سیدہ عائشہ رضی اللہ عنہا نے فرمایا کہ دو رکعات کو رسول اللہ صلی اللہ علیہ وسلم نے کبھی ترک نہیں فرمایا، پوشیدہ ہو یا عام لوگوں کے سامنے، صبح کی نماز سے پہلے دو رکعات اور عصر کی نماز کے بعد دو رکعات۔ [اللؤلؤ والمرجان/كتاب صلاة المسافرين وقصرها/حدیث: 478]

سیدنا انس بن مالک رضی اللہ عنہ نے فرمایا کہ (عہد رسالت میں) جب مؤذن اذان دیتا تو نبی کریم صلی اللہ علیہ وسلم کے صحابہ ستونوں کی طرف لپکتے، جب نبی کریم صلی اللہ علیہ وسلم اپنے حجرہ سے باہر تشریف لاتے تو لوگ اسی طرح نماز پڑھتے ہوئے ملتے، یہ جماعت مغرب سے پہلے کی دو رکعات تھیں اور (مغرب میں) اذان اور تکبیر میں کوئی زیادہ فاصلہ نہیں تھا۔ [اللؤلؤ والمرجان/كتاب صلاة المسافرين وقصرها/حدیث: 479]

سیدنا عبداللہ بن مغفل رضی اللہ عنہ نے بیان کیا کہ نبی کریم صلی اللہ علیہ وسلم نے فرمایا: ”ہر دو اذانوں (اذان و تکبیر) کے بیچ میں نماز ہے، ہر دو اذانوں کے درمیان نماز ہے،“ پھر تیسری مرتبہ آپ صلی اللہ علیہ وسلم نے فرمایا: ”اگر کوئی پڑھنا چاہے۔“ [اللؤلؤ والمرجان/كتاب صلاة المسافرين وقصرها/حدیث: 480]

سیدنا عبداللہ بن عمر رضی اللہ عنہما نے بیان کیا کہ نبی کریم صلی اللہ علیہ وسلم نے ایک جماعت کے ساتھ نماز (خوف) پڑھی اور دوسری جماعت اس عرصہ میں دشمن کے مقابلے پر کھڑی تھی، پھر یہ جماعت اپنے دوسرے ساتھیوں کی جگہ (نماز پڑھ کر) چلی گئی تو دوسری جماعت آئی اور نبی اکرم صلی اللہ علیہ وسلم نے انہیں بھی ایک رکعت نماز پڑھائی، اس کے بعد آپ صلی اللہ علیہ وسلم نے اس جماعت کے ساتھ سلام پھیرا، آخر اس جماعت نے کھڑے ہو کر اپنی ایک رکعت پوری کی اور پہلی جماعت نے بھی کھڑے ہو کر اپنی ایک رکعت پوری۔ [اللؤلؤ والمرجان/كتاب صلاة المسافرين وقصرها/حدیث: 481]

سیدنا سہل بن ابی حثمہ رضی اللہ عنہ نے بیان کیا کہ (نمازِ خوف میں) امام قبلہ رو ہو کر کھڑا ہو گا اور مسلمانوں کی ایک جماعت اس کے ساتھ نماز میں شریک ہو گی، اس عرصہ میں مسلمانوں کی دوسری جماعت دشمن کے مقابلے پر کھڑی ہو گی، ان ہی کی طرف منہ کیے ہوئے امام اپنے ساتھ والی جماعت کو پہلے ایک رکعت نماز پڑھائے گا، (ایک رکعت پڑھنے کے بعد پھر) یہ جماعت کھڑی ہو جائے گی اور خود (امام کے بغیر) اسی جگہ ایک رکوع اور دو سجدے کر کے دشمن کے مقابلے پر جا کر کھڑی ہو جائے گی جہاں دوسری جماعت پہلے سے موجود تھی، اس کے بعد امام دوسری جماعت کو ایک رکعت نماز پڑھائے گا، اس طرح امام کی دو رکعت پوری ہو جائیں گی اور یہ دوسری جماعت ایک رکوع اور دو سجدے خود کرے گی۔ [اللؤلؤ والمرجان/كتاب صلاة المسافرين وقصرها/حدیث: 482]

