حضرت زید بن اسلم فرماتے ہیں کہ میں نے حضرت عطاء بن یسار سے عرض کیا کہ کیا میں اپنے کپڑے پر سجدہ کرسکتا ہوں؟ انہوں نے فرمایا کہ میرا کپڑا میرے جسم کا حصہ ہے۔ [مصنف ابن ابي شيبه/كتاب الصلوات/حدیث: 2800]

حضرت اشعث فرماتے ہیں کہ حضرت حسن اس بات میں کوئی حرج نہیں سمجھتے تھے کہ آدمی اپنے کپڑے پر سجدہ کرے۔ [مصنف ابن ابي شيبه/كتاب الصلوات/حدیث: 2801]

حضرت عطاء فرماتے ہیں کہ جب مجھے گرمی تنگ کرے تو میں تو اپنے کپڑے پر سجدہ کرلیتا ہوں، البتہ کسی آدمی کی کمر پر سجدہ نہیں کرتا۔ [مصنف ابن ابي شيبه/كتاب الصلوات/حدیث: 2802]

حضرت علی رضی اللہ عنہ فرماتے ہیں کہ جب عورت سجدہ کرے تو اپنے جسم کو سکیڑ لے اور اپنی رانوں کو ملا کررکھے۔ [مصنف ابن ابي شيبه/كتاب الصلوات/حدیث: 2803]

حضرت بکیر بن عبد اللہ کہتے ہیں کہ حضرت ابن عباس رضی اللہ عنہما سے سوال کیا گیا کہ عورت کیسے نماز پڑھے؟ فرمایا وہ جسم کو سکیڑ کر اور ملا کر رکھے۔ [مصنف ابن ابي شيبه/كتاب الصلوات/حدیث: 2804]

حضرت ابراہیم فرماتے ہیں کہ جب عورت سجدہ کرے تو اپنی رانوں کو ملائے اور اپنے پیٹ کو ان پر رکھ دے۔ [مصنف ابن ابي شيبه/كتاب الصلوات/حدیث: 2805]

حضرت لیث فرماتے ہیں کہ حضرت مجاہد اس بات کو مکروہ خیال فرماتے تھے کہ آدمی سجدہ کرتے وقت اپنے پیٹ کو اپنی رانوں پر رکھے جیسا کہ عورتیں کرتی ہیں۔ [مصنف ابن ابي شيبه/كتاب الصلوات/حدیث: 2806]

حضرت حسن فرماتے ہیں کہ عورت سجدوں میں اپنے جسم کو ملا کر رکھے گی۔ [مصنف ابن ابي شيبه/كتاب الصلوات/حدیث: 2807]

ابراہیم فرماتے ہیں کہ عورت جب سجدہ کرے تو اپنے پیٹ کو اپنی رانوں سے ملا کررکھے، وہ اپنی سرین کو بلند نہ کرے اور مردوں کی طرح جسم کو کشادہ نہ کرے۔ [مصنف ابن ابي شيبه/كتاب الصلوات/حدیث: 2808]

حضرت خالد بن لجلاج فرماتے ہیں کہ عورتوں کو حکم دیا جاتا تھا کہ جب نماز میں بیٹھیں تو چار زانو (آلتی پالتی مار کر) بیٹھیں، وہ مردوں کی طرح اپنے کولہوں پر نہ بیٹھیں۔ عورت کے لئے اس سے اس اندیشے کی وجہ سے بچا جاتا تھا کہ کہیں اس کے جسم کا کوئی حصہ ظاہر نہ ہو جائے۔ [مصنف ابن ابي شيبه/كتاب الصلوات/حدیث: 2809]