سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: رمضان کے مہینے میں زور دار آواز لگائی جاتی ہے، وہ سوئے ہوئے کو بیدار کر دیتی ہے جاگتے ہوؤں کو بیدار رکھتی ہے پھر شوال میں ایک جماعت ظاہر ہو گی، پھر ذی الحجہ میں لوگوں کے جلنے کی آوازیں آئیں گی، محرم میں قریبی رشتوں کی بے حرمتی ہو گی، صفر میں موت ہو گی، ربیع الاول میں قبائل کا جھگڑا ہو گا، پھر جمادی اور رجب میں بہت ہی عجیب واقعات ہوں گے پالان لگائی ہوئی اونٹنی بیش بہا محل سے بھی بہتر ہو گی۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8793]

سیدنا عبدالرحمن فرماتے ہیں: میں سیدنا ابوہریرہ رضی اللہ عنہ کی عیادت کے لئے گیا، میں نے اپنے سینے کے ساتھ ان کی ٹیک لگوائی، پھر میں نے دعا مانگی ” اے اللہ ابوہریرہ کو شفا عطا فرما “۔ سیدنا ابوہریرہ رضی اللہ عنہ نے کہا: اے اللہ! اس کی دعا کو رد نہ فرما، پھر فرمایا: اے ابوسلمہ اگر تو مر سکے تو مر جا۔ میں نے کہا: اے ابوہریرہ! ہم تو زندگی سے محبت کرتے ہیں، آپ نے فرمایا: اس ذات کی قسم جس کے قبضہ قدرت میں میری جان ہے، علماء پر ایک زمانہ ایسا آئے گا کہ وہ سرخ سونے سے زیادہ موت کو پسند کریں گے۔ تم اپنے کسی فوت شدہ بھائی کی قبر پر آ کر حسرت کرتے ہوئے کہو گے: کاش اس کی جگہ قبر میں، میں ہوتا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس كو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8794]

ابوعبیدہ فرماتے ہیں: میں لوگوں سے عدی بن حاتم کی حدیث کے بارے میں پوچھا کرتا تھا حالانکہ وہ کوفہ میں ہی رہائش پذیر تھے۔ میں ان کے پاس آیا اور کہا: ایک حدیث ہے جو میں آپ کے حوالے سے بیان کرتا ہوں، آپ وہ حدیث خود مجھے سنایئے، انہوں نے کہا: جب نبی اکرم صلی اللہ علیہ وسلم نے اعلان نبوت فرمایا، مجھے آپ صلی اللہ علیہ وسلم سے بہت نفرت تھی، میں عرب کے دور دراز کے علاقے میں نکل گیا اور نفرت اسی طرح برقرار تھی، پھر میں روم میں چلا گیا، لیکن ابھی بھی نفرت میں کمی نہیں آئی تھی، (ایک دفعہ بیٹھے بٹھائے) میں نے سوچا کہ مجھے اس آدمی کے پاس جانا چاہئے، اگر یہ سچ بولے گا تو میں ضرور اس کی بات سنوں گا اور اگر یہ جھوٹ بول رہا ہو گا تو اس سے وہ میرا کچھ نہیں بگاڑ سکے گا۔ چنانچہ میں آپ صلی اللہ علیہ وسلم سے سوالات کرنے کے لئے آپ صلی اللہ علیہ وسلم کے پاس آ گیا، (میں نے ابھی کچھ بھی اظہار خیال نہیں کیا تھا اور نہ اپنی آمد کا مقصد بیان کیا تھا) آپ صلی اللہ علیہ وسلم نے فرمایا: تم ایسی چیز کے بارے میں سوال کرنے کے لئے آئے ہو جو تمہارے دین میں حلال نہیں ہے۔ گویا کہ میں آپ کو ذلت میں دیکھ رہا ہوں، آپ صلی اللہ علیہ وسلم نے فرمایا: اے عدی بن حاتم، تم اسلام قبول کر لو، سلامتی پاؤ گے۔ اور شاید کہ تمہیں اسلام قبول کرنے سے یہ چیز مانع ہے کہ میرے قریب غریب لوگ ہیں۔ تم میرے پاس لوگوں کا جمگھٹا دیکھتے ہو، پھر فرمایا: کیا تم نے حیرہ (ایک جگہ کا نام ہے) دیکھا ہے؟ میں نے کہا: میں نے نہیں دیکھا، البتہ میں اس جگہ کو جانتا ہوں۔ انہوں نے فرمایا: قریب ہے کہ ایک نوجوان لڑکی بغیر کسی ہمراہی کے، اکیلی وہاں سے بیت اللہ کے طواف کو آئے۔ اور ہم پر کسریٰ کے خزانے کھل جائیں گے۔ میں نے پوچھا: کسریٰ بن ہرمز؟ انہوں نے فرمایا: کسریٰ بن ہرمز، اور کوئی شخص صدقے کا مال نہیں لے گا۔ آپ فرماتے ہیں: پھر میں نے دیکھ بھی لیا ہے کہ ایک عورت اکیلی سفر کرتی ہے۔ اور دوسری بات پر میں رسول اللہ صلی اللہ علیہ وسلم کے فرمان کے برحق ہونے کی قسم بھی کھا سکتا ہوں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8795]