سیدنا عبداللہ بن عباس رضی اللہ عنہما کے بارے میں مروی ہے کہ انہوں نے یہ آیت پڑھی يَوْمَ تَشَقَّقُ السَّمَاءُ بِالْغَمَامِ وَنُزِّلَ الْمَلَائِكَةُ تَنْزِيلًا [الفرقان: 25] ” اور جس دن پھٹ جائے گا آسمان بادلوں سے اور فرشتے اتارے جائیں گے پوری طرح “ اور فرمایا: دنیا کا آسمان پھٹ جائے گا، اور ہر آسمان سے فرشتے اتریں گے، آسمان دنیا کے فرشتے بھی اتریں گے، ان کی تعداد زمین کے تمام انسانوں اور جنات سے زیادہ ہے، زمین والے، ان سے پوچھیں گے: کیا تمہارے اندر ہمارا رب بھی موجود ہے؟ وہ کہیں گے: نہیں۔ پھر دوسرے آسمان والے نازل ہوں گے، ان کی تعداد پہلے آسمان والوں اور دنیا کے تمام جنات اور انسانوں سے زیادہ ہو گی، زمین والے ان سے پوچھیں گے: کیا تمہارے اندر ہمارا رب ہے؟ وہ کہیں گے نہیں۔ پھر تیسرے آسمان والے فرشتے نازل ہوں گے، ان کی تعداد پہلے، دوسرے آسمان کے فرشتوں اور زمین کے انسان اور جنات سے زیادہ ہو گی، زمین والے ان سے بھی پوچھیں گے کہ کیا تمہارے اندر ہمارا رب موجود ہے؟ وہ کہیں گے: نہیں۔ پھر چوتھے آسمان والے فرشتے نازل ہوں گے، ان کی تعداد پہلے، دوسرے اور تیسرے آسمان کے فرشتوں اور زمین کے انسان اور جنات سے زیادہ ہو گی، زمین والے ان سے بھی پوچھیں گے کہ کیا تمہارے اندر ہمارا رب موجود ہے؟ وہ کہیں گے: نہیں۔ پھر پانچویں آسمان والے فرشتے نازل ہوں گے، ان کی تعداد پہلے، دوسرے، تیسرے اور چوتھے آسمان کے فرشتوں اور زمین کے انسان اور جنات سے زیادہ ہو گی، زمین والے ان سے بھی پوچھیں گے کہ کیا تمہارے اندر ہمارا رب موجود ہے؟ وہ کہیں گے: نہیں۔ پھر چھٹے آسمان والے فرشتے نازل ہوں گے، ان کی تعداد پہلے، دوسرے، تیسرے، چوتھے اور پانچویں آسمان کے فرشتوں اور زمین کے انسان اور جنات سے زیادہ ہو گی، زمین والے ان سے بھی پوچھیں گے کہ کیا تمہارے اندر ہمارا رب موجود ہے؟ وہ كہیں گے: نہیں۔ پہر ساتویں آسمان والے فرشتے نازل ہوں گے، ان كی تعداد پہلے، دوسرے، تیسرے، چوتھے، پانچویں اور چھٹے آسمان کے فرشتوں اور زمین کے انسان اور جنات سے زیادہ ہو گی۔ زمین والے ان سے بھی پوچھیں گے کہ کیا تمہارے اندر ہمارا رب موجود ہے؟ وہ کہیں گے: نہیں۔ پھر کروبیین فرشتے نازل ہوں گے ان کی تعداد ساتوں آسمانوں کے فرشتوں اور زمین کے تمام جنات اور انسانوں سے زیادہ ہو گی۔ اور جو فرشتے عرش كو اٹھائے ہوئے ہیں، ان کے سینگ بھی ہیں اور کھر بھی ہیں جیسا كہ جنگلی گائے کے سینگ اور كھر ہوتے ہیں، پھر حضور صلی اللہ علیہ وسلم نے ان کے دو قدموں کے درمیان كی مسافت بتائی، ان کے قدم کے تلوے سے ٹخنے تک كی مسافت پانچ سو سال كی مسافت ہے، اور ان کے ٹخنے سے گھٹنے تک پانچ سو سال كی مسافت ہے، اور گھٹنے سے ناک تک پانچ سو سال كی مسافت ہے، اور ان كی ہنسلی سے ان کے تھن تک پانچ سو سال كی مسافت ہے۔ ٭٭ اس حدیث کے تمام راوی محتج بہ (ان کی روایات سے استدلال کیا گیا) ہیں، سوائے علی بن زید بن جدعان قرشی کے۔ یہ حدیث اگرچہ سیدنا عبداللہ بن عباس رضی اللہ عنہما تک موقوف ہے لیکن بہت پسندیدہ حدیث ہے۔ [المستدرك على الصحيحين/كِتَابُ: الْأَهْوَالِ/حدیث: 8913]

سیدنا عبداللہ بن مسعود رضی اللہ عنہ کے بارے میں مروی ہے کہ انہوں نے یہ آیت پڑھی يَوْمَ تُبَدَّلُ الْأَرْضُ غَيْرَ الْأَرْضِ [إبراهيم: 48] ”جس دن بدل دی جائے گی زمین، اس زمین کے سوا “ پھر فرمایا: زمین ایک صاف ستھرے سفید انڈے کی مانند ہو گی، اس میں خون کا ایک قطرہ تک نہیں بہایا گیا تھا، اور نہ ہی اس میں کوئی گناہ کیا گیا تھا، پکارنے والا ان سب تک اپنی آواز پہنچائے گا اور وہ ایک ہی نگاہ میں سب کو دیکھے گا، سب لوگ ننگے پاؤں اور ننگے بدن کھڑے ہوں گے، سب اپنے پسینے میں ڈوب رہے ہوں گے۔ [المستدرك على الصحيحين/كِتَابُ: الْأَهْوَالِ/حدیث: 8914]