حضرت انس بن مالک رضی اللہ عنہ سے روایت ہے کہ ”نبی صلی اللہ علیہ وسلم فتح مکہ کے دن مکہ مکرمہ میں داخل ہوئے تو آپ کے سر پر خود تھا۔“ [سنن ابن ماجه/كتاب الجهاد/حدیث: 2805]

حضرت سائب بن یزید رضی اللہ عنہ سے روایت ہے کہ انہوں نے کہا: ”نبی صلی اللہ علیہ وسلم نے غزوۂ احد کے دن دو زرہیں اوپر نیچے پہنیں۔“ [سنن ابن ماجه/كتاب الجهاد/حدیث: 2806]

حضرت سلیمان بن حبیب رضی اللہ عنہ سے روایت ہے، انہوں نے کہا: ہم لوگ حضرت ابوامامہ رضی اللہ عنہ کی خدمت میں حاضر ہوئے۔ انہوں نے ہماری تلواروں کو کچھ چاندی سے مزین دیکھا تو ناراض ہوئے اور فرمایا: ”لوگوں (صحابہ کرام رضی اللہ عنہم) کو بڑی بڑی فتوحات حاصل ہوئیں، ان کی تلواریں تو سونے چاندی سے مزین نہیں تھیں لیکن (ان پر) سیسہ، لوہا اور «الْعَلَابِيُّ» (لگا ہوتا تھا۔)“ ابوالحسن قطان رحمہ اللہ نے فرمایا: ” «الْعَلَابِيُّ» پٹھے کو کہتے ہیں۔“ [سنن ابن ماجه/كتاب الجهاد/حدیث: 2807]

حضرت عبداللہ بن عباس رضی اللہ عنہ سے روایت ہے کہ ”رسول اللہ صلی اللہ علیہ وسلم نے اپنی تلوار ”ذوالفقار“ جنگِ بدر کے موقع پر غنیمت میں سے لی تھی۔“ [سنن ابن ماجه/كتاب الجهاد/حدیث: 2808]

حضرت علی رضی اللہ عنہ سے روایت ہے، انہوں نے فرمایا: ”حضرت مغیرہ بن شعبہ رضی اللہ عنہ جب نبی صلی اللہ علیہ وسلم کی معیت میں جہاد کے لیے تشریف لے جاتے تو اپنے ساتھ نیزہ بھی اٹھا کر لے جاتے۔ جب واپس ہوتے تو نیزہ وہیں پھینک دیتے، اس خیال سے کہ کوئی اٹھا کر لے آئے گا۔ حضرت علی رضی اللہ عنہ نے فرمایا: میں یہ بات رسول اللہ صلی اللہ علیہ وسلم کو بتاؤں گا۔ نبی صلی اللہ علیہ وسلم نے (حضرت مغیرہ رضی اللہ عنہ سے) فرمایا: ایسا نہ کرو، اگر تم ایسا کرو گے تو واقعتاً گمشدہ چیز بھی کوئی نہیں اٹھائے گا۔“ [سنن ابن ماجه/كتاب الجهاد/حدیث: 2809]

حضرت علی رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم کے ہاتھ میں عربی کمان تھی، آپ نے ایک شخص کے ہاتھ میں فارسی کمان دیکھی تو فرمایا: ”یہ کیا ہے؟ اسے پھینک دو۔ تم اس طرح کی (عربی) کمانیں اور نیزے استعمال کیا کرو، اللہ تعالیٰ ان کے ذریعے سے دین میں تمہاری مدد فرمائے گا اور تمہیں ملکوں میں اقتدار عطا فرمائے گا۔“ [سنن ابن ماجه/كتاب الجهاد/حدیث: 2810]