حضرت عبداللہ بن عمر رضی اللہ عنہما سے روایت ہے، انہوں نے فرمایا: نبی صلی اللہ علیہ وسلم نے مسجد کے قبلے کی طرف تھوک دیکھا جبکہ آپ لوگوں کے آگے کھڑے ہو کر انہیں نماز پڑھا رہے تھے، آپ نے اسے زائل کر دیا۔ اس کے بعد جب نماز سے فارغ ہوئے تو فرمایا: ”جب تم میں سے کوئی نماز میں مشغول ہوتا ہے تو اللہ تعالیٰ اس کے سامنے چہرے کی طرف ہوتا ہے، لہٰذا کوئی شخص نماز میں اپنے سامنے نہ تھوکے۔“ اس روایت کو موسیٰ بن عقبہ اور ابن ابی رواد نے حضرت نافع سے بیان کیا ہے۔ [صحيح البخاري/كتاب الأذان (صفة الصلوة)/حدیث: 753]

حضرت انس بن مالک رضی اللہ عنہ سے روایت ہے، انہوں نے فرمایا کہ ایک دن مسلمان نماز فجر میں مشغول تھے کہ اچانک رسول اللہ صلی اللہ علیہ وسلم سامنے آ گئے۔ آپ صلی اللہ علیہ وسلم نے حضرت عائشہ رضی اللہ عنہا کے حجرے کا پردہ اٹھایا اور مسلمانوں کی طرف دیکھا جبکہ اس وقت وہ نماز میں صف بستہ تھے۔ آپ صلی اللہ علیہ وسلم خوشی کے باعث مسکرانے لگے۔ حضرت ابوبکر رضی اللہ عنہ اپنے الٹے پاؤں پیچھے ہٹنے لگے تاکہ خود صف میں شامل ہو جائیں کیونکہ انہوں نے سمجھا کہ آپ صلی اللہ علیہ وسلم باہر تشریف لانا چاہتے ہیں۔ اور مسلمانوں نے قصد کر لیا کہ مارے خوشی کے اپنی نماز توڑ دیں لیکن آپ صلی اللہ علیہ وسلم نے انہیں اشارہ فرمایا کہ ”تم اپنی نماز کو پورا کرو“، پھر آپ صلی اللہ علیہ وسلم نے پردہ نیچے کر دیا اور اسی دن کے آخری حصے میں آپ صلی اللہ علیہ وسلم کی وفات ہو گئی۔ [صحيح البخاري/كتاب الأذان (صفة الصلوة)/حدیث: 754]

