سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے اپنے صحابہ کی موجودگی میں یہ آیت تلاوت کی: يَا أَيُّهَا النَّاسُ اتَّقُوا رَبَّكُمْ إِنَّ زَلْزَلَةَ السَّاعَةِ شَيْءٌ عَظِيمٌ [الحج: 1] ”اے لوگو! اپنے رب سے ڈرو بیشک قیامت کا زلزلہ بڑی سخت چیز ہے “ یہ آیت آخر تک پڑھی پھر فرمایا: تم جانتے ہو، یہ کس دن کی بات ہو رہی ہے؟ صحابہ کرام رضی اللہ عنہم نے عرض کی: اللہ اور اس کا رسول ہی بہتر جانتے ہیں، آپ صلی اللہ علیہ وسلم نے فرمایا: یہ وہ دن ہے جب اللہ تعالیٰ سیدنا آدم علیہ السلام سے فرمائے گا: اٹھیئے اور دوزخیوں کو دوزخ میں بھیج دیجئے، آدم علیہ السلام پوچھیں گے کہ یا اللہ کتنے لوگوں کو؟ اللہ تعالیٰ نے فرمایا: ہزار میں سے 999 لوگوں کو دوزخ میں اور ایک کو جنت میں بھیج دو، یہ بات صحابہ کرام پر بہت گراں گزری، سب پریشان اور غمگین ہو گئے، رسول اللہ صلی اللہ علیہ وسلم نے فرمایا: مجھے امید ہے کہ تم جنتیوں کا ایک حصہ ہو گے، پھر صحابہ کرام خوش ہو گئے، نبی اکرم صلی اللہ علیہ وسلم نے فرمایا: عمل کرو، اور خوش ہو جاؤ، کیونکہ تمہارے اندر یاجوج اور ماجوج دو ایسی مخلوقیں ہیں، کہ یہ جس قوم کے ساتھ ہو جاتی ہیں ان کو کثیر کر دیتی ہیں، اور باقی لوگوں میں تمہارا تناسب ایسے ہی ہو گا جیسے اونٹ کے پہلو میں تل، یا کسی جانور کی ٹانگ میں داغ۔ اور وہ (جنت میں جانے والا) ہزارواں حصہ میری امت ہی ہو گی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8911]