حضرت عائشہ رضی اللہ عنہا فرماتی ہیں کہ میرے خیال میں یہ آیت صرف موذنین ہی کے بارے میں نازل ہوئی ہے:: اس شخص سے اچھی بات کس کی ہوسکتی ہے جو لوگوں کو اللہ کی طرف بلائے اور اچھے کام کرے اور کہے کہ میں مسلمانوں میں سے ہوں۔ [مصنف ابن ابي شيبه/كتاب الأذان والإقامة/حدیث: 2367]

حضرت عائشہ رضی اللہ عنہا فرماتی ہیں کہ میرے خیال میں یہ آیت صرف موذنین ہی کے بارے میں نازل ہوئی ہے:: اس شخص سے اچھی بات کس کی ہوسکتی ہے جو لوگوں کو اللہ کی طرف بلائے اور اچھے کام کرے اور کہے کہ میں مسلمانوں میں سے ہوں۔ [مصنف ابن ابي شيبه/كتاب الأذان والإقامة/حدیث: 2368]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ جہاں تک موذن کی آواز جاتی ہے وہاں تک اس کی مغفرت کر دی جاتی ہے، اور ہر خشک و تر چیز اس کی تصدیق کرتی ہے۔ [مصنف ابن ابي شيبه/كتاب الأذان والإقامة/حدیث: 2369]

حضرت ابوہریرہ فرماتے ہیں کہ اونچی آواز سے اذان دو، کیونکہ تمہیں سننے والی ہر چیز تمہارے لیے گواہی دے گی۔ [مصنف ابن ابي شيبه/كتاب الأذان والإقامة/حدیث: 2370]

حضرت مجاہد فرماتے ہیں کہ موذن کے لیے اسے سننے والی ہر خشک اور تر چیز گواہی دے گی۔ [مصنف ابن ابي شيبه/كتاب الأذان والإقامة/حدیث: 2371]

حضرت ابن عمر رضی اللہ عنہما نے ایک آدمی سے پوچھا کہ تمہارا کام کیا ہے؟ اس نے کہا اذان دینا۔ حضرت ابن عمر رضی اللہ عنہما نے فرمایا کہ تمہارا کام تو بہت اچھا ہے، تمہیں سننے والی ہر چیز تمہارے لیے گواہی دے گی۔ [مصنف ابن ابي شيبه/كتاب الأذان والإقامة/حدیث: 2372]

حضرت ابراہیم فرماتے ہیں کہ حضرت علقمہ اور حضرت عبدالرحمن بن ابی لیلیٰ اپنے گاؤں کی طرف گئے۔ حضرت ابراہیم فرماتے ہیں کہ مجھے یہ بات پسند تھی کہ حضرت عبدالرحمن بن ابی لیلیٰ اپنے چھوٹے بیٹے کو اذان کا حکم دیں۔ [مصنف ابن ابي شيبه/كتاب الأذان والإقامة/حدیث: 2373]

حضرت عطاء فرماتے ہیں لڑکا بالغ ہونے سے پہلے اذان دے سکتا ہے۔ [مصنف ابن ابي شيبه/كتاب الأذان والإقامة/حدیث: 2374]

حضرت شعبی فرماتے ہیں کہ اگر کوئی لڑکا اچھے طریقے سے اذان دے سکتا ہو تو وہ بالغ ہونے سے پہلے اذان دے سکتا ہے۔ [مصنف ابن ابي شيبه/كتاب الأذان والإقامة/حدیث: 2375]

عیسیٰ بن طلحہ کہتے ہیں کہ ہم حضرت معاویہ کی خدمت میں حاضر تھے کہ اتنے میں موذن آیا اور اس نے اللَّہُ أَکْبَرُ، اللَّہُ أَکْبَرُ کہا۔ حضرت معاویہ نے جواب میں یونہی کہا۔ پھر اس نے أَشْہَدُ أَنْ لاَ إِلَہَ إِلاَّ اللَّہُ کہا تو حضرت معاویہ نے بھی یونہی کہا۔ پھر اس نے أَشْہَدُ أَنَّ مُحَمَّدًا رَسُولُ اللہِ کہا تو حضرت معاویہ نے بھی یونہی کہا۔ پھر فرمایا کہ میں نے تمہارے نبی صلی اللہ علیہ وآلہ وسلم کو بھی یونہی فرماتے سنا تھا۔ [مصنف ابن ابي شيبه/كتاب الأذان والإقامة/حدیث: 2376]