حضرت عائشہ رضی اللہ عنہا فرماتی ہیں کہ نبی کریم صلی اللہ علیہ وآلہ وسلم نے مردوں اور عورتوں کو حمام میں داخل ہونے سے منع فرمایا ہے البتہ مریض اور نفاس والی عورت حمام میں داخل ہوسکتی ہے۔ [مصنف ابن ابي شيبه/كتاب الطهارة/حدیث: 1191]

حضرت طاؤس سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جو شخص حمام میں داخل ہوجائے وہ ستر ڈھانپ لے۔ [مصنف ابن ابي شيبه/كتاب الطهارة/حدیث: 1192]

حضرت حبیب فرماتے ہیں کہ حضرت عطاء، حضرت طاؤس اور حضرت مجاہد حمام میں داخل ہوئے اور انہوں نے اس میں نورہ اپنے بدن پر لگایا۔ [مصنف ابن ابي شيبه/كتاب الطهارة/حدیث: 1193]

حضرت حسن فرماتے ہیں کہ رسول اللہ صلی اللہ علیہ وآلہ وسلم، حضرت ابوبکر اور حضرت عمر جسم پر نورہ نہیں لگاتے تھے۔ [مصنف ابن ابي شيبه/كتاب الطهارة/حدیث: 1194]

حضرت عبداللہ بن شداد فرماتے ہیں کہ (اللہ تعالیٰ فرماتے ہیں:) { فَلَمَّا رَأَتْهُ حَسِبَتْهُ لُجَّةً وَكَشَفَتْ عَنْ سَاقَيْهَا } [النمل: 44] (جب اس نے اسے دیکھا تو اسے گہرا پانی سمجھا اور اپنی پنڈلیاں کھول دیں) بلقیس کی پنڈلی پر بہت سے بال تھے۔ حضرت سلیمان نے پوچھا کہ یہ بال کیسے ختم ہوں گے؟ لوگوں نے بتایا کہ نورہ کے ذریعہ، اس کے بعد سے نورہ بالوں کو صاف کرنے کے لیے استعمال ہونے لگا۔ [مصنف ابن ابي شيبه/كتاب الطهارة/حدیث: 1195]

حضرت ابن عون فرماتے ہیں کہ حسن کے جسم پر بہت بال تھے وہ نورہ نہیں کرتے تھے۔ [مصنف ابن ابي شيبه/كتاب الطهارة/حدیث: 1196]

حضرت عمر بن حمزہ فرماتے ہیں کہ حضرت سالم نے ایک مرتبہ نورہ لگایا اور ایک مرتبہ شلوار پہنی۔ [مصنف ابن ابي شيبه/كتاب الطهارة/حدیث: 1197]

حضرت جابر بن زید نے عشرہ (کے دنوں) میں نورہ استعمال کیا ہے۔ [مصنف ابن ابي شيبه/كتاب الطهارة/حدیث: 1198]

ابراہیم فرماتے ہیں کہ حضور صلی اللہ علیہ وآلہ وسلم جب نورہ کو بالوں کو ختم کرنے کے لیے استعمال فرماتے تو زیر ناف حصے پر خود لگاتے تھے۔ [مصنف ابن ابي شيبه/كتاب الطهارة/حدیث: 1199]

حضرت علی بن ابی عائشہ فرماتے ہیں کہ حضرت عمر کے جسم پر بہت سے بال تھے۔ وہ اپنے جسم کے بالوں کو مونڈا کرتے تھے۔ ان کے سامنے کسی نے نورہ کا ذکر کیا تو انہوں نے فرمایا کہ نورہ تو خوش پروری کا حصہ ہے۔ [مصنف ابن ابي شيبه/كتاب الطهارة/حدیث: 1200]