حضرت عبید اللہ بن ابی زیاد فرماتے ہیں کہ میں نے حضرت سعید بن جبیر سے پوچھا کہ میں اگر حالت سجود میں آیت سجدہ پڑھوں تو کیا میں سجدہ کروں گا؟ انہوں نے فرمایا نہیں، لکنن تم سجدے کی حالت میں آیت سجدہ کیوں پڑھتے ہو؟ [مصنف ابن ابي شيبه/باب سجود التلاوة/حدیث: 4443]

حضرت حاتم بن ابی صغیرہ کہتے ہیں کہ میں نے حضرت عبد اللہ بن ابی ملیکہ سے سوال کیا کہ اگر میں دورانِ طواف آیت سجدہ پڑھوں تو سجدہ کروں یا نہیں؟ انہوں نے فرمایا کہ میں تمہیں سجدہ کرنے کا حکم دیتا ہوں۔ میں نے کہا کہ اس صورت میں تو طواف کرتے ہوئے لوگ مجھے روند ڈالیں گے اور کہیں گے کہ یہ پاگل ہے۔ یہ کیسے ممکن ہے کہ وہ طواف کررہے ہوں اور میں سجدہ کروں؟! انہوں نے کہا خدا کی قسم! اگر یہ بات ہے تو سن لو کہ حضرت ابن زبیر نے ایک مرتبہ آیت سجدہ پڑھی اور سجدہ نہیں کیا۔ پھر حضرت حارث بن ابی ربیعہ نے آیت سجدہ پڑھی، پھر آکر بیٹھ گئے اور کہنے لگے اے امیر المؤمنین! ابھی تھوڑی دیر پہلے آپ نے آیت سجدہ پڑھی تھی، لیکن آپ نے سجدہ کیوں نہیں کیا؟ حضرت ابن زبیر نے فرمایا کہ میں کیوں سجدہ کروں؟ جب میں نماز میں ہوتا ہوں تو سجدہ کرتا ہوں اور اگر میں نماز کے باہر آیت سجدہ کی تلاوت کروں تو سجدہ نہیں کرتا۔ [مصنف ابن ابي شيبه/باب سجود التلاوة/حدیث: 4444]

حضرت حاتم بن ابی صغیرہ کہتے ہیں کہ میں نے اس بارے میں حضرت عطاء سے سوال کیا تو انہوں نے فرمایا کہ خانہ کعبہ کی طرف رخ کرکے سر سے اشارہ کرلو۔ [مصنف ابن ابي شيبه/باب سجود التلاوة/حدیث: 4445]

حضرت مجاہد فرماتے ہیں کہ اگر کوئی شخص دورانِ طواف آیت سجدہ کی تلاوت کرے تو سر کے اشارے سے سجدہ کرلے، یا فرمایا کہ سجدہ کرلے۔ [مصنف ابن ابي شيبه/باب سجود التلاوة/حدیث: 4446]

حضرت ابو جعفر فرماتے ہیں کہ نبی پاک حضور صلی اللہ علیہ وآلہ وسلم نے فرض نماز میں آیت سجدہ پڑھی پھر سجدہ کیا۔ [مصنف ابن ابي شيبه/باب سجود التلاوة/حدیث: 4447]

حضرت ابو مجلز فرماتے ہیں کہ نبی پاک حضور صلی اللہ علیہ وآلہ وسلم نے ظہر کی نماز میں آیت سجدہ پڑھی، پھر سجدہ کیا۔ لوگوں کا خیال ہے کہ آپ نے الم تنزیل السجدۃ پڑھی تھی۔ [مصنف ابن ابي شيبه/باب سجود التلاوة/حدیث: 4448]

حضرت ابن عمر رضی اللہ عنہما سے بھی نبی پاک حضور صلی اللہ علیہ وآلہ وسلم کے بارے میں یونہی منقول ہے۔
راوی کہتے ہیں کہ تیمی نے یہ روایت ابو مجلز سے نہیں سنی۔ [مصنف ابن ابي شيبه/باب سجود التلاوة/حدیث: 4449]

حضرت ابو حکیمہ کہتے ہیں کہ حضرت ابن عمر رضی اللہ عنہما نے اپنے ساتھیوں کو ظہر کی نما زپڑھائی اور اس میں سجدہ تلاوت کیا۔ [مصنف ابن ابي شيبه/باب سجود التلاوة/حدیث: 4450]

حضرت بکر کہتے ہیں کہ مجھ سے ایک آدمی نے بیان کیا کہ انہوں نے حضرت ابن زبیر کو مکہ کے ایک باغ میں دیکھا کہ انہوں نے عصر یا ظہر کی نماز پڑھی اور اس میں سجدہ کیا۔ نماز کے بعد کسی آدمی نے ان سے کہا کہ آپ نے پانچ رکعات پڑھائی ہیں؟ انہوں نے فرمایا کہ نہیں میں نے ایک سورت پڑھی تھی جس میں سجدۂ تلاوت تھا۔ [مصنف ابن ابي شيبه/باب سجود التلاوة/حدیث: 4451]

حضرت انس بن سیرین کہتے ہیں کہ حضرت عبد اللہ بن مسعود رضی اللہ عنہ نے ظہر کی پہلی رکعت میں الم تنزیل السجدۃ دوسری رکعت میں مثانی میں سے کوئی سور ت پڑھی۔ [مصنف ابن ابي شيبه/باب سجود التلاوة/حدیث: 4452]