سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے جو بھی پیشین گوئی فرمائی تھی، ہم نے سب اپنی آنکھوں سے دیکھ لیا ہے، سوائے ایک بات کے، اور وہ یہ ہے کہ قیامت کے دن کچھ لوگوں سے کہا جائے گا، تم اپنے کوڑے رکھ دو اور دوزخ میں چلے جاؤ۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8790]

سیدنا خالد بن عرفطہ رضی اللہ عنہ فرماتے ہیں کہ رسول اللہ صلی اللہ علیہ وسلم نے مجھے فرمایا: اے خالد میرے بعد نئے نئے واقعات ہوں گے، فتنے ہوں گے، اختلافات ہوں گے، اے اللہ کے بندے اگر اس وقت تو قاتل کی بجائے مقتول بن سکے تو مقتول ہی بننا۔ ٭٭ علی بن زید قرشی یہ حدیث ابوعثمان نہدی سے روایت کرنے میں منفرد ہیں۔ اور امام بخاری رحمۃ اللہ علیہ اور امام مسلم رحمۃ اللہ علیہ نے علی کی روایات نقل نہیں کیں۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8791]

عبداللہ بن عبداللہ بن جابر بن عتیک بیان کرتے ہیں کہ عبداللہ بن عمرو، بنی معاویہ (یہ انصار کی ایک بستی ہے) میں ہمارے پاس آئے، اور کہنے لگے: کیا تم جانتے ہو کہ رسول اللہ صلی اللہ علیہ وسلم نے تمہاری اس مسجد میں کس مقام پر نماز پڑھی تھی؟ میں نے کہا: جی ہاں، ساتھ ہی میں نے مسجد کے ایک کونے کی جانب اشارہ بھی کیا، انہوں نے پوچھا: تمہیں وہ تین دعائیں معلوم ہیں جو رسول اللہ صلی اللہ علیہ وسلم نے اس مسجد میں مانگی تھیں؟ میں نے کہا: جی ہاں۔ انہوں نے کہا: وہ مجھے بھی بتاؤ، میں نے کہا: حضور صلی اللہ علیہ وسلم نے یہ دعا مانگی تھی کہ ان پر ان کے اغیار میں سے کوئی دشمن ان پر غالب نہ ہو، اور یہ لوگ قحط سے ہلاک نہ ہوں، میں دونوں دعائیں قبول ہو گئی تھیں، پھر آپ صلی اللہ علیہ وسلم نے دعا مانگی کہ یہ آپس میں ایک دوسرے کے ساتھ نہ جھگڑیں، اس سے اللہ تعالیٰ نے آپ صلی اللہ علیہ وسلم کو منع فرما دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8792]