سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: 6 اعمال میں جلدی کرو * مغرب کی جانب سے سورج طلوع ہونے سے پہلے * دھواں نمودار ہونے سے پہلے۔ * دجال کے خروج سے پہلے۔ * دابۃ الارض کے ظہور سے پہلے۔ * اور کسی کے امر خصوصی سے پہلے۔ * اور امر عامہ سے پہلے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ تاہم امام مسلم رحمۃ اللہ علیہ نے عبداللہ بن رباح کی روایت نقل کی ہے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8787]

سیدنا انس بن مالک رضی اللہ عنہ فرماتے ہیں: میں ایک آدمی کے ہمراہ، ام المومنین سیدہ عائشہ رضی اللہ عنہا کی خدمت میں حاضر ہوا، اس آدمی نے کہا: اے ام المومنین! آپ ہمیں زلزلہ کے بارے میں کوئی حدیث سنائیں، ام المومنین نے ان سے منہ پھیر لیا، سیدنا انس رضی اللہ عنہ فرماتے ہیں: پھر میں نے کہا: اے ام المومنین! آپ ہمیں زلزلے کے بارے میں کوئی حدیث سنائیں، آپ نے فرمایا: اے انس! اگر میں تجھے وہ حدیث سنا دوں تو تم ساری زندگی پریشانی کے عالم میں گزارو گے، اور جب تم قیامت کے دن اٹھو گے، وہ پریشانی اس وقت بھی تمہارے دل میں موجود ہو گی۔ میں نے پھر کہا: اے میری ماں، آپ ہمیں وہ حدیث سنا دیجئے، آپ رضی اللہ عنہا نے فرمایا: بے شک جب عورت اپنے شوہر کے گھر سے باہر اپنے کپڑے اتارتی ہے تو وہ اپنے اور اللہ کے درمیان حجاب کو پھاڑ دیتی ہے، اور اگر عورت غیر مرد کے لئے خوشبو لگائے تو وہ اس کے لئے آگ اور شرم کا باعث ہو گی، اور اس کے بعد جب لوگ زنا کو اپنا حق سمجھ لیں، شراب نوشی میں مبتلا ہو جائیں، گانے باجے میں لگ جائیں تو اللہ تعالیٰ آسمانوں سے ان کے لئے عذاب نازل فرمائے گا، اللہ تعالیٰ زمین سے فرمائے گا: ان پر زلزلے لا، اگر وہ توبہ کر کے گناہوں سے باز آ جائیں گے تو ٹھیک ہے، ورنہ ان کو تباہ کر دیا جائے گا۔ سیدنا انس رضی اللہ عنہ نے پوچھا: یہ زلزلہ ان کے لئے سزا ہو گا، ام المومنین نے فرمایا: مومنوں کے لئے رحمت، برکت اور نصیحت اور کافروں کے لئے سزا اور عذاب ہو گا۔ سیدنا انس فرماتے ہیں: رسول اللہ صلی اللہ علیہ وسلم کے بعد اس حدیث کو سن کر جتنی خوشی ہوئی، اس سے زیادہ کسی چیز پر خوشی نہیں ہوئی۔ آپ نے فرمایا: بلکہ میں ساری زندگی خوشی خوشی گزاروں گا، اور جب میں قیامت میں اٹھوں گا تب بھی یہ خوشی میرے دل میں موجود ہو گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8788]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میں نے اپنے رب سے تین چیزیں مانگیں، اس نے مجھے دو چیزیں عطا فرمادیں، اور ایک سے منع فرما دیا، میں نے اللہ تعالیٰ سے مانگا کہ میری امت کو قحط سے ہلاک نہیں فرمائے گا، اللہ تعالیٰ نے میری یہ دعا قبول فرما لی، میں نے دعا مانگی کہ ان کے اغیار میں سے کوئی دشمن ان پر غالب نہ آئے، اللہ تعالیٰ نے یہ بھی قبول فرما لی۔ میں نے دعا مانگی کہ یہ آپس میں نہ لڑیں، تو اللہ تعالیٰ نے مجھے اس سے منع فرما دیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8789]