نیک آدمی کو آرام مل جائے اور فاجروں سے سکون ہو جائے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ ہم نے اس کو مسند کر کے اس طور پر لکھا ہے کہ یہ اس کتاب کے مطابق صحیح نہیں ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8756]

سیدنا قدامہ بن عبداللہ بن عمار الکلابی رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ سے ڈرو، اور جماعت کے ساتھ رہو، کیونکہ اللہ تعالیٰ اس امت کو گمراہی پر جمع نہیں کرے گا، اور تم پر صبر لازم ہے حتی کہ نیک لوگ آرام پائیں اور فاجر سے سکون مل جائے۔ ٭٭ یہ حدیث ایسی ہے کہ میں نے اس اسناد کے ہمراہ صرف ایک ہی حدیث لکھی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8757]