سیدنا شعیب بن عمر الازرق بیان کرتے ہیں: ہم سفر حج پر روانہ ہوئے، ہم منکدر کے راستے سے گزر رہے تھے، عموماً لوگ اس راستے سے سفر کیا کرتے تھے، ہم راستہ بھول گئے، آپ فرماتے ہیں: ہم ابھی اسی حیرانگی کے عالم میں تھے کہ اچانک ہمارے سامنے ایک دیہاتی شخص آیا یوں لگتا تھا کہ وہ زمین سے نکلا ہو، اس نے کہا: اے شیخ! آپ جانتے ہیں کہ آپ اس وقت کہاں ہیں؟ میں نے کہا: جی نہیں۔ اس نے کہا: آپ رہائب میں ہیں۔ اور یہ ٹیلہ جو آپ کو بہت بڑا دکھائی دے رہا ہے، یہ بکر بن وائل ہے، اور تغلب ہے، اور یہ قبر کلیب اور اس کے بھائی مہلہل کی ہے۔ آپ فرماتے ہیں: اس نے ہمیں راستہ بتایا، پھر اس نے کہا: یہاں پر ایک آدمی رہتا ہے جس کو نبی اکرم صلی اللہ علیہ وسلم کی صحبت کی سعادت حاصل ہے، کیا آپ اس سے ملنا پسند کریں گے؟ میں نے کہا: جی ہاں۔ وہ ہمیں ایک ایسے بزرگ آدمی کے پاس لے گیا جس کی بھنویں جھک کر آنکھوں پر آئی ہوئی تھیں، وہ چمڑے کے ایک خیمے میں موجود تھے، ہم نے ان سے پوچھا: آپ کون ہیں؟ انہوں بتایا کہ ” میں عداء بن خالد “ ہوں، زمانہ جاہلیت میں، میں سیاہی مائل سفید گھوڑے کی سواری کیا کرتا تھا، ہم نے ان سے کہا: اللہ تعالیٰ آپ پر رحم کرے، آپ ہمیں نبی اکرم صلی اللہ علیہ وسلم کی کوئی حدیث سنائیں، انہوں نے بتایا کہ ہم نبی اکرم صلی اللہ علیہ وسلم کی بارگاہ میں موجود تھے، آپ اچانک گھبرا کر اٹھ کر گئے اور کچھ دیر بعد واپس تشریف لے آئے، پھر فرمایا: میں تمہیں تین دجالوں سے خبردار کرتا ہوں، سیدنا عبداللہ بن مسعود رضی اللہ عنہ نے عرض کی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، آپ نے ہمیں ایک کانے دجال اور ایک سب سے بڑے جھوٹے شخص کے بارے میں تو بتا دیا ہے، لیکن یا رسول اللہ صلی اللہ علیہ وسلم تیسرا کون ہے؟ آپ صلی اللہ علیہ وسلم نے فرمایا: ایک آدمی ہے، وہ ایسی قوم میں ظاہر ہو گا جن کا پہلا شخص بھی دھتکارا ہوا ہو گا اور آخری بھی دھتکارا ہوا ہو گا، ان پر لعنت ہے۔ وہ ہر طرف تباہی پھیلانے والی موت کے فتنہ میں مبتلا ہوں گے، اور دجال بہادر ہو گا، وہ آدم خور ہو گا۔ امام محمد نے فرمایا: وہ دجال سب لوگوں سے زیادہ جوان ہو گا۔ امام ابوبکر محمد بن اسحاق کی شرائط میں سے یہ بھی ہے کہ جب وہ ایسی حدیث روایت کرتے ہیں جس کو وہ صحیح قرار نہیں دیتے، تو اس کو روایت کرتے ہوئے فرماتے ہیں، یہ حدیث فلاں بن فلاں سے مروی ہے۔ اور میں اس کی عدالت کو نہیں جانتا۔ اسی حدیث کو ابن خزیمہ نے صحیح کے معیار پر نقل کیا ہے، اور آپ اس علم کے امام ہیں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8778]