حضرت ابن سیرین اس بات کو جائز قرار دیتے ہیں کہ روزہ دار کپڑے کو گیلا کرکے اپنے چہرے پر ڈال لے۔ [مصنف ابن ابي شيبه/كتاب الصيام/حدیث: 9461]

حضرت عثمان بن ابی العاص رضی اللہ عنہ عرفہ کی شام (یا عرفہ کے دن) روزے کی حالت میں اپنے اوپر پانی ڈلوا کر اور پنکھا جھلوا کر راحت لیا کرتے تھے۔ [مصنف ابن ابي شيبه/كتاب الصيام/حدیث: 9462]

حضرت حسن بن عبید اللہ فرماتے ہیں کہ میں نے حضرت عبدا لرحمن بن اسود کو دیکھا کہ وہ روزہ کی حالت میں اپنے پاؤں پانی میں ڈال کر رکھتے تھے۔ [مصنف ابن ابي شيبه/كتاب الصيام/حدیث: 9463]

حضرت ابوبکر بن عبد الرحمن بن حارث ایک صحابی سے روایت کرتے ہیں کہ نبی کریم صلی اللہ علیہ وآلہ وسلم گرم دن میں روزہ کی حالت میں اپنے سر مبارک پر پانی ڈالتے تھے۔ [مصنف ابن ابي شيبه/كتاب الصيام/حدیث: 9464]

حضرت ابراہیم فرماتے ہیں کہ اس بات کو مکروہ سمجھا جاتا تھا کہ آدمی روزہ کی حالت میں کپڑا گیلا کرکے اپنے اوپر ڈالے۔ [مصنف ابن ابي شيبه/كتاب الصيام/حدیث: 9465]

حضرت ابراہیم فرماتے ہیں کہ نبی کریم صلی اللہ علیہ وآلہ وسلم نے کبھی ذوالحجہ کے دس روزے نہیں رکھے۔ [مصنف ابن ابي شيبه/كتاب الصيام/حدیث: 9466]

حضرت عائشہ رضی اللہ عنہا فرماتی ہیں کہ میں نے کبھی رسول اللہ صلی اللہ علیہ وآلہ وسلم کو عشرۂ ذوالحجہ کے روزے رکھتے نہیں دیکھا۔ [مصنف ابن ابي شيبه/كتاب الصيام/حدیث: 9467]

حضرت ابن عون فرماتے ہیں کہ محمد عشرۂ ذوالحجہ کے سارے روزے رکھا کرتے تھے اور جب عشرہ اور ایام تشریق گذر جاتے تو آپ اتنے ہی دن یعنی نو دن روزہ نہیں رکھا کرتے تھے جتنے دن آپ نے روزے رکھے تھے۔ [مصنف ابن ابي شيبه/كتاب الصيام/حدیث: 9468]

حضرت لیث فرماتے ہیں کہ حضرت مجاہد عشرۂ ذو الحجہ کے روزے رکھا کرتے تھے اور حضرت عطاء بھی ان کا اہتمام کرتے تھے۔ [مصنف ابن ابي شيبه/كتاب الصيام/حدیث: 9469]

حضرت نعمان بن سعد کہتے ہیں کہ ایک آدمی حضرت علی رضی اللہ عنہ کے پاس آیا اور اس نے کہا کہ اے امیر المؤمنین! میں رمضان کے بعد کس مہینے میں روزے رکھا کروں؟ حضرت علی رضی اللہ عنہ نے فرمایا کہ تم نے مجھ سے ایسی چیز کے بارے میں سوال کیا ہے جس کے بارے میں میں نے ایک آدمی کے بعد کسی کو سوال کرتے نہیں سنا، میں نے اس آدمی کو رسول اللہ صلی اللہ علیہ وآلہ وسلم سے اس بارے میں سوال کرتے سنا تو رسول اللہ صلی اللہ علیہ وآلہ وسلم نے اس سے فرمایا تھا کہ اگر تم نے رمضان کے بعد کسی مہینے میں روزہ رکھنا ہو تو محرم کے مہینے میں روزہ رکھو، کیونکہ یہ اللہ کا مہینہ ہے، اس میں ایک دن ایسا ہے جس میں اللہ تعالیٰ نے ایک قوم کی توبہ قبول فرمائی اور اس میں دوسروں کی توبہ بھی قبول فرمائیں گے۔ [مصنف ابن ابي شيبه/كتاب الصيام/حدیث: 9470]