حضرت جابر بن سمرہ رضی اللہ عنہما سے روایت ہے، انہوں نے فرمایا کہ اہل کوفہ نے حضرت عمر رضی اللہ عنہ سے حضرت سعد بن ابی وقاص رضی اللہ عنہ کی شکایت کی تو حضرت عمر رضی اللہ عنہ نے انہیں معزول کر کے حضرت عمار بن یاسر رضی اللہ عنہما کو ان (کوفیوں) پر متعین کر دیا۔ الغرض ان لوگوں نے حضرت سعد رضی اللہ عنہ کی بہت سی شکایتیں کیں حتیٰ کہ یہ بھی کہہ دیا کہ وہ اچھی طرح نماز نہیں پڑھاتے، اس پر حضرت عمر رضی اللہ عنہ نے انہیں بلا بھیجا اور فرمایا: ”اے ابواسحاق! یہ لوگ کہتے ہیں کہ تم نماز اچھی طرح نہیں پڑھتے ہو۔“ انہوں نے جواب دیا: ”اللہ کی قسم! میں تو انہیں رسول اللہ صلی اللہ علیہ وسلم کی طرح نماز پڑھاتا تھا اور اس میں ذرہ بھر بھی کوتاہی کو روا نہیں رکھتا تھا۔ میں نمازِ عشاء پڑھاتا تو اس کی پہلی دو رکعتوں میں طویل قیام کرتا اور آخری دو رکعتوں میں تخفیف کرتا تھا۔“ حضرت عمر رضی اللہ عنہ نے فرمایا: ”اے ابواسحاق! تمہاری نسبت ہمارا گمان بھی یہی ہے۔“ پھر حضرت عمر رضی اللہ عنہ نے ایک شخص یا چند اشخاص کو حضرت سعد رضی اللہ عنہ کے ہمراہ کوفہ روانہ کیا (تاکہ وہ اہل کوفہ سے حضرت سعد رضی اللہ عنہ سے متعلق شکایات کی تحقیق کریں) انہوں نے وہاں جا کر کوئی مسجد نہ چھوڑی جہاں حضرت سعد رضی اللہ عنہ کا حال نہ پوچھا ہو، سب لوگوں نے ان کی تعریف کی، یہاں تک کہ وہ قبیلہ عبس کی مسجد میں گئے تو وہاں ایک شخص کھڑا ہوا جس کی کنیت ابوسعدہ تھی اور اسے اسامہ بن قتادہ کہا جاتا تھا، وہ بولا: ”جب تم نے ہمیں قسم دلائی ہے تو (سنو!) سعد (رضی اللہ عنہ) نہ خود لشکر کے ساتھ جہاد پر جاتے تھے، نہ مال غنیمت برابر تقسیم کرتے تھے اور نہ ہی مقدمات میں انصاف سے کام لیتے تھے۔“ حضرت سعد رضی اللہ عنہ نے یہ سن کر فرمایا: ”اللہ کی قسم! میں تجھے تین بد دعائیں دیتا ہوں: «اللَّهُمَّ إِنْ كَانَ عَبْدُكَ هَذَا كَاذِبًا، قَامَ رِيَاءً وَسُمْعَةً، فَأَطِلْ عُمْرَهُ، وَأَطِلْ فَقْرَهُ، وَعَرِّضْهُ لِلْفِتَنِ» ”اے اللہ! اگر تیرا یہ بندہ جھوٹا ہے اور محض دکھاوے یا شہرت کے لیے کھڑا ہوا ہے تو اس کی عمر دراز کر دے، اس کی فقیری بڑھا دے اور اسے فتنوں میں مبتلا کر دے۔““ چنانچہ ایسا ہی ہوا، اس کے بعد جب اس سے اس کا حال دریافت کیا جاتا تو وہ کہتا کہ میں ایک آفت رحضرت اور بڑی عمر کا بوڑھا ہوں، مجھے حضرت سعد رضی اللہ عنہ کی بددعا لگ گئی ہے۔ عبدالملک راوی کہتے ہیں کہ میں نے بھی اسے دیکھا تھا، بڑھاپے کی حالت میں اس کے دونوں ابرو آنکھوں پر گرنے کے باوجود وہ راستے میں چلتی چھوکریوں کو چھیڑتا اور ان پر دست درازی کرتا پھرتا تھا۔ [صحيح البخاري/كتاب الأذان (صفة الصلوة)/حدیث: 755]

حضرت عبادہ بن صامت رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے سورہ فاتحہ نہیں پڑھی، اس کی نماز ہی نہیں ہوئی۔“ [صحيح البخاري/كتاب الأذان (صفة الصلوة)/حدیث: 756]

حضرت ابوہریرہ رضی اللہ عنہ سے روایت ہے کہ ایک دفعہ رسول اللہ صلی اللہ علیہ وسلم مسجد میں تشریف لائے، اتنے میں ایک آدمی آیا اور اس نے نماز پڑھی پھر اس نے نبی صلی اللہ علیہ وسلم کو سلام کیا۔ آپ نے (سلام کا جواب دینے کے بعد) فرمایا: ”واپس جاؤ اور نماز پڑھو تم نے نماز نہیں پڑھی۔“ وہ آدمی واپس گیا اور اسی طرح نماز پڑھی جیسے اس نے (پہلے) پڑھی تھی۔ پھر اس نے آ کر نبی صلی اللہ علیہ وسلم کو سلام کیا۔ آپ نے (سلام کا جواب دینے کے بعد) فرمایا: ”واپس جاؤ اور نماز پڑھو تم نے نماز نہیں پڑھی۔“ پھر اسی طرح تین دفعہ ہوا بالآخر اس نے کہا: قسم ہے اس اللہ کی جس نے آپ کو حق کے ساتھ بھیجا ہے! میں اس سے اچھی نماز نہیں پڑھ سکتا، لہٰذا آپ مجھے بتا دیجیے۔ آپ نے فرمایا: ”اچھا جب تم نماز کے لیے کھڑے ہو تو «اللهُ أَكْبَرُ» ”اللہ اکبر“ کہو، پھر قرآن سے جو تمہیں یاد ہو پڑھو۔ اس کے بعد اطمینان سے رکوع کرو، پھر سر اٹھاؤ اور سیدھے کھڑے ہو جاؤ۔ پھر سجدہ کرو اور سجدے میں اطمینان سے رہو۔ پھر سر اٹھا کر اطمینان سے بیٹھ جاؤ، اسی طرح اپنی پوری نماز مکمل کرو۔“ [صحيح البخاري/كتاب الأذان (صفة الصلوة)/حدیث: 757]

