حضرت انس بن مالک رضی اللہ عنہ فرماتے ہیں کہ بنو سلمہ نے ارادہ کیا کہ اپنے علاقے کو چھوڑ کر مسجد کے قریب گھر بنالیں۔ حضور صلی اللہ علیہ وآلہ وسلم نے اس بات کو ناپسند کیا کہ مدینہ کے اطراف خالی ہوجائیں اور فرمایا کہ اے بنو سلمہ! کیا تم اپنے قدموں پر ثواب کا یقین نہیں رکھتے؟ انہوں نے کہا کیوں نہیں۔ پھر انہوں نے اپنی جگہ ہی رہنے کا فیصلہ کرلیا۔ [مصنف ابن ابي شيبه/كتاب صلاة التطوع والإمامة/حدیث: 6143]

حضرت حسن فرماتے ہیں کہ بنو سلمہ کے گھر مسجد سے دور تھے، انہوں نے مسجد کے قریب منتقل ہونے کا فیصلہ کیا تاکہ حضور صلی اللہ علیہ وآلہ وسلم کے ساتھ نماز پڑھ سکیں۔ اس پر حضور صلی اللہ علیہ وآلہ وسلم نے ان سے فرمایا کہ اے بنو سلمہ! کیا تم اپنے نشانات قدم پر ثواب نہیں لینا چاہتے؟ انہوں نے کہا کیوں نہیں؟ پھر وہ اپنے انہی گھروں میں ٹھہر گئے۔ [مصنف ابن ابي شيبه/كتاب صلاة التطوع والإمامة/حدیث: 6144]

حضرت ابی بن کعب فرماتے ہیں کہ مدینہ میں ایک آدمی تھا اور میرے خیال میں قبلہ کی طرف رخ کر کے نماز پڑھنے والوں میں مسجد سے سب سے زیادہ دور گھر اسی کا تھا، اور وہ رسول اللہ صلی اللہ علیہ وآلہ وسلم کے ساتھ نماز میں حاضر ہوا کرتا تھا۔ کسی نے اس سے کہا کہ اگر تم گدھا خرید لو تاکہ تپتی زمین اور اندھیرے میں اس پر سوار ہو کر آیا کرو۔ اس پر اس نے کہا کہ اللہ کی قسم! مجھے یہ بات بالکل پسند نہیں ہے کہ میرا گھر مسجد کے ساتھ ملا ہوا ہو۔ اس بات کا تذکرہ نبی صلی اللہ علیہ وآلہ وسلم سے کیا گیا تو اس نے عرض کیا: یا رسول اللہ! (یہ اس لئے ہے) تاکہ میرے قدم، میرا آنا، میرا جانا اور اپنے گھر والوں کی طرف میرا لوٹنا لکھا جائے۔ رسول اللہ صلی اللہ علیہ وآلہ وسلم نے فرمایا کہ اللہ نے تمہیں یہ عطا کردیا اور جس چیز پر تم نے ثواب کی امید رکھی وہ سب اللہ نے تمہیں عطا کردیا، یا جیسا کہ رسول اللہ صلی اللہ علیہ وآلہ وسلم نے فرمایا۔ [مصنف ابن ابي شيبه/كتاب صلاة التطوع والإمامة/حدیث: 6145]

علی بن ہاشم کہتے ہیں کہ میں نے ابن ابی لیلیٰ سے پوچھا کہ بنو سلمہ نے مسجد کے قریب منتقل ہونے کا ارادہ کیا تھا، تو انہوں نے حضرت جابر رضی اللہ عنہ سے روایت بیان کی کہ رسول اللہ صلی اللہ علیہ وآلہ وسلم نے فرمایا کہ ہر قدم پر ایک نیکی ہے۔ [مصنف ابن ابي شيبه/كتاب صلاة التطوع والإمامة/حدیث: 6146]

حضرت ابوہریرہ سے روایت ہے کہ رسول اللہ صلی اللہ علیہ وآلہ وسلم نے ارشاد فرمایا کہ کیا تم اس بات کی طاقت نہیں رکھتے کہ نماز کے پڑھنے کے بعد آگے، پیچھے یا دائیں بائیں ہو کر نفل پڑھو۔ [مصنف ابن ابي شيبه/كتاب صلاة التطوع والإمامة/حدیث: 6147]

حضرت ابن عباس رضی اللہ عنہما فرماتے ہیں کہ نفل پڑھنے کے لئے آگے یا پیچھے ہوجائے۔ [مصنف ابن ابي شيبه/كتاب صلاة التطوع والإمامة/حدیث: 6148]

حضرت ابن عباس رضی اللہ عنہما، ابن زبیر، ابو سعید اور ابن عمر رضی اللہ عنہما فرمایا کرتے تھے کہ آدمی اس وقت تک نفل نہ پڑھے جب تک اس جگہ سے ہٹ نہ جائے جہاں اس نے فرض نماز پڑھی ہے۔ [مصنف ابن ابي شيبه/كتاب صلاة التطوع والإمامة/حدیث: 6149]

حضرت عامر فرماتے ہیں کہ آدمی اس وقت تک نفل نہ پڑھے جب تک ایک یا دو قدم آگے پیچھے نہ ہوجائے۔ [مصنف ابن ابي شيبه/كتاب صلاة التطوع والإمامة/حدیث: 6150]

حضرت ہشام فرماتے ہیں کہ میرے والد جب کوئی فرض نماز پڑھتے تو اس جگہ سے الگ ہوجاتے اور تسبیح پڑھتے۔ [مصنف ابن ابي شيبه/كتاب صلاة التطوع والإمامة/حدیث: 6151]

حضرت ابن مسعود سے سوال کیا گیا کہ آدمی نے جس جگہ فرض ادا کئے ہوں کیا اسی جگہ نفل نماز پڑھ سکتا ہے۔ انہوں نے فرمایا کہ اس میں کوئی حرج نہیں۔ [مصنف ابن ابي شيبه/كتاب صلاة التطوع والإمامة/حدیث: 6152]