سیدہ عائشہ رضی اللہ عنہا نے فرمایا کہ ہم ازواج میں سے جب کوئی حائضہ ہوتی، اس حالت میں رسول اللہ صلی اللہ علیہ وسلم اگر مباشرت کا ارادہ کرتے تو آپ صلی اللہ علیہ وسلم ازار (زیر جامہ) باندھنے کا حکم دے دیتے باوجود حیض کی زیادتی کے، پھر بدن سے بدن ملاتے، (سیدہ عائشہ رضی اللہ عنہا) نے کہا: تم میں ایسا کون ہے جو نبی کریم صلی اللہ علیہ وسلم کی طرح اپنی شہوت پر قابو رکھتا ہو؟ (یعنی جسے اپنی شہوت پر قابو نہ ہو اسے مباشرت سے بھی بچنا چاہیے)۔ [اللؤلؤ والمرجان/كتاب الحيض/حدیث: 168]

ام المومنین سیدہ میمونہ رضی اللہ عنہا فرماتی ہیں کہ جب نبی کریم صلی اللہ علیہ وسلم اپنی بیویوں میں سے کسی سے مباشرت کرنا چاہتے اور وہ حائضہ ہوتی تو آپ کے حکم سے وہ پہلے ازار باندھ لیتیں۔ [اللؤلؤ والمرجان/كتاب الحيض/حدیث: 169]

سیدہ ام سلمہ رضی اللہ عنہا نے فرمایا کہ میں نبی کریم صلی اللہ علیہ وسلم کے ساتھ ایک چادر میں لیٹی ہوئی تھی کہ مجھے حیض آ گیا، میں چپکے سے چلی گئی اور اپنے حیض کے کپڑے بدل لیے، آپ صلی اللہ علیہ وسلم نے پوچھا: ”کیا تجھ کو حیض آ گیا ہے؟“ میں نے کہا: جی ہاں، پھر آپ صلی اللہ علیہ وسلم نے مجھے بلا لیا اور میں آپ صلی اللہ علیہ وسلم کے ساتھ چادر میں لیٹ گئی۔ [اللؤلؤ والمرجان/كتاب الحيض/حدیث: 170]

سیدہ ام سلمہ رضی اللہ عنہا نے فرمایا کہ میں نے اور نبی کریم صلی اللہ علیہ وسلم نے ایک ہی برتن میں جنابت کا غسل کیا۔ [اللؤلؤ والمرجان/كتاب الحيض/حدیث: 171]

نبی کریم صلی اللہ علیہ وسلم کی زوجہ مطہرہ سیدہ عائشہ رضی اللہ عنہا نے بیان کیا کہ نبی اکرم صلی اللہ علیہ وسلم مسجد سے (اعتکاف کی حالت میں) سر مبارک میری طرف حجرہ کے اندر کر دیتے اور میں اس میں کنگھا کر دیتی، نبی اکرم صلی اللہ علیہ وسلم جب معتکف ہوتے تو بلا حاجت گھر میں تشریف نہیں لاتے تھے۔ [اللؤلؤ والمرجان/كتاب الحيض/حدیث: 172]

سیدہ عائشہ رضی اللہ عنہا نے بیان کیا کہ میں حائضہ ہوتی پھر بھی رسول اللہ صلی اللہ علیہ وسلم مجھے اپنے بدن سے لگا لیتے اور آپ صلی اللہ علیہ وسلم معتکف ہوتے اور میں حائضہ ہوتی اس کے باوجود آپ صلی اللہ علیہ وسلم سر (مبارک مسجد) سے باہر کر دیتے اور میں اسے دھوتی تھی۔ [اللؤلؤ والمرجان/كتاب الحيض/حدیث: 173]

سیدہ عائشہ رضی اللہ عنہا فرماتی ہیں کہ نبی کریم صلی اللہ علیہ وسلم میری گود میں سر رکھ کر قرآن مجید پڑھتے حالانکہ میں اس وقت حیض والی ہوتی تھی۔ [اللؤلؤ والمرجان/كتاب الحيض/حدیث: 174]

سیدنا علی رضی اللہ عنہ نے فرمایا کہ میں ایسا آدمی تھا جس کو سیلانِ مذی کی شکایت تھی، مگر (اس کے بارے میں) رسول اللہ صلی اللہ علیہ وسلم سے دریافت کرتے ہوئے مجھے شرم آتی، تو میں نے سیدنا مقداد بن الاسود رضی اللہ عنہ کو حکم دیا، انہوں نے آپ صلی اللہ علیہ وسلم سے پوچھا، تو آپ صلی اللہ علیہ وسلم نے فرمایا: ”اس میں وضو کرنا فرض ہے۔“ [اللؤلؤ والمرجان/كتاب الحيض/حدیث: 175]

سیدہ عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم جب جنابت کی حالت میں ہوتے اور سونے کا ارادہ کرتے تو اپنی شرمگاہ دھو لیتے اور نماز کی طرح وضو کرتے۔ [اللؤلؤ والمرجان/كتاب الحيض/حدیث: 176]

سیدنا ابن عمر رضی اللہ عنہما روایت کرتے ہیں کہ سیدنا عمر رضی اللہ عنہ نے رسول اللہ صلی اللہ علیہ وسلم سے پوچھا کہ ہم میں سے کوئی جنابت کی حالت میں سو سکتا ہے؟ فرمایا: ”ہاں، وضو کر کے جنابت کی حالت میں بھی سو سکتے ہو۔“ [اللؤلؤ والمرجان/كتاب الحيض/حدیث: 177]