سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم سے پوچھا گیا کہ دجال کے زمانے میں مومنوں کا طعام کیا ہو گا؟ آپ صلی اللہ علیہ وسلم نے فرمایا: (مومنوں کا وہی طعام ہو گا جو) فرشتوں کا طعام ہے، صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم فرشتوں کا طعام کیا ہے؟ آپ صلی اللہ علیہ وسلم نے فرمایا: ان کا طعام، اللہ تعالیٰ کی تسبیح و تہلیل ہے، اس زمانے میں جو شخص تسبیح و تہلیل کرے گا، اللہ تعالیٰ اس سے بھوک ختم فرما دے گا، اس کے بعد اس کو بھوک کا کوئی خوف نہیں رہے گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8773]

سیدنا ابوسعید خدری رضی اللہ عنہ فرماتے ہیں: جس نے سورہ کہف اسی طرح پڑھی جیسے وہ نازل ہوئی ہے، پھر وہ دجال كی طرف نكلے تو دجال اس پر غالب نہیں آ سكے گا۔ راوی كو شک ہے كہ یہاں پر سیدنا ابوسعید خدری نے ” لم یسلط علیہ “ کے الفاظ ارشاد فرمائے یا ” لم یكن لہ علیہ سبیل “ کے الفاظ بولے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس كو نقل نہیں كیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8774]

سیدنا سمرہ بن جندب رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: قریب ہے کہ اللہ تعالیٰ تمہارے ہاتھ عجم سے بھر دے گا، پھر وہ بہادر ہو جائیں گے، وہ میدان سے نہیں بھاگیں گے، وہ تمہارے ساتھ جنگیں کریں گے اور تمہارا مال غنیمت کھا جائیں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8775]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: لوگوں پر ایسا وقت آئے گا، جب جھوٹوں کو سچا کہا جائے گا اور سچے کو جھوٹا قرار دیا جائے گا، امین لوگوں کو خائن قرار دیا جائے گا اور خائن کو امانتیں سپرد کی جائیں گی، اور اس زمانے میں رویبضہ باتیں کرے گا۔ آپ صلی اللہ علیہ وسلم سے پوچھا گیا: یا رسول اللہ صلی اللہ علیہ وسلم رویبضہ کس کو کہتے ہیں: آپ صلی اللہ علیہ وسلم نے فرمایا: بے وقوف آدمی عوام الناس کے امور کے بارے میں گفتگو کریں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8776]

ابن قدامہ نے یحیی بن سعید انصاری کے واسطے سے مقبری سے روایت کیا ہے کہ اس زمانے میں فحاشی بہت عام ہو جائے گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اور یہ حدیث یحیی بن سعید انصاری کے واسطے سے مقبری سے بہت ہی غریب ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8777]