حضرت عائشہ رضی اللہ عنہا فرماتی ہیں کہ جب شرم گاہیں مل جائیں تو غسل واجب ہوگیا۔ [مصنف ابن ابي شيبه/كتاب الطهارة/حدیث: 941]

حضرت ابوہریرہ فرماتے ہیں کہ جب آدمی کے آلہء تناسل کا سرا غائب ہوگیا تو غسل واجب ہوگیا۔ [مصنف ابن ابي شيبه/كتاب الطهارة/حدیث: 942]

حضرت عبد اللہ فرماتے ہیں کہ اگر میری یہ کیفیت ہو تو میں غسل کروں گا۔ [مصنف ابن ابي شيبه/كتاب الطهارة/حدیث: 943]

حضرت علی رضی اللہ عنہ فرماتے ہیں کہ جب شرمگاہیں مل جائیں تو غسل واجب ہوگیا۔ [مصنف ابن ابي شيبه/كتاب الطهارة/حدیث: 944]

حضرت عمر فرماتے ہیں کہ میرے پاس اگر کوئی ایسا آدمی لایا گیا جس نے یوں کیا (یعنی جماع کیا اور اسے انزال نہ ہوا لیکن اس نے غسل بھی نہ کیا) تو میں سزا دوں گا۔ [مصنف ابن ابي شيبه/كتاب الطهارة/حدیث: 945]

حضرت ابو جعفر فرماتے ہیں کہ مہاجرین یعنی ابو بکر، عمر، عثمان، علی رضی اللہ عنہ کا اس پر اجماع ہے کہ جس چیز سے کوڑے اور رجم لازم ہوتے ہیں اس سے غسل بھی واجب ہوجاتا ہے۔ [مصنف ابن ابي شيبه/كتاب الطهارة/حدیث: 946]

حضرت عکرمہ فرماتے ہیں کہ شرم گاہوں کے ملنے سے قتل اور رجم لازم ہوتے ہیں تو کیا پانی کا برتن لازم نہیں ہوں گے؟ [مصنف ابن ابي شيبه/كتاب الطهارة/حدیث: 947]

حضرت شریح فرماتے ہیں کہ یہ چیز چار ہزار تو لازم کرتی ہے اور پانی کا برتن لازم نہیں کرتی؟ یعنی بیوی سے ایسا اختلاط جس میں انزال نہ ہو۔ [مصنف ابن ابي شيبه/كتاب الطهارة/حدیث: 948]

حضرت شریح فرماتے ہیں کہ یہ چیز چار ہزار لازم کرتی ہے اور پانی کا برتن لازم نہیں کرتی۔ یعنی بیوی سے ایسا اختلاط جس میں انزال نہ ہو۔ [مصنف ابن ابي شيبه/كتاب الطهارة/حدیث: 949]

حضرت ابن سیرین کہتے ہیں کہ میں نے حضرت عبیدہ سے پوچھا کہ غسل کس چیز سے واجب ہوتا ہے فرمایا شرم گاہوں کے ملنے سے اور منی کے نکلنے سے۔ [مصنف ابن ابي شيبه/كتاب الطهارة/حدیث: 950]