صالح بن خوات رحمہ اللہ نے ایک ایسے صحابی رضی اللہ عنہ سے بیان کیا جو نبی کریم صلی اللہ علیہ وسلم کے ساتھ غزوہ ذات الرقاع میں شریک تھے کہ نبی کریم صلی اللہ علیہ وسلم نے نمازِ خوف پڑھی، اس کی صورت یہ ہوئی تھی کہ پہلے ایک جماعت نے آپ صلی اللہ علیہ وسلم کی اقتدا میں نماز پڑھی، اس وقت دوسری جماعت (مسلمانوں کی) دشمن کے مقابلے پر کھڑی تھی۔ نبی اکرم صلی اللہ علیہ وسلم نے اس جماعت کو، جو آپ صلی اللہ علیہ وسلم کے پیچھے صف میں کھڑی تھی، ایک رکعت (نمازِ خوف) پڑھائی اور اس کے بعد آپ صلی اللہ علیہ وسلم کھڑے رہے، اس جماعت نے اس عرصہ میں اپنی نماز پوری کر لی اور واپس آ کر دشمن کے مقابلے میں کھڑے ہو گئے۔ اس کے بعد دوسری جماعت آئی تو نبی اکرم صلی اللہ علیہ وسلم نے انہیں نماز کی دوسری رکعت پڑھائی جو باقی رہ گئی تھی اور (رکوع و سجدہ کے بعد) آپ صلی اللہ علیہ وسلم قعدہ میں بیٹھے رہے، پھر ان لوگوں نے جب اپنی نماز (جو باقی رہ گئی تھی) پوری کر لی تو آپ صلی اللہ علیہ وسلم نے ان کے ساتھ سلام پھیرا۔ [اللؤلؤ والمرجان/كتاب صلاة المسافرين وقصرها/حدیث: 483]

سیدنا جابر رضی اللہ عنہ نے بیان کیا کہ ہم نبی کریم صلی اللہ علیہ وسلم کے ساتھ ذات الرقاع میں تھے، پھر ہم ایک ایسی جگہ آئے جہاں بہت گھنے سایہ کا درخت تھا، وہ درخت ہم نے رسول اللہ صلی اللہ علیہ وسلم کے لیے مخصوص کر دیا کہ آپ وہاں آرام فرمائیں، بعد میں مشرکین میں سے ایک شخص آیا، نبی اکرم صلی اللہ علیہ وسلم کی تلوار درخت سے لٹک رہی تھی، اس نے وہ تلوار نبی اکرم صلی اللہ علیہ وسلم پر کھینچ لی اور پوچھا: کیا تم مجھ سے ڈرتے ہو؟ نبی اکرم صلی اللہ علیہ وسلم نے فرمایا کہ ”نہیں“، اس پر اس نے پوچھا: آج میرے ہاتھ سے تمہیں کون بچائے گا؟ نبی اکرم صلی اللہ علیہ وسلم نے فرمایا کہ ”اللہ“، پھر صحابہ نے اسے ڈانٹا دھمکایا اور نماز کی تکبیر کہی گئی، تو نبی اکرم صلی اللہ علیہ وسلم نے پہلے ایک جماعت کو دو رکعت نمازِ خوف پڑھائی، جب وہ جماعت (رسول اللہ صلی اللہ علیہ وسلم کے پیچھے سے) ہٹ گئی تو آپ نے دوسری جماعت کو بھی دو رکعت نماز پڑھائی، اس طرح نبی کریم صلی اللہ علیہ وسلم کی چار رکعت نماز ہوئی لیکن مقتدیوں کی صرف دو دو رکعت۔ [اللؤلؤ والمرجان/كتاب صلاة المسافرين وقصرها/حدیث: 484]