سیدنا عبداللہ رضی اللہ عنہ، اللہ تعالیٰ کا ارشاد {زِدْنَاهُمْ عَذَابًا فَوْقَ الْعَذَابِ} [النحل: 88] ” ہم نے عذاب پر عذاب بڑھایا بدلہ ان کے فساد کا “ کے بارے میں فرماتے ہیں: وہا پر ایسے بچھو ہیں، جن کے ڈنک، کھجوروں کے لمبے لمبے درختوں کی مانند ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8970]

سیدنا عبداللہ بن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: ہر زمین سے دوسری زمین تک پانچ سو سال کی مسافت ہے، ان میں س سے اوپر والی ایک مچھلی کی پشت پر ہے، اس کے دونوں کنارے آسمان سے ملتے ہیں، اور وہ مچھلی ایک چٹان پر ہے، اور وہ چٹان ایک فرشتے کے ہاتھ میں ہے۔ اور دوسری ہواؤں کو کنٹرول کرتی ہے، جب اللہ تعالیٰ نے عاد کو ہلاک کرنے کا ارادہ کیا تو ہوا کے نگران فرشتے کو حکم دیا کہ وہ ان پر ایسی ہوا چلائے جو عاد کو ہلاک کر دے، اس نے کہا: اے میرے رب! میں ان پر بیل کے گلے کی مقدار میں ہوا بھیجتا ہوں، اللہ تبارک و تعالیٰ نے فرمایا: یہ زمین کے لیے اور ان لوگوں کے لیے جو اس پر ہیں سب کے لیے کافی ہے۔ لیکن ان پر ایک مہر کی مقدار میں ہوا بھیج، یہ وہی بات ہے، جس کا ذکر اللہ تبارک و تعالیٰ نے اپنی کتاب میں ان الفاظ کے ہمراہ کیا ہے {مَا تَذَرُ مِنْ شَيْءٍ أَتَتْ عَلَيْهِ إِلَّا جَعَلَتْهُ كَالرَّمِيمِ} [الذاريات: 42] ” جس چیز پر گزرتی اس کو گلی ہوئی چیز کی طرح کر چھوڑتی “ اور تیسری میں دوزخ کا ایک پتھر ہے۔ اور چوتھی میں جہنم کی گندھک ہے۔ صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم کیا آگ کی بھی گندھک ہوتی ہے، آپ صلی اللہ علیہ وسلم نے فرمایا: جی ہاں، اس ذات کی قسم جس کے قببضہ قدرت میں میری جان ہے، اس میں گندھک کی وادیاں ہیں اور ان میں مضبوط پہاڑ ڈالے جائیں تو وہ بھی سما سکتے ہیں۔ پانچویں میں جہنم کے سانپ ہیں، ان کے منہ وادی کے برابر ہیں، وہ کافر کو ایک مرتبہ ڈنک مار دیں تو اس کی ہڈیوں پر گوشت کا ایک ٹکڑا تک نہ بچے گا، چھٹی میں جہنم کے بچھو ہیں، سب سے چھوٹا بچھو پالان کسے ہوئے خچر کے برابر ہو گا۔ وہ کسی کافر کو ایک ڈنک مارے گا تو وہ اس سے دوزخ کی گرمی بھول جائے گا، ساتویں میں سقر ہے، اور اسی میں ابلیس بھی ہے۔ اس کو لوہے کی زنجیروں سے جکڑا ہوا ہے، ایک ہاتھ آگے اور ایک پیچھے باندھا ہوا ہے، جب اللہ تعالیٰ اپنے کسی بندے پر اس کو چھوڑنا چاہتا ہے تو اس کو اس بندے کے لیے کھول دیتا ہے۔ ٭٭ یہ حدیث صحیح ہے لیکن امام بخاری رحمۃ اللہ علیہ اور امام مسلم نے اس کو نقل نہیں کیا۔ اس حدیث کو ابوالسمح، عیسیٰ بن ہلال سے روایت کرنے میں منفرد ہیں۔ میں نے اس سے پہلے امام یحیی بن معین کے حوالے سے ان کی عدالت بیان کر دی ہے۔ [المستدرك على الصحيحين/كِتَابُ: الْأَهْوَالِ/حدیث: 8971]

ام المومنین سیدہ عائشہ رضی اللہ عنہا فرماتی ہیں: جب سورہ مزمل کی یہ آیت نازل ہوئی {وَذَرْنِي وَالْمُكَذِّبِينَ أُولِي النَّعْمَةِ وَمَهِّلْهُمْ قَلِيلًا إِنَّ لَدَيْنَا أَنْكَالًا وَجَحِيمًا} [المزمل: 12] ” اور مجھ پر چھوڑ دو ان جھٹلانے والے مال داروں کو اور انہیں تھوڑی مہلت دو، بیشک ہمارے پاس بھاری بیڑیاں ہیں بھڑکتی آگ “۔ تو زیادہ عرصہ نہیں گزرا تھا کہ جنگ بدر کا واقعہ رونما ہو گیا۔ سیدنا عبداللہ بن عباس رضی اللہ عنہما فرماتے ہیں: {وَطَعَامًا ذَا غُصَّةٍ} [المزمل: 13] ” اور گلے میں پھنستا کھانا “ سے مراد ” زقوم “ کا درخت ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8972]