حضرت جابر بن سمرہ رضی اللہ عنہما سے روایت ہے، انہوں نے کہا کہ حضرت سعد بن ابی وقاص رضی اللہ عنہ نے فرمایا: میں اہل کوفہ کو (بعد از دوپہر) شام کی دونوں نمازیں رسول اللہ صلی اللہ علیہ وسلم کی نماز کی طرح پڑھاتا تھا، یعنی ان میں کسی قسم کی کمی نہیں کرتا تھا۔ میں پہلی دو رکعات میں دیر لگاتا اور آخری دو رکعات میں تخفیف کرتا تھا۔ حضرت عمر رضی اللہ عنہ نے فرمایا: میرا بھی تمہارے متعلق یہی گمان تھا۔ [صحيح البخاري/كتاب الأذان (صفة الصلوة)/حدیث: 758]

حضرت ابوقتادہ رضی اللہ عنہ سے روایت ہے، انہوں نے فرمایا کہ رسول اللہ صلی اللہ علیہ وسلم نماز ظہر کی پہلی دو رکعات میں سورہ فاتحہ اور دو سورتیں پڑھتے تھے۔ پہلی رکعت کو لمبا کرتے اور دوسری رکعت کو چھوٹا کرتے تھے، نیز کبھی کبھی کوئی آیت سنا بھی دیتے تھے۔ نماز عصر میں بھی سورہ فاتحہ اور دیگر دو سورتیں تلاوت فرماتے اور پہلی رکعت کو دوسری رکعت سے کچھ لمبا کرتے۔ اسی طرح صبح کی نماز میں بھی پہلی رکعت کو طویل اور دوسری کو مختصر کرتے تھے۔ [صحيح البخاري/كتاب الأذان (صفة الصلوة)/حدیث: 759]

حضرت ابومعمر رحمہ اللہ سے روایت ہے، وہ کہتے ہیں کہ ہم نے حضرت خباب بن ارت رضی اللہ عنہ سے دریافت کیا: آیا نبی صلی اللہ علیہ وسلم ظہر اور عصر میں قرأت کیا کرتے تھے؟ انہوں نے جواب دیا کہ ہاں۔ پھر ہم نے عرض کیا کہ آپ لوگوں کو کیسے معلوم ہوتا تھا؟ انہوں نے فرمایا کہ ہمیں آپ صلی اللہ علیہ وسلم کی داڑھی مبارک کی جنبش سے پتہ چلتا تھا۔ [صحيح البخاري/كتاب الأذان (صفة الصلوة)/حدیث: 760]

حضرت ابو معمر رحمہ اللہ سے روایت ہے، وہ کہتے ہیں کہ میں نے حضرت خباب بن ارت رضی اللہ عنہ سے دریافت کیا کہ کیا نبی صلی اللہ علیہ وسلم ظہر اور عصر کی نماز میں قراءت کیا کرتے تھے؟ انہوں نے فرمایا: ہاں۔ میں نے عرض کیا: آپ حضرات کو رسول اللہ صلی اللہ علیہ وسلم کی قراءت کا کیسے پتہ چلتا تھا؟ انہوں نے فرمایا: آپ صلی اللہ علیہ وسلم کی داڑھی مبارک کے حرکت کرنے کی وجہ سے۔ [صحيح البخاري/كتاب الأذان (صفة الصلوة)/حدیث: 761]