سیدنا عبداللہ بن مسعود رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میرے پاس براق لایا گیا، میں جبریل امین علیہ السلام کے پیچھے اس پر سوار ہو گیا، وہ ہمیں لے کر روانہ ہوا، وہ جب اوپر اٹھتا تو اس کے پاؤں بھی اوپر اٹھتے، اور جب وہ نیچے آتا تو اس کے ہاتھ بلند ہوتے، یہ ہمیں ایک تاریک اور بدبودار جگہ لے گیا، پھر جب ہم خوشگوار زمین میں پہنچے تو میں نے کہا: اے جبریل ہم پہلے تاریک اور بدبودار جگہ سے گزرے پھر اس خوشبودار مقام پر آ گئے، یہ کون سے مقامات ہیں؟ سیدنا جبریل امین علیہ السلام نے کہا: وہ دوزخ کی زمین تھی اور یہ جنت کی جگہ ہے۔ آپ صلی اللہ علیہ وسلم نے فرمایا: میں ایک آدمی کے پاس پہنچا وہ کھڑا نماز پڑھ رہا تھا، اس نے پوچھا: اے جبریل! یہ تیرے ساتھ کون ہیں؟ سیدنا جبریل امین علیہ السلام نے کہا: یہ آپ کے بھائی محمد صلی اللہ علیہ وسلم ہیں، انہوں نے خوش آمدید کہا اور میرے لئے برکت کی دعا کی، اور مجھ سے کہا: آپ اپنی امت کے لئے آسانی مانگنا، میں نے پوچھا: جبریل! یہ کون ہیں؟ جبریل امین علیہ السلام نے بتایا کہ وہ آپ کے بھائی سیدنا عیسیٰ بن مریم علیہ السلام ہیں، پھر آگے بڑھ گئے، میں نے کچھ لوگوں کی آوازیں سنی، میں ان میں سے ایک آدمی کے پاس آیا، اس نے کہا: اے جبریل علیہ السلام، یہ کون ہیں؟ سیدنا جبریل امین علیہ السلام نے کہا: یہ آپ کے بھائی محمد صلی اللہ علیہ وسلم ہیں، انہوں نے بھی خوش آمدید کہا، اور میرے لئے برکت کی دعا فرمائی، اور مجھ سے کہا: اپنی امت کے لئے آسانی مانگنا، میں نے پوچھا اے جبریل! یہ کون ہے؟ سیدنا جبریل علیہ السلام نے بتایا کہ یہ آپ کے بھائی سیدنا موسیٰ علیہ السلام ہیں۔ میں نے کیا۔ ان کی آواز جو آ رہی تھی وہ کیا تھی؟ سیدنا جبریل امین علیہ السلام نے کہا: وہ اپنے رب سے ہم کلام ہو رہے تھے، میں نے پوچھا: اپنے رب سے؟ جبریل نے کہا: جی ہاں۔ اس وجہ سے ان کی طبیعت کی شدت بالکل بجا ہے، ہم مزید آگے بڑھ گئے، ہم نے کچھ قندیلیں روشن دیکھیں، میں نے پوچھا: جبریل! یہ کیا ہے؟ سیدنا جبریل امین علیہ السلام نے بتایا کہ آپ کے دادا سیدنا ابراہیم علیہ السلام کا درخت ہے، کیا آپ اس کے قریب جانا چاہتے ہیں؟ میں نے کہا: جی ہاں۔ ہمیں ان کے قریب کر دیا گیا، انہوں نے مجھے خوش آمدید کہا اور میرے لئے برکت کی دعا کی، پھر ہم آگے بڑھ گئے اور بیت المقدس پہنچ گئے، اور جہاں پر انبیاء کرام علیہم السلام اپنے جانور باندھا کرتے تھے وہاں پر ہم نے براق کو باندھا، پھر میں مسجد میں داخل ہو گیا، وہاں پر تمام انبیاء کرام موجود تھے جن کے نام بیان کئے گئے ہیں وہ بھی موجود تھے اور جن کے نام نہیں بیان کئے گئے وہ بھی وہاں موجود تھے، میں نے ان سب کو نماز پڑھائی سوائے تین لوگوں کے۔ سیدنا ابراہیم علیہ السلام، سیدنا موسیٰ علیہ السلام، سیدنا عیسیٰ علیہ السلام۔ ٭٭ ابوحمزہ میمون الاعور اس حدیث کو روایت کرنے میں منفرد ہیں۔ ہمارے ائمہ کے اقوال اس بارے میں مختلف ہیں، اس میں وہ اضافے موجود ہیں جن کو امام بخاری رحمۃ اللہ علیہ اور امام مسلم رحمۃ اللہ علیہ نے ذکر معراج میں نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 9008]

سیدنا ابوبردہ اپنے والد سے روایت کرتے ہیں کہ نبی اکرم صلی اللہ علیہ وسلم نے ارشاد فرمایا: میری امت کا تین گروہوں میں حشر ہو گا، ایک جماعت بغیر حساب کے جنت میں داخل ہو گی، ایک جماعت سے ہلکا پھلکا حساب لیا جائے گا، اور ایک اور جماعت ہو گی وہ اپنی پشت پر بلند و بالا پہاڑوں کی مانند گناہ لے کر آئیں گے، اللہ تعالیٰ ان سے پوچھے گا حالانکہ وہ سب کچھ بہت اچھی طرح خود جانتا ہے، اللہ تعالیٰ فرمائے گا: یہ میرا وہ بندہ ہے جس نے میرے ساتھ کسی کو شریک نہیں ٹھہرایا تھا، اگرچہ ان کی پشت پر گناہوں اور خطاؤں کا انبار موجود ہے، لیکن ان کے گناہ ان سے ہٹا کر یہودیوں اور نصرانیوں پر ڈال دیئے جائیں اور اس کو میری رحمت سے جنت میں داخل کر دو۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 9009]