سیدنا عبداللہ بن مسعود رضی اللہ عنہ نے بیان کیا کہ دو نمازوں کے سوا میں نے نبی کریم صلی اللہ علیہ وسلم کو اور کوئی نماز بغیر وقت نہیں پڑھتے دیکھا، آپ صلی اللہ علیہ وسلم نے مغرب اور عشاء ایک ساتھ پڑھیں اور فجر کی نماز بھی اس دن (مزدلفہ میں) معمولی وقت سے پہلے ادا کی۔ [اللؤلؤ والمرجان/كتاب الحج/حدیث: 811]

سیدہ عائشہ رضی اللہ عنہا نے بیان کیا کہ ہم نے مزدلفہ میں قیام کیا، نبی کریم صلی اللہ علیہ وسلم نے ام المومنین سودہ رضی اللہ عنہا کو لوگوں کے ازدحام سے پہلے روانہ ہونے کی اجازت دے دی تھی، وہ بھاری بھرکم بدن کی خاتون تھیں اس لیے آپ صلی اللہ علیہ وسلم نے اجازت دے دی، چنانچہ وہ ازدحام سے پہلے روانہ ہو گئیں لیکن ہم لوگ وہیں ٹھہرے رہے اور صبح کو آپ صلی اللہ علیہ وسلم کے ساتھ گئے، اگر میں بھی سیدہ سودہ رضی اللہ عنہا کی طرح آپ صلی اللہ علیہ وسلم سے اجازت لیتی تو مجھ کو تمام خوشی کی چیزوں میں یہ بہت ہی پسند ہوتا۔ [اللؤلؤ والمرجان/كتاب الحج/حدیث: 812]

سیدہ اسماء بنت ابوبکر رضی اللہ عنہما کے غلام عبداللہ، سیدہ اسماء رضی اللہ عنہا سے روایت کرتے ہیں کہ وہ رات کی رات میں ہی مزدلفہ پہنچ گئیں اور کھڑی ہو کر نماز پڑھنے لگیں، کچھ دیر تک نماز پڑھنے کے بعد پوچھا: بیٹے! کیا چاند ڈوب گیا؟ میں نے کہا کہ نہیں، اس لیے وہ دوبارہ نماز پڑھنے لگیں، کچھ دیر بعد پھر پوچھا: کیا چاند ڈوب گیا؟ میں نے کہا: ہاں، انہوں نے کہا کہ اب آگے چلو (منی کو)، چنانچہ ہم ان کے ساتھ آگے چلے، وہ (منی میں) رمی جمرہ کرنے کے بعد پھر واپس آ گئیں اور صبح کی نماز اپنے ڈیرے پر پڑھی، میں نے کہا: جناب! یہ کیا بات ہوئی کہ ہم نے اندھیرے ہی میں نماز صبح پڑھ لی؟ انہوں نے کہا: بیٹے! رسول اللہ صلی اللہ علیہ وسلم نے ”عورتوں کو اس کی اجازت دی ہے“۔ [اللؤلؤ والمرجان/كتاب الحج/حدیث: 813]

سیدنا ابن عباس رضی اللہ عنہما نے بیان کیا کہ میں ان لوگوں میں تھا جنہیں نبی کریم صلی اللہ علیہ وسلم نے اپنے گھر کے کمزور لوگوں کو مزدلفہ کی رات ہی میں منی بھیج دیا تھا۔ [اللؤلؤ والمرجان/كتاب الحج/حدیث: 814]

سیدنا عبداللہ بن عمر رضی اللہ عنہما اپنے گھر کے کمزوروں کو پہلے ہی بھیج دیا کرتے تھے اور وہ رات ہی میں مزدلفہ میں مشعرِ حرام کے پاس آ کر ٹھہرتے اور اپنی طاقت کے مطابق اللہ کا ذکر کرتے تھے، پھر امام کے ٹھہرنے اور لوٹنے سے پہلے ہی (منی) آ جاتے تھے، بعض تو منی فجر کی نماز کے وقت پہنچتے اور بعض اس کے بعد، جب منی پہنچتے تو کنکریاں مارتے اور سیدنا عبداللہ بن عمر رضی اللہ عنہما فرمایا کرتے تھے کہ ”رسول اللہ صلی اللہ علیہ وسلم نے ان سب لوگوں کے لیے یہ اجازت دی ہے۔“ [اللؤلؤ والمرجان/كتاب الحج/حدیث: 815]

عبدالرحمن بن یزید رحمہ اللہ کہتے ہیں کہ سیدنا عبداللہ بن مسعود رضی اللہ عنہ نے وادی کے نشیب «بَطْنِ الْوَادِي» میں کھڑے ہو کر کنکری ماری، تو میں نے کہا: اے ابو عبدالرحمن! کچھ لوگ تو وادی کے بالائی علاقے سے کنکری مارتے ہیں، انہوں نے یہ جواب دیا کہ اس ذات کی قسم جس کے سوا کوئی معبود نہیں، یہی (بطن وادی) ان کے کھڑے ہونے کی جگہ ہے (رمی کرتے وقت) جن پر سورہ بقرہ نازل ہوئی تھی ( صلی اللہ علیہ وسلم )۔ [اللؤلؤ والمرجان/كتاب الحج/حدیث: 816]

سلیمان اعمش رحمہ اللہ نے بیان کیا کہ میں نے حجاج سے سنا، وہ منبر پر سورتوں کا یوں نام لے رہا تھا: وہ سورہ جس میں بقرہ (گائے) کا ذکر آیا ہے، وہ سورہ جس میں آل عمران کا ذکر آیا ہے، وہ سورہ جس میں نساء (عورتوں) کا ذکر آیا ہے۔ اعمش نے کہا: میں نے اس کا ذکر ابراہیم نخعی رحمہ اللہ سے کیا تو انہوں نے فرمایا کہ مجھ سے عبدالرحمان بن یزید نے بیان کیا کہ جب سیدنا عبداللہ بن مسعود رضی اللہ عنہ نے جمرہ عقبہ کی رمی کی تو وہ ان کے ساتھ تھے، اس وقت وہ وادی کے نشیب میں اتر گئے اور جب درخت کے (جو اس وقت وہاں پر تھا) برابر نیچے اور اس کے سامنے ہو کر سات کنکریوں سے رمی کی، ہر کنکری کے ساتھ «اللهُ أَكْبَرُ» ”اللہ بہت بڑا ہے“ کہتے جاتے تھے، پھر فرمایا: قسم ہے اس کی جس کے سوا کوئی معبود نہیں! یہیں وہ ذات بھی کھڑی ہوئی تھی جس پر سورہ بقرہ نازل ہوئی صلی اللہ علیہ وسلم ۔ [اللؤلؤ والمرجان/كتاب الحج/حدیث: 817]

سیدنا ابن عمر رضی اللہ عنہما نے فرمایا کہ رسول اللہ صلی اللہ علیہ وسلم نے حجۃ الوداع کے موقع پر اپنا سر منڈوایا تھا۔ [اللؤلؤ والمرجان/كتاب الحج/حدیث: 818]

سیدنا عبداللہ بن عمر رضی اللہ عنہما کہتے ہیں کہ رسول اللہ صلی اللہ علیہ وسلم نے دعا کی: ”اے اللہ! سر منڈوانے والوں پر رحم فرما!“ صحابہ رضی اللہ عنہم نے عرض کی: اور کتروانے والوں پر بھی یا رسول اللہ؟ نبی اکرم صلی اللہ علیہ وسلم نے پھر دعا کی: ”اے اللہ! سر منڈوانے والوں پر رحم فرما!“ صحابہ رضی اللہ عنہم نے پھر عرض کی: اور کتروانے والوں پر یا رسول اللہ؟ اب آپ صلی اللہ علیہ وسلم نے فرمایا: ”اور کتروانے والوں پر بھی۔“ [اللؤلؤ والمرجان/كتاب الحج/حدیث: 819]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے دعا فرمائی: «اللَّهُمَّ اغْفِرْ لِلْمُحَلِّقِينَ» ”اے اللہ! سر منڈوانے والوں کی مغفرت فرما!“ صحابہ رضی اللہ عنہم نے عرض کیا: اور کتروانے والوں کے لیے بھی (یہی دعا فرمائیے)، لیکن نبی اکرم صلی اللہ علیہ وسلم نے اس مرتبہ بھی یہی فرمایا: «اللَّهُمَّ اغْفِرْ لِلْمُحَلِّقِينَ» ”اے اللہ! سر منڈوانے والوں کی مغفرت کر۔“ پھر صحابہ رضی اللہ عنہم نے عرض کیا: اور کتروانے والوں کی بھی! تیسری مرتبہ نبی اکرم صلی اللہ علیہ وسلم نے فرمایا: «وَلِلْمُقَصِّرِينَ» ”اور کتروانے والوں کی بھی مغفرت فرما۔“ [اللؤلؤ والمرجان/كتاب الحج/حدیث: 820]